ក្លិបបាល់ទាត់អង្គរថាយហ្គឺរ សមាជិកលីគកំពូលកម្ពុជា Cambodian Premier League ទទួលបានដំណឹងល្អពីកីឡាករកូតាអាស៊ាន ២រូបរបស់ខ្លួន នៅអំឡុងពិធីបុណ្យចូលឆ្នាំប្រពៃណីជាតិខ្មែរ នោះគឺមានម្នាក់មានឈ្មោះត្រូវប្រកួតទល់ក្រុមបីសាចក្រហម Manchester United និងម្នាក់ទៀតឈ្នះជើងឯកលីគកំពូលក្នុងប្រទេសរបស់ខ្លួន។
នៅថ្ងៃទី១៤ ខែមេសា ឆ្នាំ២០២៥ ត្រូវនឹងថ្ងៃសង្រ្កាន្ត ចូលឆ្នាំថ្មីប្រពៃណីជាតិខ្មែរ ខ្សែប្រយុទ្ធ Pocholo Bugas ជនជាតិហ្វីលីពីន ដែលក្លិបអង្គរថាយហ្គឺរ ដាក់ឱ្យក្លិប Kaya F.C.–Iloilo ឯស្រុកកំណើតរបស់គេខ្ចីជើងនោះ បានគ្រងជើងឯកលីគកំពូលហ្វីលីពីន ប្រចាំរដូវកាល ២០២៤-២៥។ ក្នុងអាយុ២៩ឆ្នាំក្លិប Kaya F.C.–Iloilo គ្រងជើងឯកលីគកំពូលហ្វីលីពីន ៣រដូវកាលជាប់ៗគ្នា ក្នុងនោះមានរដូវកាល២០២២-២៣, ២០២៤ និង ២០២៤-២៥ ខណៈរដូវកាល២០១៨, ២០១៩ និង២០២០ បានត្រឹមជើងឯករង។
ក្រោយចាកចេញពីលីគកំពូលកម្ពុជា នៅទីផ្សារដោះដូរកីឡាករជើងទី២ ទៅលីគហ្វីលីពីន កីឡាករ Pocholo Bugas បង្ហាញខ្លួនលើទីលានបាន១១លើក សរុបចំនួន៥៤០នាទី ព្រមទាំងរកគ្រាប់បាល់បាន២គ្រាប់ និងបញ្ជូនបាល់ឱ្យមិត្តរួមក្រុមទាត់បញ្ជូលទីគូប្រកួតបាន៥លើក។
ដោយឡែកនៅថ្ងៃទី១៦ ខែមេសា ឆ្នាំ២០២៥ ត្រូវនឹងថ្ងៃឡើងស័ក នៃពិធីបុណ្យចូលឆ្នាំខ្មែរសហព័ន្ធកីឡាបាល់ទាត់ទីម័រខាងកើត បានចេញសេចក្ដីប្រកាសថាខ្សែប្រយុទ្ធ João Pedro ដែលកំពុងប្រកបអាជីពនៅក្រុមបាល់ទាត់អង្គរថាយហ្គឺរ ក្នុងលីគកំពូលកម្ពុជា ត្រូវបានលោកគ្រូបង្វឹក Kim Sang-sikជនជាតិកូរ៉េខាងត្បូង របស់ក្រុមជម្រើសជាតិវៀតណាម កោះហៅចូលក្រុម ASEAN All-Stars។ ក្រុម ASEAN All-Stars នឹងត្រូវប្រកួតទល់ក្រុម Man Utd មកពីលីគកំពូលអង់គ្លេស នៅថ្ងៃទី២៨ ខែឧសភា ឆ្នាំ២០២៥ ខាងមុខ លើទីលានពហុកីឡដ្ឋាន Bukit Jalil National Stadium ក្នុងទីក្រុងកូឡាឡាំពួរ ប្រទេសម៉ាឡេស៊ី។
ក្លិបបាល់ទាត់អង្គរថាយហ្គឺរ ដែលមានលោក Akihiro Kato ជាប្រធាន មានមូលដ្ឋាននៅខេត្តសៀមរាប ដោយបច្ចុប្បន្នកំពុងប្រជែងនៅតំបន់ Top6 នៃពានរង្វាន់លីគកំពូលកម្ពុជា ទោះបីជាអស់ឱកាសប្រជែងយកពានយ៉ាងណាក្ដី ខណៈនៅក្នុងពានរង្វាន់សម្តេចតជោ ហ៊ុន សែន (Hun Sen Cup) ក្រុមមានអាយុ១០ឆ្នាំមួយនេះធ្លាក់ចេញត្រឹមវគ្គ១៦ក្រុមចុងក្រោយ ក្រោមថ្វីដៃរបស់ Tiffy Army FC៕
