ក្រុមជម្រើសជាតិកម្ពុជា នឹងត្រូវបើកទ្វាពហុកីឡដ្ឋានជាតិ ដើម្បីទទួលក្រុមជម្រើសជាតិអារូបា ធ្វើដំណើរពីដែនកោះក្នុងទ្វីបអាមេរិកខាងត្បូង ក្នុងជំនួបមិត្តភាពអន្តរជាតិ នៅថ្ងៃទី២៥ ខែមីនា ឆ្នាំ២០២៥ វេលាម៉ោង ៧:០០នាទីយប់។
មុនប៉ះគោព្រៃកម្ពុជា ក្រុមជម្រើសជាតិអារូបា បានបរាជ័យក្រោយថ្វីជើងរបស់ក្រុមបាល់ទាត់វិសាខា កាលពីថ្ងៃសៅរ៍ ទី២២ ខែមីនា ក្នុងលទ្ធផល 3-1 នៅកីឡដ្ឋានព្រីនស៍ ។ ងាយមកក្រុមជម្រើសជាតិកម្ពុជា ក៏បានបរាជ័យក្នុងការប្រកួតមិត្តភាពអន្តរជាតិ ជាមួយក្រុមជម្រើសជាតិវៀតណាម ក្នុងលទ្ធផល ២-១ កាលពីថ្ងៃទី១៩ ខែមីនា ឆ្នាំ២០២៥ នៅខេត្ត Binh Duong នាប្រទេសវៀតណាម។
អ្វីដែលប្រិយមិត្ត មិនទាន់បានដឹងនោះ គឺក្រុមជម្រើសជាតិអារូបា (Aruba) ដែលមកពីទ្វីបអាមេរិកខាងត្បូង គឺជាប្រទេសទី៤ ដែលបានមកប្រកួតនៅទឹកដីទ្វីបអាស៊ី នឹងលេងជាមួយក្រុមបាល់ទាត់ជម្រើសជាតិកម្ពុជា។
ដូចនេះ ថ្ងៃនេះសារព័ត៌មាន ត្រយង សូមនាំប្រិយមិត្តមកស្គាល់ប្រទេស ៣កន្លងមកដែលធ្លាប់ប្រកួតទល់នឹងកម្ពុជា។
- ថ្ងៃទី១ សីហា ១៩៦៥៖ ហ្គីណេ ២-១ កម្ពុជា នៅកូរ៉េខាងជើង មិត្តភាពអន្តរជាតិ
- ថ្ងៃទី២២ មីនា ២០២៤៖ Equatorial Guinea ២-០ កម្ពុជា នៅអារ៉ាប់ប៊ីសាអូឌីត ពានរង្វាន់ FIFA Series 2024
- ថ្ងៃទី២៦ មីនា ២០២៤៖ Guyana ៤-១ កម្ពុជា នៅអារ៉ាប់ប៊ីសាអូឌីត ពានរង្វាន់ FIFA Series 2024
គួរបញ្ជាក់់ថាអារូបា (Aruba) ប្រទេសដីកោះតូចមួយ ដំបូងឡើយជាអតីតដែនដីរបស់ហូឡង់។ ខណ:ក្រុមបាល់ទាត់ជម្រើសជាតិអារូបា ត្រូវបានបង្កើតឡើងក្នុងឆ្នាំ១៩៣២ និងត្រូវបានផ្សារភ្ជាប់ជាមួយនិងសហភាពបាល់ទាត់ការាបៀន (CFU), CONCACAF និង FIFA ចាប់តាំងពីឆ្នាំ១៩៨៨។ បច្ចុប្បន្នក្រុមបាល់ទាត់ជម្រើសជាតិអារូបា ឈរលខ១៩៥ ក្នុងតារាងចំណាត់ថ្នាក់ FIFA Ranking៕
