សិល្បៈជាតិ៖ តារាបូលីវូដ GAGAN Malik ធ្លាប់សម្ដែងជាតួអង្គព្រះពុទ្ធ បានមកបង្ហាញវត្តមាននៅប្រាសាទអង្គរវត្តនាពេលថ្មីៗនេះ ដោយមានឯកឧត្តម ហួត ហាក់ រដ្ឋមន្រ្តីក្រសួងទេសចរណ៍អមដំណើរជាមួយ។
វត្តមានរបស់តារាបូលីវូតមកកាន់ទឹកដីប្រទេសកម្ពុជាមួយឆ្នាំម្ដងបែបនេះ បានក្លាយជាសារសំខាន់មួយបង្ហាញថា កម្ពុជាជាប្រទេសមានភាពសម្បូរបែបនៃទេសចរណ៍និងបង្ហាញពីកត្តាសុខសន្តិភាព ស្ថានភាពនយោបាយ សន្តិសុខ សណ្តាប់ធ្នាប់សាធារណៈ សង្គមពិតជាក់ស្តែងនៅកម្ពុជា ជាពិសេសអំពីទេសចរដែលកំពុងមកទស្សនាកម្សាន្ត ប្រកបដោយសុខសុវត្ថិភាព ជូនដល់ពិភពលោក។
សូមជម្រាបឡើងវិញបន្តថា កាលពីអំឡុងខែមីនា ឆ្នាំ ២០២៤ កន្លងទៅ លោក GAGAN Malik ធ្លាប់បានធ្វើដំណើរមកទឹកដីអង្គរនៃខេត្តសៀមរាប និងបានចូលជួបថ្វាយបង្គំព្រះអង្គគ្រូ ពិន សែម នៅវត្តរាជបូណ៌ព្រមទាំងមានសទ្ធាជ្រះថ្លា បានប្រគេនតេយ្យទាន ក៏ដូចជារូបចម្លាក់ព្រះពុទ្ធអង្គទុកជាអនុស្សាវរីយ៍ផងដែរ។
លោក Gagan Malik គឺជាតារាសម្ដែងបូលីវូដដែលមានឈ្មោះបោះសំឡេងមួយរូប លោកមានវ័យ ៤៨ឆ្នាំ លោកកើតនៅថ្ងៃទី២៨ ខែកុម្ភៈ ឆ្នាំ១៩៧៦។ លោកបានរៀបការជាមួយនឹងមិត្តនារីដែលរៀនជាមួយគ្នានៅវិទ្យាល័យតាំងពីលោកមានវ័យត្រឹម ២២ឆ្នាំ។
ឧត្តមភរិយារបស់លោកគឺជាអ្នកគាំទ្រផ្គាប់មុខលើរូបលោក ហើយលោកតែងតែពោលថា ខ្លួនមិនមានការព្រួយបារម្ភអ្វីទាំងអស់ ព្រោះលោកមាន សិតា នៅក្បែរខ្លួនចាំគាំទ្រហើយ។ តារារូបនេះបានសាងកេរ្តិ៍ឈ្មោះល្បីល្បាញក្រោយលោកបានសម្ដែងជាតួអង្គព្រះរាម នៅក្នុងរឿង រាមាយណ ដោយរឿងនេះគឺជារឿងជួយឱ្យលោកឈ្នះពានរង្វាន់ the World Buddhist Film Festival ដែលជារៀបចំដោយអង្គការសហប្រជាប្រជាតិ។
តារាបូលីវូដ Gagan Malik ក៏ធ្លាប់បានទទួលពានរង្វាន់តារាឯក Best Actor Award ដោយសម្តែងជាតួព្រះសិទ្ធត្ថ ហើយលោកនឹងរៀនសូត្រពីរបៀបប្រណិប័តន៍ធម៌ចំនួន ១៥ថ្ងៃ ដើម្បីលោកនឹងនាំយកព្រះធម៌ពុទ្ធសាសនាទៅផ្សព្វផ្សាយប្រៀនប្រដៅប្រជាជននៅក្នុងប្រទេសឥណ្ឌាវិញ៕
