នៅថ្ងៃសៅរ៍ ទី១ ខែមីនា ឆ្នាំ២០២៥ ពានរង្វាន់ជើងឯកយុវជនអាស៊ី អាយុក្រោម ២០ឆ្នាំ (2025 AFC U-20 Asian Cup) នឹងរកឃើញម្ចាស់ជើងឯកហើយ ដោយជាការប៉ះគ្នារវាង អូស្រ្ដាលី និងអារ៉ាប៊ីសាអូឌីត វគ្គផ្ដាច់ព្រ័ត្រ នៅក្នុងទឹកដីនៃប្រទេសចិន។
មុនធ្វើដំណើរមកកាន់វគ្គផ្ដាច់ព្រ័ត្រ អូស្រ្ដាលី ជាក្រុមលេខ១ ស្ថិតនៅក្នុងពូល A លេង៣ប្រកួតឈ្នះទាំង៣ប្រកួត ឡើងមកកាន់វគ្គ៨ក្រុម អូស្រ្តាលីបានយកឈ្នះ អ៊ីរ៉ាក់ ៣-២ បន្តកៅអីមកកាន់វគ្គពាក់កណ្ដាលផ្ដាច់ព្រ័ត្រ យកឈ្នះជប៉ុន ២-០ ឡើងវគ្គផ្ដាច់ព្រ័ត្រ។
ងាកមកក្រុមអារ៉ាប៊ីសាអូឌីត មុនធ្វើដំណើរមកកាន់វគ្គផ្ដាច់ព្រ័ត្រ ជាក្រុមលេខ១ ក្នុងពូល B ឆ្លងកាត់៣ប្រកួត ឈ្នះ២ ស្មើ១ ឡើងមកកាន់វគ្គ៨ក្រុម អារ៉ាប៊ីសាអូឌីត បានយកឈ្នះ ចិន ១-០ បន្តកៅអីមកកាន់វគ្គពាក់កណ្ដាលផ្ដាច់ព្រ័ត្រ យកឈ្នះកូរ៉េខាងត្បូង ៣-២ ដោយបបាល់កាត់សេចក្ដី១១ម៉ែត្រ បន្ទាប់ពីស្មើគ្នា ០-០។
សម្រាប់កម្មវិធីប្រកួតវគ្គផ្ដាច់ព្រ័ត្រ ពានរង្វាន់ 2025 AFC U-20 Asian Cup ថ្ងៃទី១ មីនា ២០២៥៖
- អូស្ត្រាលី ជួប អារ៉ាប៊ីសាអូឌីត វេលាម៉ោង ៧:៣០យប់ នៅកីឡដ្ឋាន Bao’an ទីក្រុង Shenzhen ប្រទេសចិន
ការប្រកួតពានរង្វាន់ជើងឯកយុវជនក្រោមអាយុ២០ឆ្នាំ (2025 AFC U-20 Asian Cup) ដែលប្រទេសចិន ទទួលរៀបចំធ្វើជាម្ចាស់ផ្ទះជម្រុះសល់ក្រុមខ្លាំងចំនួន១៦ក្រុម ដើម្បីប្រកួតស្វែងរកម្ចាស់ជើងឯកប្រចាំទ្វីប នៅ៦កីឡដ្ឋានផ្សេងគ្នា ចាប់ពីថ្ងៃទី១២ ខែកុម្ភៈដល់ថ្ងៃទី១ ខែមីនា ដោយមាន១៦ប្រទេសចូលរួមប្រកួតប្រជែង។
ក្រុមដែលកក់កៅអីវគ្គពាក់កណ្ដាលផ្ដាច់ព្រ័ត្រមានឈ្មោះតំណាងឱ្យទ្វីបអាស៊ី ឡើងទៅប្រកួតពានរង្វាន់ជើងឯកពិភពលោក 2025 FIFA U-20 World Cup។
ក្រុមកូរ៉េខាងត្បូង ជាអ្នកឈ្នះជើងឯកច្រើនជាងគេរហូតដល់១២លើក គិតចាប់តាំងពីពានរង្វាន់នេះបង្កើតឡើងដំបូងពីឆ្នាំ១៩៥៩មក។ ដំបូងឡើយពានរង្វាន់នេះរៀបចំឡើងរាល់១ឆ្នាំម្តង តែចាប់ពីឆ្នាំ១៩៧៨ មកពានរង្វាន់នេះប្តូរមករៀបចំរាល់២ឆ្នាំម្តងវិញ៕
