រាជរដ្ឋាភិបាលកម្ពុជាបានដាក់ចេញនូវគោលការណ៍២ ពាក់ព័ន្ធនឹង វិធានការហាមឃាត់ការផ្ដល់រង្វាន់តាមរយៈក្រវិលកំប៉ុងឬគម្របនៃផលិតផល គ្រឿងស្រវឹងនិងភេសជ្ជៈ ដោយក្នុងនោះគោលការណ៍ទី ១ បានចង្អុលបង្ហាញថា ក្នុងករណីមានការហាមឃាត់ចំពោះការផ្ដល់រង្វាន់តាមរយៈក្រវិលកំប៉ុងឬគម្របនៃផលិតផល គ្រឿងស្រវឹងនិងភេសជ្ជៈនោះ ត្រូវកំណត់នូវរយៈពេលសមរម្យណាមួយ ដូចជា៦ខែ ឬ១ឆ្នាំ ដើម្បីឱ្យ ក្រុមហ៊ុនទាំងនោះអាចត្រៀមខ្លួនជាមុន។
ចំណែកឯគោលការណ៍ទី២ រាជរដ្ឋាភិបាលតម្រូវឲ្យធ្វើការរៀបចំកិច្ចប្រជុំរវាងម្ចាស់ក្រុមហ៊ុនផលិតស្រាបៀរនិងភេសជ្ជៈ និងក្រសួង ស្ថាប័នពាក់ព័ន្ធ ក្រោមអធិបតីភាពរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីបិទមិនឱ្យមានការផ្ដល់រង្វាន់ទាំងអស់ក្នុងពេលវេលាសមស្រប។
នេះបើយោងតាមលិខិតរបស់ទីស្ដីការគណៈរដ្ឋមន្ត្រី ដែលចុះកាលបរិច្ឆេទថ្ងៃទី ២៤ ខែមេសា ឆ្នាំ ២០២៥ នេះ។ ដូច្នេះ ប្រសិនបើគោលការណ៍ទាំង ២ ខាងលើត្រូវបានអនុវត្តន៍ នោះបានន័យថា រង្វាន់ជាភេសជ្ជៈ និងគ្រឿងស្រវឹង ទឹកប្រាក់ ដុំមាស យានយន្ត និងវត្ថុមានតម្លៃផ្សេង ដែលក្រុមហ៊ុនភេសជ្ជៈ និងគ្រឿងស្រវឹងដាក់ទាក់ទាញអតិថិជននៅលើគម្របដប និងក្រវិលកំប៉ុង នឹងលែងមានបន្តទៀតហើយ នាពេលខាងមុខ។
ការដាក់ចេញនូវគោលការណ៍ណែនាំនេះ ធ្វើឡើងបន្ទាប់ពី ក្រុមហ៊ុនភេសជ្ជៈ និងគ្រឿងស្រវឹងចំនួន៥ ក្នុងនោះ ក្រុមហ៊ុន Heineken ជាអ្នកចេញមុខនាំអាទិ៍ និងសមាគមអ្នកនាំចូល និងចែកចាយស្រាបៀរនិងស្រា បានដាក់លិខិតស្នើសុំរាជរដ្ឋាភិបាលចាត់វិធានការលើការធ្វើទីផ្សារដោយការផ្ដល់រង្វាន់តាមរយៈគម្របដប និងក្រវិលកំប៉ុងក្នុងឧស្សាហកម្មភេសជ្ជៈ និងគ្រឿងស្រវឹងកាលពីខែមីនា ឆ្នាំ ២០២៥ កន្លងទៅ។
សូមជម្រាបថា កាលពីអំឡុងខែ តុលា ឆ្នាំ ២០២៤ សមាគមអ្នកនាំចូល និងចែកចាយស្រាបៀរនិងស្រា ដែលមានសមាជិកសុទ្ធតែជាយីហោមកពីបរទេស បានបង្ហាញជំហររបស់ខ្លួនជាសាធារណៈ មិនគាំទ្រការប្រើប្រាស់ការលើកទឹកចិត្តជាសាច់ប្រាក់ ឬរង្វាន់ដែលមានតម្លៃខ្ពស់ ដើម្បីជំរុញការលក់គ្រឿងស្រវឹងឡើយ។ សមាគមមួយនេះយល់ឃើញថា ការអនុវត្តការផ្សព្វផ្សាយដោយមានរង្វាន់លើគម្រប និងក្រវិលកំប៉ុង ឬដប ជាទូទៅត្រូវបានអនុវត្តដោយម៉ាកស្រាបៀរក្នុងស្រុកមួយចំនួន។ វិធីសាស្រ្តនេះអាចជំរុញទឹកចិត្តអតិថិជនឲ្យឈានដល់ឥរិយាបថនៃការទិញរបស់ខ្លួនដោយត្រេកត្រអាល ដែលផ្ទុយនឹងការប្ដេជ្ញាចិត្តក្នុងការលើកកម្ពស់ការពិសាគ្រឿងស្រវឹងប្រកបដោយការទទួលខុសត្រូវ៕
អត្ថបទ៖ ឈិន ធារ៉ាត់
