អន្តរជាតិ៖ តាមការចេញផ្សាយរបស់សារព័ត៌មាន BBC Thai នាពេលថ្មីៗនេះ បានលើកឡើងថា ជាការពិត បន្ទាប់ពីគ្រោះរញ្ជួយដីបាក់អាគារកម្ពស់ ៣០ ជាន់ នេះគឺជា «គ្រោះរញ្ជួយដីលើវិស័យសេដ្ឋកិច្ច» នៅប្រទេសថៃ ដែលបង្កឡើងដោយវិធានដំឡើងពន្ធគយរបស់លោក ដូណាល់ ត្រាំ បានជះផលប៉ះពាល់ធ្ងន់ធ្ងរដល់សេដ្ឋកិច្ចប្រទេសថៃមិនឱ្យក្រោករួចពីគ្រោះធម្មជាតិ។
នៅក្នុងការប៉ាន់ប្រមាណវាយតម្លៃដំបូងពីអ្នកជំនាញសេដ្ឋកិច្ចគឺ បណ្ឌិត Piyasak Manasant ជាប្រធានអ្នកស្រាវជ្រាវសេដ្ឋកិច្ចនៅស្ថាប័ន InnovestX Securities បានគូសបញ្ជាក់ថា ប្រទេសថៃមានផលិតផលសំខាន់ៗចំនួន ៥ប្រភេទដែលបាននាំចេញទៅទីផ្សារសហរដ្ឋអាមេរិក នឹងមានការប្រឈមហានិភ័យខ្ពស់រងគ្រោះពីផលប៉ះពាល់។
ដោយផ្អែកលើទិន្នន័យពីក្រុមប្រឹក្សាអ្នកដឹកជញ្ជូនជាតិថៃ ឬហៅកាត់ថា TNSC អ្នកជំនាញសេដ្ឋកិច្ចដដែលនេះបានមើលឃើញថា ផលិតផលកំពូលៗទាំង ៥ ប្រភេទដែលប្រទេសថៃបាននាំចេញទៅកាន់សហរដ្ឋអាមេរិកយ៉ាងគគ្រឹកគគ្រេងនៅក្នុងឆ្នាំ ២០២៤ រួមមាន៖
១-គ្រឿងបរិក្ខារកុំព្យូទ័រ និងសមាសធាតុផ្សំ រួមមាន ២៤.៩% ដែលមានតម្លៃប្រមាណជាង ១០ ពាន់លានដុល្លារអាមេរិក។
២-គ្រឿងម៉ាស៊ីនទូរសារ ទូរសព្ទ បរិក្ខារ និងគ្រឿងបន្លាស់ ប្រមាណ ១១% ដែលមានតម្លៃជាង ៤ពាន់លានដុល្លារអាមេរិក។
៣-ផលិតផលកៅស៊ូ ១១.៦% ដែលមានតម្លៃជាង ៤ពាន់លានដុល្លារអាមេរិក។
៤-បន្ទះឈីបសៀកគ្វី, ត្រង់ស៊ីស្ទ័រ និង ឌីយ៉ូត ទំហំប្រមាណ ៥.៨% ដែលមានតម្លៃជាង ២ ពាន់លានដុល្លារ។
៥-រថយន្ត និងគ្រឿងបន្លាស់ ដែលមានតម្លៃប្រមាណជិត ២ពាន់លានដុល្លារអាមេរិក។
ថ្វីត្បិតថាផលិតផលទាំង ៥ ប្រភេទខាងលើនេះដែលរងផលប៉ះពាល់ខ្លាំងជាងគេក៏ពិតមែន ប៉ុន្តែក៏មានបណ្ដាផលិតផលផ្សេងៗមួយចំនួនដែលប្រមូលផ្តុំនៅក្នុងចង្កោមក្រុមផលិតផលឧស្សាហកម្ម នោះក៏រងផលប៉ះពាល់ដូចគ្នា។ ក្រៅពីនោះ ក៏នៅមានផលិតផលលើវិស័យកសិកម្មដែលរងផលប៉ះពាល់ផងដែរ ដោយប្រទេសថៃបាននាំចេញផលិតផលរបស់ខ្លួនទៅអាមេរិកមានចំនួនច្រើន។
អ្នកជំនាញសេដ្ឋកិច្ចរូបនេះ បានបញ្ជាក់បន្ថែមថា ជាមធ្យម ថៃគិតពន្ធនាំចូលលើផលិតផលអាមេរិកក្នុងរង្វង់ ៨%។ ពន្ធនាំចូលកសិផលរបស់សហរដ្ឋអាមេរិកចូលក្នុងទីផ្សារប្រទេសថៃគិតជាមធ្យមភាគខ្ពស់បំផុតរហូតដល់ ៤២% ប៉ុន្តែអត្រាពិតប្រាកដអាចប្រែប្រួលទៅបានវាអាស្រ័យលើប្រភេទផលិតផលផងដែរ។
ជាមួយគ្នានោះ អ្នកជំនាញសេដ្ឋកិច្ច បានពន្យល់បន្ថែមថា ប្រទេសថៃបានយកពន្ធស្រូវសាលីពីសហរដ្ឋអាមេរិក ២៧% ពន្ធផលិតផលទឹកដោះគោ ៤០% និងពន្ធពោតក្រហមសម្រាប់ធ្វើចំណីសត្វ ២៦០% និងពន្ធរថយន្ត ៨០% ពីសហរដ្ឋអាមេរិក។ ដោយកត្តានេះបានជំរុញឱ្យក្រុមហ៊ុនអាមេរិកមកវិនិយោគទុននៅប្រទេសថៃ។ ដូច្នោះ គោលការណ៍របស់ ត្រាំ ប្រហែលជាចង់បានអ្នកវិនិយោគរបស់ពួកគេ ស្ពាយបង្វិតវិលទៅអាមេរិកវិញក៏ថាបាន៕
