សង្គម៖ នៅថ្ងៃទី៤ ខែមីនា ឆ្នាំ២០២៥ នេះ រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា បានដឹកនាំ ក្រុមការងារនៃក្រសួងព័ត៌មាន និងក្រសួងកិច្ចការនារី ប្រជុំពិនិត្យលើក្រមសីលធម៌វិជ្ជាជីវៈ និងការប្រើប្រាស់ពាក្យសម្តីលេបខាយ បៀតបៀនលើស្ត្រីភេទរបស់ពិធីករប្រដាល់ ជួប វុត្ថា។
កិច្ចប្រជុំនេះធ្វើឡើង បន្ទាប់ពីមានករណីចម្រូងចម្រាសកើតចេញពីការប្រើសម្ដីលេងសើចលេបខាយរបស់ ពិធីករប្រដាល់ ចំពោះនារីម៉ូដែល លើកស្លាកទឹកប្រដាល់គុនខ្មែរឈ្មោះ ឆឹង ច័ន្ទមុនីរស្មី ដែលធ្វើឱ្យប៉ះពាល់ដល់កិត្តិយស សេចក្តីថ្លៃថ្នូររបស់ប្អូន ហើយត្រូវបានបង្ហោះចែកចាយនៅលើបណ្ដាញទំនាក់ទំនងសង្គមកាលពីថ្ងៃទី១ ខែមីនា ឆ្នាំ២០២៥ កន្លងទៅ។
បន្ទាប់ពីចប់កិច្ចប្រជុំ ពិធីករឈ្មោះ ជួប វុត្ថា ហៅ MC Vutha បង្ហាញការសោកស្តាយនិងសូមអភ័យទោសជាសាធារណៈចំពោះប្អូនស្រី ឆឹង ច័ន្ទមុនីរស្មី និងស្ត្រីគ្រប់រូបព្រមទាំងសាធារណជនចំពោះកំហុសឆ្គងដោយខ្វះការពិចារណាទៅកាន់ស្ត្រី ដែលធ្វើឱ្យប៉ះពាល់កិត្តិយសស្ត្រី។ ជាមួយគ្នានោះដែរ ពិធីករខាងលើ បានសរសេរលិខិតសូមទោសជាសាធារណៈ និងផ្ដិតមេដៃបញ្ជាក់ដើម្បីបង្ហាញពីការដឹងកំហុសរបស់ខ្លួនផងដែរ។
