ឆ្លើយបញ្ជាក់ជាមួយអង្គភាពសារព័ត៌មានត្រយង, អ្នកនាំពាក្យស្នងការនគរបាលរាជធានីភ្នំពេញ លោកវរសេនីយ៍ឯក សំ វិច្ឆិកា ថា កម្រិតជាតិអាល់កុល ដែលមន្ត្រីនគរបាលជំនាញបានរកឃើញលើជនបង្កគ្រោះថ្នាក់ចរាចរណ៍នៅលើមហាវិថីព្រះនរោត្តម ម្ដុំមុខក្រសួងវប្បធម៌កាលពីថ្ងៃព្រហស្បតិ៍ ម្សិលមិញ គឺ ០.៣៥ មីលីក្រាម ក្នុងមួយលីត្រខ្យល់។
លោកបន្ថែមថា ការឆ្លើយតបទៅនឹងបណ្ដាញសារព័ត៌មានកាលពីម្សិលមិញ (១៥ ឧសភា ២០២៥) ក៏លោកបានបញ្ជាក់អំពីតួលេខខាងលើផងដែរ ប៉ុន្តែអាចនឹងមានអ្នកសារព័ត៌មាន ឬអ្នកសកម្មលើបណ្ដាញសង្គមមួយចំនួនមានការភាន់ច្រឡំ ដោយស្ដាប់ពុំបានច្បាស់លាស់។
សូមរំឭកថា កាលពីរសៀលថ្ងៃព្រហស្បតិ៍ ទី ១៥ ខែឧសភា ឆ្នាំ២០២៥ មានករណីគ្រោះថ្នាក់ចរាចរណ៍បង្កឡើងដោយរថយន្ត Lexus RX 400 បើកបរក្នុងទិសដៅពីត្បូងទៅជើង ដោយអ្នកបើកបរ កំពុងស្ថិតក្នុងស្ថានភាពស្រវឹង បុករះទៅលើអ្នកដំណើរផ្សេងទៀតនៅលើផ្លូវបណ្ដាលឲ្យមានអ្នកស្លាប់ម្នាក់ របួសធ្ងន់ ២នាក់ និងរបួសស្រាល ៣ នាក់។ តាមការបញ្ជាក់ពីសមត្ថកិច្ច ជនបង្កគឺជាមន្ត្រីនគរបាលនៃស្នងការនគរបាលរាជធានីភ្នំពេញ ថ្នាក់វរសេនីយ៍ឯក (ស័ក្ដិ៥)។
ករណីនេះ បង្កជាការភ្ញាក់ផ្អើលមិនត្រឹមតែនៅកន្លែងកើតហេតុនោះទេ, នៅលើបណ្ដាញសង្គម ក៏ត្រូវបានគេលើកយកមកជជែក វែកញែកជាហូរហែផងដែរ។
ទោះជាយ៉ាងណា ករណីនេះត្រូវបានអ្នកនាំពាក្យ នៃស្នងការនគរបាលរាជធានីភ្នំពេញគូសបញ្ជាក់ថា ឧត្ដមសេនីយ៍ឯកជួន ណារិន អគ្គស្នងការរង និងជាស្នងការនគរបាលរាជធានីភ្នំពេញបានដាក់បទបញ្ជាយ៉ាងម៉ឺងម៉ាត់ដល់កម្លាំងមានសមត្ថកិច្ច កសាងសំណុំរឿងនៃជនបង្កទៅកាន់តុលាការចាត់ការតាមផ្លូវច្បាប់ដោយពុំមានការលើកលែងនោះឡើយ។ ជាមួយគ្នានេះជនបង្កអាចប្រឈមនឹងការបណ្ដេចចេញពីក្របខណ្ឌផងដែរ។
សូមស្ដាប់សំឡេង លោកវរសេនីយ៍ឯក សំ វិច្ឆិកា
សូមជម្រាបថា ច្បាប់ស្ដីពីចរាចរណ៍ផ្លូវគោក៖
មត្រា ៨០ បានចែងថា ជនណាបើកបរបង្កឱ្យមានរបួសដល់អ្នកដទៃដោយអចេតនាបណ្ដាលអសមត្ថភាពធ្វើការ ស្មើ ឬលើសពី៨ថ្ងៃ ត្រូវផ្ដន្ទាទោសដាក់ពន្ធនាគារពី ៦ ខែ ទៅ១ឆ្នាំ និងពិន័យជាប្រាក់ពី ២ម៉ឺន ៥ពាន់រៀល ទៅ ២លានរៀល។
មត្រា ៨០-៨១ បានចែងថា ជនណាបើកបរបង្កឱ្យអ្នកដទៃពិការជាអចិន្ត្រៃយ៍ ឬជនណាបើកបរបង្កឱ្យអ្នកដទៃស្លាប់ ដោយអចេតនា ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ៣ឆ្នាំ និងពិន័យជាប្រាក់ពី ២លានរៀល ទៅ៦លានរៀល។
ច្បាប់ក៏បានគូសបញ្ជាក់ផងដែរថា ត្រូវផ្ដន្ទាទោសកម្រិតអតិបរមា ប្រសិនបើអ្នកបើកបរស្ថិតក្នុងស្ថានភាពស្រវឹងដោយអត្រាជាតិអាល់កុលមានកម្រិត ០.៤០ មិល្លីក្រាមក្នុងមួយលីត្រខ្យល់។ កម្រិតអតិបរមា នៃទោសក៏ត្រូវអនុវត្តផងដែរ ប្រសិនបើគ្រោះថ្នាក់បណ្ដាលឲ្យមានអ្នករបួស ឬស្លាប់ជាច្រើននាក់៕
អត្ថបទ៖ ឈិន ធារ៉ាត់
