បាងកក៖ ប្រទេសថៃបានបណ្តេញមន្ត្រីប៉ូលិសម្នាក់ក្នុងចំណោមមន្ត្រីប៉ូលិសដែលមានកេរ្តិ៍ឈ្មោះ និងមានតំណែងខ្ពស់បំផុតរបស់ប្រទេស ជុំវិញការជាប់ពាក់ព័ន្ធនឹងការលេងល្បែងស៊ីសងខុសច្បាប់ និងការក្លែងបន្លំប្រាក់។ នេះបើយោងតាមការចេញផ្សាយដោយសារព័ត៌មាន AFP ។
ប៉ូលីសថៃ បាននិយាយនៅក្នុងសេចក្តីថ្លែងការណ៍មួយថា លោក Surachate Hakparn ដែលគេហៅឈ្មោះក្រៅថា Big Joke មានតួនាទីជាអគ្គស្នងការរងនគរបាលនៃព្រះរាជាណាចក្រថៃ ត្រូវបានបណ្តេញចេញពីការងារជាផ្លូវការកាលពីថ្ងៃអង្គារ សប្ដាហ៍នេះ។
លោក Surachate ត្រូវគេចាប់បាននៅក្នុងការវាយឆ្មក់ជាបន្តបន្ទាប់ក្នុងឆ្នាំ២០២៣ ដោយផ្តោតលើបណ្តាញល្បែងអនឡាញខុសច្បាប់ដែលមានឈ្មោះថា «Betflix»។
លោក ត្រូវបានចោទប្រកាន់ពីបទលាងលុយកខ្វក់ ហើយត្រូវបានផ្អាកពីការងារ នៅពេលការស៊ើបអង្កេតកំពុងដំណើរការ ទោះបីជាលោកបានបដិសេធក៏ដោយ។ ប៉ុន្ដែលោក Surachate អាចមានពេល ៣០ថ្ងៃ ដើម្បីប្ដឹងឧទ្ធរណ៍ប្រឆាំនឹងការបណ្ដេញចេញ។
ប៉ូលីសថៃ បាននិយាយកាលពីថ្ងៃអង្គារ ថា ការបណ្តេញលោក Surachate ចេញពីការងារ គឺស្របតាម «នីតិវិធីវិន័យសម្រាប់មន្រ្តីដែលកំពុងស៊ើបអង្កេត»។
យ៉ាងណាម៉ិញ ទម្រង់នៃការភ្នាល់ល្បែងភាគច្រើន គឺខុសច្បាប់នៅក្នុងប្រទេសថៃ ដោយអាជ្ញាធរបានខិតខំបិទកន្លែងលេងល្បែងស៊ីសងខុសច្បាប់ និងគេហទំព័រភ្នាល់ល្បែងអនឡាញជាច្រើន ដែលភាគច្រើនជាកម្មសិទ្ធិរបស់បរទេស។
គួរបញ្ជាក់ថា លោក Surachate Hakparn បានបម្រើការក្នុងជួរប៉ូលិសជាយូរឆ្នាំមកហើយ និងមានទំនាក់ទំនងនឹងឥស្សរជនមានឥទ្ធិពលក្នុងរដ្ឋាភិបាលជាច្រើនផងដែរ។ លោកត្រូវបានតែងតាំងដោយឧបនាយករដ្ឋមន្ត្រីថៃ លោក Prawit Wongsuwan ជាប្រធានការិយាល័យអន្តោប្រវេសន៍ក្នុងខែកញ្ញា ឆ្នាំ ២០១៨។ នៅឆ្នាំ២០១៩ លោកបានបាត់ខ្លួនគ្មានមូលហេតុ ហើយបន្ទាប់មក អតីតនាយករដ្ឋមន្ត្រីថៃ លោក Prayut Chan-o-Cha បានតែងតាំងលោកជាទីប្រឹក្សាពិសេសផ្នែកយុទ្ធសាស្ត្រដល់ប៉ូលិសនៅឆ្នាំ ២០២១៕
