នៅក្រុងប៉ោយប៉ែត កម្លាំងសមត្ថកិច្ច នៃគណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ របស់ក្រសួងមហាផ្ទៃបានឆ្មក់ចូលក្នុងទីតាំង ២កន្លែង ដោយបានរកឃើញជនបរទេសសរុបចំនួន ២៣០នាក់ មានស្រី ៦៨នាក់, ក្នុងនោះមានជនជាតិថៃចំនួន ១២៣នាក់ ស្រី ៥៩នាក់ (ជិតពាក់កណ្ដាល) ។ ជនបរទេសទាំងនោះកំពុងសម្ងំ លាក់ខ្លួនលួចលាក់ធ្វើប្រតិបត្តិការអនឡាញខុសច្បាប់ ដោយមានមេក្លោងជាជនជាតិចិន និងស្ថិតក្នុងស្ថានភាពរស់នៅធម្មតា ព្រមទាំងទទួលយកការងារខុសច្បាប់ទាំងនោះធ្វើដោយស្ម័គ្រចិត្ត។ នេះបើយោងតាម សេចក្ដីប្រកាសព័ត៌មានរបស់អគ្គស្នងការនគរបាលជាតិ ដែលចេញផ្សាយនាថ្ងៃទី ២៤ ខែ កុម្ភៈ ឆ្នាំ ២០២៥នេះ។
នគរបាលជាតិកម្ពុជាបញ្ជាក់ថា ជនជាតិថៃទាំង ១២៣ នាក់ នគរបាលកម្ពុជានឹងស្នើសុំកិច្ចសហការជាមួយនគរបាលថៃ ដើម្បីមានវិធានការបន្ត ក៏ដូចជាសហការដើម្បីកំណត់មុខសញ្ញាសំខាន់ៗដទៃទៀត ឈានទៅស្វែងរកចាប់ខ្លួនជនល្មើសជាមេខ្លោងយកមកអនុវត្តតាមច្បាប់នៃព្រះរាជាណាចក្រកម្ពុជា។ ចំពោះជនបរទេសផ្សេងទៀត សមត្ថកិច្ចកំពុងធ្វើការសាកសួរ និងចាត់វិធានការតាមច្បាប់។
យោងតាមនគរបាលជាតិកម្ពុជា បានឲ្យដឹងថា នៅថ្ងៃទី២២ និង ២៣ ខែកុម្ភៈ ឆ្នាំ២០២៥ ក្រុមប្រតិបត្តិការ របស់គណៈបញ្ជាការ ធ្វើការចុះត្រួតពិនិត្យជាក់ស្ដែងលើទីតាំងចំនួន ២ទីតាំង ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បន្ទាប់ពីបានធ្វើការស្រាវជ្រាវស៊ើបអង្កេតរយៈពេលជាង៣ខែកន្លងមកហើយ មុននឹងឈានទៅបង្ក្រាបទីតាំងទាំង២ខាងលើនេះ៕
