រយៈពេល ១សប្ដាហ៍ កន្លងទៅនេះ ពោលគឺចាប់តាំងពីថ្ងៃទី១០ ខែមីនា រហូតដល់ថ្ងៃទី១៦ ខែ មីនា ប្រធានាធិបតីសហរដ្ឋអាមេរិក លោក Donald Trump បានចេញសារពិសេសគួរឱ្យចាប់អារម្មណ៍ ដែលចាំបាច់ត្រូវតែតាមដាន។ ខាងក្រោមនេះ គឺជាព្រឹត្តិការណ៍សង្ខេបខ្លីៗ ដែលបានកើតឡើងកាលពីសប្ដាហ៍មុន មានពាក់ព័ន្ធនឹងការសម្រេចចិត្តរបស់លោក ត្រាំ ។
១. បញ្ជាឱ្យវាយប្រហារ ក្រុមឧទ្ទាម ហ៊ូទី នៅយេម៉ែន
លោកដូណាល់ ត្រាំ បានបញ្ជាឱ្យកងទ័ពសហរដ្ឋអាមេរិកវាយប្រហារទីតាំងរបស់ក្រុមហ៊ូទីនៅប្រទេសយេម៉ែន ដើម្បីសងសឹកចំពោះការវាយប្រហារលើផ្លូវដឹកជញ្ជូននៅសមុទ្រក្រហម។ ការវាយប្រហារនេះបានបណ្តាលឱ្យមនុស្សយ៉ាងហោចណាស់ ២៤ នាក់ស្លាប់។
២.ជួបជាមួយថ្នាក់ដឹកនាំវិស័យធុរកិច្ចសហរដ្ឋអាមេរិក
លោកត្រាំបានជួបជាមួយនាយកប្រតិបត្តិ (CEO) នៃក្រុមហ៊ុនធំៗនៅសហរដ្ឋអាមេរិក ដើម្បីពន្យល់ពីហេតុផលនៃគោលនយោបាយពន្ធ បន្ទាប់ពីទីផ្សារភាគហ៊ុនសហរដ្ឋអាមេរិកមានភាពប្រែប្រួល។ លោកបានសង្កត់ធ្ងន់ថា គោលនយោបាយពន្ធរបស់លោក នឹងនាំចំណូលច្រើនសន្ធឹកសន្ធាប់ចូលក្នុងប្រទេស។
៣.គោលនយោបាយដាក់កម្រិតទិដ្ឋាការមន្ត្រីថៃ
សហរដ្ឋអាមេរិកបានចេញគោលនយោបាយដាក់កម្រិតលើការផ្តល់ទិដ្ឋាការដល់មន្ត្រីថៃដែលជាប់ពាក់ព័ន្ធនឹងការបញ្ជូនជនជាតិអ៊ុយហ្គួរត្រឡប់ទៅប្រទេសចិន។ ក្រសួងការបរទេសថៃបានចេញសេចក្តីថ្លែងការណ៍បញ្ជាក់ថា ខ្លួនបានប្រកាន់ខ្ជាប់នូវគោលការណ៍សិទ្ធិមនុស្សក្នុងការដោះស្រាយបញ្ហានេះ។
៤.សារអំពីបទឈប់បាញ់ជាមួយអ៊ុយក្រែន (ថ្ងៃទី ១២-១៣ ខែមីនា)
(ថ្ងៃទី ១២-១៣ ខែមីនា) លោកត្រាំបាននិយាយជាសាធារណៈអំពីសំណើរបទឈប់បាញ់រយៈពេល ៣០ ថ្ងៃរវាងអ៊ុយក្រែន និងរុស្ស៊ី ដែលសហរដ្ឋអាមេរិកកំពុងជំរុញ។ នៅថ្ងៃទី ១៣ ខែមីនា លោកបានប្រាប់អ្នកសារព័ត៌មាននៅការិយាល័យ Oval Office ថា ការឆ្លើយតបរបស់លោក វ្ល៉ាឌីមៀ ពូទីន (Vladimir Putin) ចំពោះសំណើនេះគឺ “មានសញ្ញាវិជ្ជមាន ប៉ុន្តែមិនទាន់ពេញលេញទេ”។ លោកបានបន្តថា “ខ្ញុំចង់ជួប ឬនិយាយជាមួយគាត់ ប៉ុន្តែយើងត្រូវបញ្ចប់រឿងនេះឱ្យបានលឿន ព្រោះរាល់ថ្ងៃមានមនុស្សស្លាប់”។ សារនេះបង្ហាញពីការប្តេជ្ញាចិត្តរបស់លោកក្នុងការដោះស្រាយជម្លោះនេះ និងជាចំណុចគួរឱ្យកត់សម្គាល់ព្រោះវាទាក់ទងនឹងគោលនយោបាយការបរទេសដ៏ធំមួយ។
៥.ការគំរាមដាក់ទណ្ឌកម្មលើរុស្ស៊ី
លោកត្រាំបានប្រកាសនៅថ្ងៃទី ១៤ ខែមីនា តាមរយៈបណ្តាញសង្គម Truth Social ថាលោក “កំពុងពិចារណាយ៉ាងខ្លាំង” ដាក់ទណ្ឌកម្មធនាគារទ្រង់ទ្រាយធំ និងពន្ធគយលើរុស្ស៊ី ប្រសិនបើមិនមានបទឈប់បាញ់ និងកិច្ចព្រមព្រៀងសន្តិភាពចុងក្រោយត្រូវបានសម្រេច។ លោកបានសរសេរថា “រុស្ស៊ី និងអ៊ុយក្រែន ចូរទៅតុចរចាឥឡូវនេះ មុនពេលវាយឺតពេល”។ សារនេះជាការផ្លាស់ប្តូរគួរឱ្យចាប់អារម្មណ៍ពីជំហរដែលធ្លាប់សម្របសម្រួលជាមួយរុស្ស៊ី ទៅជាការគំរាមកាន់តែតឹងរ៉ឹង។
៦.ជំហររឹងមាំលើពន្ធគយដែក និងអាលុយមីញ៉ូម
ក្នុងអំឡុងជំនួបជាមួយអគ្គលេខាធិការ NATO លោក Mark Rutte នៅថ្ងៃទី ១៣ ខែមីនា លោកត្រាំបាននិយាយថា លោក “នឹងមិនបន្ធូរបន្ថយ ពន្ធគយ ២៥% លើដែក និងអាលុយមីញ៉ូមដែលនាំចូលមកសហរដ្ឋអាមេរិកទេ។ លោកបានបន្ថែមថា “ការរំខានផ្នែកសេដ្ឋកិច្ចនឹងមានបន្តិច ប៉ុន្តែវានឹងមិនយូរទេ”។ សារនេះបង្ហាញពីគោលជំហររឹងមាំរបស់លោកលើគោលនយោបាយពាណិជ្ជកម្ម ទោះបីជាទីផ្សារភាគហ៊ុនបានធ្លាក់ចុះដោយសារភាពមិនប្រាកដប្រជានេះក៏ដោយ។
