កម្ពុជាត្រូវការរ៉ាដាព្យាករណ៍អាកាសធាតុខ្នាតធំយ៉ាងហោច ៣ និងខ្នាតតូចប្រមាណជា ១ ០០០ គ្រឿងដើម្បីធ្វើការព្យាករអាកាសធាតុឲ្យកាន់តែមានភាពសុក្រឹតបន្ថែមទៀត។ រដ្ឋមន្ត្រីធនធានទឹក និងឧតុនិយមលើកឡើងដូច្នេះ នៅក្នុងសន្និសីទសារព័ត៌មានកាលពីដើមខែមីនា ឆ្នាំ ២០២៥ កន្លងទៅ។
ឯកឧត្ដម ថោ ជេដ្ឋា មានប្រសាសន៍ថា បច្ចុប្បន្នកម្ពុជាមានស្ថានីយកណ្ដាលមួយនៅក្នុងរាជធានីភ្នំពេញ ដែលបំពាក់ប្រព័ន្ធរ៉ាដាអាកាសធាតុធំជាងគេ និងមានស្ថានីយតូចៗចំនួន៣០០កន្លែង នៅតាមបណ្ដាខេត្ត។ លោកថា ចំនួនប៉ុណ្ណេះនៅមិនទាន់គ្រប់គ្រាន់ដើម្បីធ្វើការព្យាករណ៍អាកាសធាតុឲ្យឆុតតាមការរំពឹងទុកនោះទេ ខណៈប្រពន្ធរ៉ាដាធំជាងគេក្នុងប្រទេសនៅស្ថានីយកណ្ដាលក៏ហាក់មានអាយុច្រើនណាស់ទៅហើយដែរ។
បើតាមការលើកឡើងរបស់ឯកឧត្ដមរដ្ឋមន្ត្រី ក្រសួងធនធានទឹក និងឧតុនិយម មានគម្រោងកសាងស្ថានីយធំៗចំនួន៣ បន្ថែមទៀត ដោយបំពាក់ប្រព័ន្ធរ៉ាដាព្យាករណ៍អាកាសធាតុទំនើបជាងមុន។ គម្រោងស្ថានីយនេះគ្រោងនឹងសាងសង់នៅ ខេត្តកំពង់ធំ សៀមរាប និងតំបន់មាត់សមុទ្រ។ ដូច្នេះប្រព័ន្ធរ៉ាដាធំៗទាំង៤ បូករួមនឹងស្ថានីយតូចៗពង្រាយនៅតាមខេត្ត វានឹងធ្វើឲ្យការព្យាករអាកាសធាតុ កាន់តែមានភាពប្រទាក់ក្រឡា និងសុក្រឹតភាព។ បើតាមការបង្ហើបប្រាប់ពីរដ្ឋមន្ត្រីថា ឧបករណ៍បំពាក់សម្រាប់ស្ថានីយប្រព័ន្ធរ៉ាដាអាកាសធាតុមួយឈុតតម្លៃប្រមាណ ១០ ទៅ ១៥លានដុល្លារ។
ព័ត៌មានជាក់លាក់អំពីអាកាសធាតុ ពិតជាមានសារសំខាន់ណាស់សម្រាប់ជីវភាពប្រជាជន។ ការព្យាករដឹងមុននូវបម្រែបម្រួលអាកាសធាតុ ក្ដៅ ត្រជាក់ ភ្លៀង ព្យុះ ជាដើម អាចឲ្យប្រជាជនមានលទ្ធភាព និងពេលវេលាគ្រប់គ្រាន់ក្នុងការត្រៀមខ្លួន បង្ការ ទប់ទល់ និងរៀបចំដំណើរជិតឆ្ងាយ ឬ មុខរបររកស៊ី នេះបើនិយាយជារួម។ និយាយដោយឡែកប្រទេសកម្ពុជាយើងជាប្រទេសកសិកម្ម ដូច្នេះដំណឹងអាកាសធាតុបានជះឥទ្ធិពលយ៉ាងខ្លាំងដល់ការរៀបចំបង្កបង្កើនផលរបស់កសិករ។
មូលហេតុទាំងអស់នេះហើយ ដែលរដ្ឋមន្ត្រីក្រសួងធនធានទឹក និងឧតុនិយម លើកឡើងអំពីភាពចាំបាច់ក្នុងការធ្វើទំនើបកម្មវិស័យឧតុនិយមរបស់ជាតិ៕
អត្ថបទ៖ ឈិន ធារ៉ាត់
