កាលពីព្រឹកថ្ងៃទី២៧ ខែកុម្ភ: ឆ្នាំ២០២៥ សហព័ន្ធកីឡាបាល់ទាត់កម្ពុជា បានប្រកាសថា កម្ពុជាទទួលបានសិទ្ធិធ្វើជាម្ចាស់ផ្ទះទទួលរៀបចំការប្រកួតវគ្គជម្រុះពានរង្វាន់បាល់ទាត់ផ្នែកនារីជើងឯកប្រចាំតំបន់អាស៊ី AFC Women’s Asian Cup Australia 2026 Qualifiers។
ក្រៅពីកម្ពុជា ក៏មានប្រទេសចំនួន ៧ផ្សេងទៀត ដែលទទួលបានសិទ្ធរៀបចំធ្វើជាម្ចាស់ផ្ទះ ការប្រកួតវគ្គជម្រុះនេះ ក្នុងនោះមាន ៥ប្រទេសដែលស្ថិតនៅក្នុងតំបន់អាស៊ាន រួមមាន៖ កម្ពុជា ឥណ្ឌូណេស៊ី មីយ៉ាន់ម៉ា ថៃ និងវៀតណាម ខណ: ៣ប្រទេសទៀតពីតពន់អាស៊ី មាន ហ្ស៊កដានី តាជីគីស្ថាន និងអ៊ូបេគីស្ថាន។
ដូចនេះ សម្រាប់ក្រុមជម្រើសជាតិនារី ដែលបានចូលរួមសរុបចំនួន ៣៣ប្រទេស បែងចែកជា ៨ពូល នឹងត្រូវចាប់ឆ្នោតចែកពូលនៅថ្ងៃទី២៧ ខែមីនា ឆ្នាំ២០២៥ នៅទីស្នាក់ការរបស់ AFC នៅប្រទេសម៉ាឡេសុី។ ការប្រកួតវគ្គជម្រុះពានរង្វាន់ AFC Women’s Asian Cup Australia 2026 Qualifiers នឹងធ្វើឡើងចាប់ពីថ្ងៃទី២៣ ខែមិថុនា ដល់ថ្ងៃទី០៥ ខែកក្កដា ឆ្នាំ២០២៥។
សម្រាប់ ក្រុមជម្រើសជាតិនារី ចូលរួមវគ្គជម្រុះ មាន៣៣ប្រទេស រួមមាន៖ កម្ពុជា កូរ៉េខាងជើង វៀតណាម ហ្វីលីពីន ចិនតៃបុិ ថៃ អ៊ូបេគីស្ថាន មីយ៉ាន់ម៉ា អ៊ីរ៉ង់ ឥណ្ដា ហ្ស៊កដានី ហុងកុង បារ៉ែន ឥណ្ឌូណេស៊ី កោះហ្គាំ ម៉ាឡេស៊ី នេប៉ាល់ ឡាវ អេមីរ៉ាតអារ៉ាប់រួម ម៉ុហ្គោលី កៀហ្ស៊ីស៊ីស្ថាន បង់ក្លាដែស លីបង់ ប៉ាឡេស្ទីន សិង្ហបុរី តូមិននីស្ថាន តាជីគីស្ថាន ស្រីលង្កា ទីម័រខាងកើត ម៉ាល់ឌីវ អារ៉ាប៊ីសាអូឌីត ប៊ូតាន និង អ៊ីរ៉ាក់។
បន្ទាប់ពីបញ្ចប់វគ្គជម្រុះ ក្រុមចំនួន ១២ដែលមានពិន្ទុខ្ពស់ជាងគេ នឹងត្រូវទៅប្រកួតជុំផ្ដាច់ព្រ័ត្រ នៅទឹកដីប្រទេសអុស្ត្រាលី ក្នុងនោះមាន ៤ប្រទេសទៀតកំពុងរងចាំរួចរាល់ រួមមាន៖ ម្ចាស់ផ្ទះ អូស្ត្រាលី ចិន កូរ៉េខាងត្បូង និងជប៉ុន។
គួរបញ្ជាក់ថា ពានរង្វាន់បាល់ទាត់ផ្នែកនារី ជើងឯកប្រចាំតំបន់អាស៊ី ត្រូវបានបង្កើតឡើងចាប់ពីឆ្នាំ ១៩៧៥ ខណ: ក្រុមនារីចិន ឈ្នះជើងឯកបានច្រើនជាងគេ ចំនួន ៩លើក (១៩៨៦, ១៩៨៩, ១៩៩១, ១៩៩៣, ១៩៩៥, ១៩៩៧, ១៩៩៩, ២០០៦, ២០២២) កូរ៉េខាងជើង ៣លើក (២០០១, ២០០៣, ២០០៨) ចិនតៃបុិ ៣លើក (១៩៧៧, ១៩៨០, ១៩៨១) ជប៉ុន ២លើក (២០១៤, ២០១៨) អូស្តា្រលី ថៃ និងនូវែលសេឡង់ ១លើក៕
