ចាប់ពីថ្ងៃទី៤ ៥ និង៦ ខែមេសា ឆ្នាំ២០២៥ ខាងមុខនេះ សាកលវិទ្យាល័យភូមិន្ទវិចិត្រសិល្បៈនឹងរៀបចំពិព័រណ៍ទេពកោសល្យ និងស្នាដៃនិស្សិតលើកទី៨ ដើម្បីអបអរសាទរពិធីចូលឆ្នាំថ្មីប្រពៃណីជាតិខ្មែរ និង បើកឱកាសដល់ និស្សិត ថ្នាក់ឆ្នាំសិក្សាមូលដ្ឋាន និងនិស្សិតទាំង៥មហាវិទ្យាល័យនៃសាកលវិទ្យាល័យភូមិន្ទវិចិត្រសិល្បៈ បានបង្ហាញស្នាដៃរបស់ខ្លួន ក៏ដូចជាផ្ដល់ឱ្យមហាជនទូទៅបានឃើញនូវស្នាដៃផ្សេងៗដែលមានទាក់ទងជាមួយនឹងសិល្បៈខ្មែរគ្រប់ទម្រង់ផងដែរ។
ព្រឹត្តិការណ៍ ពិព័រណ៍ទេពកោសល្យ និងស្នាដៃនិស្សិតលើកទី៨ នេះរៀបចំឡើងនៅក្នុងបរិវេណសាកលវិទ្យាល័យភូមិន្ទវិចិត្រសិល្បៈថ្មី (ជ្រោយចង្វារ) ដោយមានបញ្ចូលនូវកម្មវិធីកម្សាន្តសប្បាយជាច្រើនដូចជា ការលេងល្បែងប្រជាប្រិយខ្មែរ មានចោលឈូង លាក់កន្សែង បោះអង្គញ់ ទាញព្រ័ត្រ និង ចាប់កូនខ្លែង ការតាំងបង្ហាញស្នាដៃនិស្សិត ពីមហាវិទ្យាល័យទាំង៥ មានស្ដង់បង្ហាញផលិតផលម្ហូបអាហារ និងភេសជ្ជៈ ការសម្ដែងនូវផ្ទាំងទស្សនីយភាព បុរាណ ការប្រគំតន្ត្រីពីនិស្សិត ផងដែរ។
តាមឯកសារស្រាវជ្រាវរបស់ លោក ព្រាប ច័ន្ទម៉ារ៉ា សាលារចនាខមរៈ(ឬសាលាសិល្បៈខេមរៈ) ជាភាសារបារាំងហៅថា École des arts Cambodgiens ហើយដែលអ្នកផងទូទៅហៅថា (សាលារចនា) គឺបង្កើតឡើងតាមព្រះរាជក្រិត្យនៃព្រះករុណាព្រះបាទសម្តេចព្រះស៊ីសុវត្ថិ ចុះថ្ងៃទី១៤ ខែធ្នូ ឆ្នាំ១៩១៧ ដោយមានលោក George Groslier (១៨៨៧- ១៩៤៥) ដែលអភិបាលបារាំងប្រចាំឥណ្ឌូចិនបញ្ជូនមកឲ្យរៀបចំសាលានេះ។ សាលារចនាបិទទ្វារអាក់ខានតួនាទីបណ្តុះបណ្តាលធនធានមនុស្សនិងការងារផ្សព្វផ្សាយសិល្បៈវប្បធម៌ របស់ខ្លួនតែក្នុងសម័យខ្មែរក្រហមគ្រប់គ្រងស្រុករវាងឆ្នាំ១៩៧៥-១៩៧៩ ប៉ុណ្ណោះ។ បន្ទាប់ពីពេលនោះមក សាលារចនាក៌មានដង្ហើមរើបៗឡើងវិញបន្តជីវិតក្នុងទីតាំងខ្លួនដ៏រឹងមាំនិងបន្តកាតព្វកិច្ចដ៏មានខ្លឹមសារជាប្រវតិ្តសាស្រ្តសម្រាប់ជាតិខ្លួន៕
