“ធ្វើឲ្យលឿន ធ្វើឲ្យលះ តែបើស្ទះ សុំគោលការណ៍” ជារូបមន្តធ្វើការ ដែលសម្ដេចមហាបវរធិបតី ហ៊ុន ម៉ាណែត ចែករំលែកទៅកាន់យុវជន ដើម្បីជាប្រទីបជំនួយស្មារតីក្នុងពេលបំពេញការងារ។ សម្ដេចលើកឡើងឃ្លានេះ ក្នុងឱកាសអញ្ជើញជាអធិបតីក្នុងពិធីប្រគល់សញ្ញាប័ត្រជូននិស្សិតនៃសាកលវិទ្យាល័យ សៅស៍អ៊ីសថ៍អេយសៀ នៅខេត្តសៀមរាប នាថ្ងៃទី ២៥ ខែកុម្ភៈ ឆ្នាំ ២០២៥។
សម្ដេចពន្យល់ថា ធ្វើឲ្យលឿន សំដៅដល់ការធ្វើកិច្ចការអ្វីមួយឲ្យលឿនរហ័ស មិនដំអក់ទុកយូរ ដោយប្រកាន់នូវគោលការណ៍៣ គឺត្រូវមានវិធីសាស្ត្រធ្វើការ និងមានកំណត់ត្រាការងារ, ធ្វើការបែងចែកការងារអាទិភាព និងត្រូវចេះធ្វើប្រតិភូកម្មការងារ (ចែករំលែកការងារឲ្យគេជួយធ្វើ)។ សម្ដេចបន្ថែមថា បញ្ហាប្រឈមធំ គឺ “ភ្លេច” ដោយសារការងារច្រើន។ ដូច្នេះត្រូវតែធ្វើកំណត់ត្រាការងារ ហើយបែងចែកការងារទៅតាមលំដាប់លំដោយអាទិភាពបំផុត និងអាទិភាពបន្ទាប់។ ចំពោះការធ្វើប្រតិភូកម្មការងារ ឬចែករំលែកការងារឲ្យគេជួយធ្វើ សម្ដេចណែនាំថា ត្រូវបែងចែកឲ្យត្រូវតាមជំនាញ និងសមត្ថភាពក្រុមការងារ និងពន្យល់ណែនាំពីគោលការណ៍ឲ្យបានច្បាស់លាស់។
ចំណែកឯឃ្លាថា ធ្វើឲ្យលះ សម្ដេចពន្យល់ថា ធ្វើការងារអ្វីមួយត្រូវក្ដាប់គោលការណ៍ថ្នាក់ដឹកនាំ ឬគោលការណ៍រួមឲ្យច្បាស់ និងអនុវត្តការងារដោយមិនស្រពិចស្រពិល និងប៉ិនប្រសប់។ ត្រូវព្យាយាមដោះស្រាយបញ្ហាប្រឈមទៅតាមលទ្ធភាព និងហ៊ានសម្រេចចិត្តក្នុងដែនសមត្ថកិច្ចរបស់ខ្លួន ស្របទៅនឹងគោលការណ៍ដែលថ្នាក់ដឹកនាំបានដាក់ចេញ។
ប្រសិនបើមានបញ្ហារាំងស្ទះ លើសពីលទ្ធភាពដែលខ្លួនដោះស្រាយបាន ត្រូវរាយការណ៍ទៅថ្នាក់ដឹកនាំ និងសុំគោលការណ៍ដើម្បីដោះស្រាយ។ ចៀសវាងសម្ងំទុក ឬព្យាយាមដោះស្រាយទាំងទទឹងទិស នាំឲ្យបញ្ហារីកកាន់តែធំ។ នេះជាការលើកឡើងរបស់សម្ដេចធិបតី។ សម្ដេចថ្លែងថា ប្រាកដណាស់ការងារមួយចំនួនមិនសម្រេចតាមការគ្រោងទុកនោះទេ ប៉ុន្តែត្រូវរាយការណ៍ជាដំណាក់កាល ដើម្បីឲ្យថ្នាក់ដឹកនាំបានដឹងនិងធ្វើការសម្រេចចិត្តដោះស្រាយបន្ត។
សម្ដេចក៏បានក្រើនរំឭកផងដែរថា កុំឲ្យធ្វេសប្រហែសលើកិច្ចការតូចៗ ព្រោះវាអាចបង្កឲ្យទៅជាបញ្ហាប៉ះពាល់ដល់ការងារធំបាន។ សម្ដេចលើកឡើងថា “កាន់តែធំ កាន់តែគិត ការងារល្អិត ជាការងារ ដែលសំខាន់”។
អត្ថបទ៖ ឈិន ធារ៉ាត់
