កាលពីរសៀលថ្ងៃទី២៣ កុម្ភ: គណៈកម្មាធិការកីឡាបាល់ទាត់មិត្តភាពយុវជនអន្ដរក្រសួង-ស្ថាប័ន បានរៀបចំសន្និសិតសារព័ត៌មាន និងចាប់ពូល ការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» លើកទី១០ ឆ្នាំ២០២៥ ដោយមានក្រុមតំណាងក្រសួង-ស្ថាប័នចូលរួមចំនួន ៣៥ក្រុម ឯកឧត្តម សុខ សប្បាយណា ប្រធានគណៈកម្មាធិការកីឡាបាល់ទាត់មិត្តភាពយុវជនអន្ដរក្រសួង-ស្ថាប័ន និងលោកជំទាវ ដាំ ដារីនី អនុប្រធាន ស.ស.យ.ក តំណាងដ៏ខ្ពងខ្ពស់ ឯកឧត្តម ហ៊ុន ម៉ានី ប្រធាន ស.ស.យ.ក បានបង្ហាញការសាទរដល់គណៈកម្មាធិការកីឡាបាល់ទាត់មិត្តភាពយុវជនអន្ដរក្រសួង-ស្ថាប័ន។
ថ្លៃក្នុងសន្និសិតសារព័ត៌មាន ឯកឧត្តម សុខ សប្បាយណា ប្រធានគណៈកម្មាធិការកីឡាបាល់ទាត់មិត្តភាពយុវជនអន្ដរក្រសួង-ស្ថាប័ន បានមានប្រសាសន៍ថា ឆ្នាំនេះគឺជាគម្រប់ខួបលើកទី១០ នៃការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» តាមរយ:ចំនួនក្រុមនៃការចូលរួមប្រកួតប្រជែងសម្រាប់ឆ្នាំនេះ គឺជាការបំបែកកំណត់ត្រាថ្មីមួយទៀតបើធៀបទៅហ្នឹងឆ្នាំកន្លងទៅ។
ឯកឧត្តម បានបញ្ជាក់ថា ការចូលរួមមានការកើនឡើងនេះដោយសារមានការចូលរួមពីសំណាក់ស្ថាប័នថ្មីៗ ក៏ដូចជាការវិលត្រឡប់ជាថ្មីពីសំណាក់ក្រសួង-ស្ថាប័ន ចំនួន៣ ក្នុងនោះរួមមាន ក្រសួងអធិការកិច្ច អគ្គលេខាធិការដ្ឋានរដ្ឋសភា និងក្រសួងកិច្ចការនារី។
ក្នុងនោះផងដែរ លោកជំទាវ ដាំ ដារីនី អនុប្រធាន ស.ស.យ.ក តំណាងដ៏ខ្ពងខ្ពស់ ឯកឧត្តម ហ៊ុន ម៉ានី ប្រធាន ស.ស.យ.ក បានបង្ហាញការសាទរដល់គណៈកម្មាធិការកីឡាបាល់ទាត់មិត្តភាពយុវជនអន្ដរក្រសួង-ស្ថាប័ន ដែលបានបង្កើអោយមានការប្រកួតបាល់ទាត់ រវាងក្រុមការងារក្រសួង និងស្ថាប័ននេះឡើង។ លោកជំទាវ បានបង្ហាញការគាំទ្រ និងបន្តលើកទឹកចិត្តអោយមានការរៀបចំព្រឹត្តិការនេះជារៀងរាល់ឆ្នាំបន្តទៀត។
ព្រឹត្តិការណ៍ប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» រៀបចំឡើងដំបូង កាលពីឆ្នាំ២០១៣ ក្រោមអធិបតីភាពឯកឧត្តម ហ៊ុន ម៉ានី ប្រធាន ស.ស.យ.ក ក្នុងគោលបំណងលើកកម្ពស់ស្មារតីសាមគ្គីភាព មិត្តភាព ពង្រឹង និងពង្រីកកិច្ចសហប្រតិបត្តិការរវាងយុវជនតាមក្រសួង-ស្ថាប័នរដ្ឋ ក៏ដូចជាការលើកកម្ពស់សុខុមាលភាពរបស់មន្ដ្រីរាជការផងដែរ។
លទ្ធផលចាប់ពូលរួចរាល់ មាន ៣៥ក្រុម ការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» លើកទី១០ ឆ្នាំ២០២៥៖
ការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» លើកទី១០ ឆ្នាំ២០២៥ មានក្រុមតំណាងក្រសួង-ស្ថាប័នចំនួន ៣៥ក្រុមចូលប្រកួត ដោយនឹងចាប់ផ្ដើមពីថ្ងៃទី០១ ខែមីនា ដល់ថ្ងៃទី២៥ ខែឧសភាខាងមុខ នៅកីឡដ្ឋានស្ដាតចាស់។
ខាងក្រោមនេះជាប្រវត្តិក្រុមចូលរួមប្រកួតកន្លងមក៖
លើកទី១៖ ២០១៣ ក្រុមចូលរួមមានចំនួន ៩
លើកទី២៖ ២០១៤ ក្រុមចូលរួមមានចំនួន ២២
លើកទី៣៖ ២០១៥ ក្រុមចូលរួមមានចំនួន ២៥
លើកទី៤៖ ២០១៦ ក្រុមចូលរួមមានចំនួន ២៩
លើកទី៥៖ ២០១៧ ក្រុមចូលរួមមានចំនួន ៣០
លើកទី៦៖ ២០១៨ ក្រុមចូលរួមមានចំនួន ៣១
លើកទី៧៖ ២០១៩ ក្រុមចូលរួមមានចំនួន ៣១
លើកទី៨៖ ២០២២ ក្រុមចូលរួមមានចំនួន ៣១
លើកទី៩៖ ២០២៤ ក្រុមចូលរួមមានចំនួន ៣៤
គួរបញ្ជាក់ថា សម្រាប់ពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩ ក្រុមក្រសួងអប់រំ យុវជន និងកីឡា បានក្លាយជាម្ចាស់ជើងឯក បន្ទាប់ពី យកឈ្នះក្រុមក្រសួងសុខាភិបាល នៅវគ្គផ្ដាច់ព្រ័ត្រ ក្នុងលទ្ធផល ២-១ នៅកីឡដ្ឋានកងយោធពលខេមរភូមិន្ទ (ស្តាតចាស់) នាថ្ងៃទី០៦ ខែមេសា ឆ្នាំ២០២៤៕
