ក្រុមបាល់ទាត់ក្នុងសាលនារីថៃ ឡើងទៅកាន់វគ្គផ្ដាច់ព្រ័ត្រជួបជប៉ុន ក្នុងពានរង្វាន់ប្រកួតបាល់ទាត់ក្នុងសាលជើងឯកផ្នែកនារីប្រចាំតំបន់អាស៊ី 2025 AFC Women’s Futsal Asian Cup ក្រោយយកឈ្នះលើក្រុមនារីចិន ក្នុងលទ្ធផល ៣-២ កាលពីថ្ងៃទី១៥ ឧសភា ២០២៥ កន្លងទៅ។
សម្រាប់ជ័យជម្នះឡើងមកកាន់វគ្គផ្ដាច់ព្រ័ត្រ ក្នុងពានរង្វាន់ប្រកួតបាល់ទាត់ក្នុងសាលជើងឯកផ្នែកនារីប្រចាំតំបន់អាស៊ី ឆ្នាំ២០២៥ បានធ្វើឱ្យក្រុមបាល់ទាត់ក្នុងសាលនារីថៃ កក់កៅអីទៅលេង 2025 FIFA Futsal Women’s World Cup រួចជាស្រេច។
ដូចនេះសម្រាប់ការប្រកួតវគ្គផ្ដាច់ព្រ័ត្រ រវាងក្រុមនារីថៃ ជួប ជប៉ុន នឹងត្រូវប្រកួតនៅរាត្រីនេះ វេលាម៉ោង ៨:០០ នាទីយប់ នៅក្នុងសាល Hohhot Sports Centre ក្នុងប្រទេសចិន ខណ:ក្រុមដណ្ដើមចំណាត់ថ្នាក់លេខ៣ រវាង ចិន និង អ៊ីរ៉ង នឹងត្រូវប្រកួតចាប់បីម៉ោង ៥:០០នាទីល្ងាចថ្ងៃនេះដូចគ្នា។
ព្រឹត្តិការណ៍ប្រកួតពានរង្វាន់បាល់ទាត់ក្នុងសាលជើងឯកផ្នែកនារីប្រចាំតំបន់អាស៊ី 2025 AFC Women’s Futsal Asian Cup ធ្វើឡើងចាប់ពីថ្ងៃទី៦ ដល់ថ្ងៃទី១៧ ខែឧសភា ឆ្នាំ២០២៥ នៅប្រទេសចិន ដែលមាន ១២ប្រទេសចូលរួមប្រកួតប្រជែង។
គួរបញ្ជាក់ថា ព្រឹត្តិការណ៍ប្រកួតពានរង្វាន់បាល់ទាត់ក្នុងសាលជើងឯកផ្នែកនារីប្រចាំតំបន់អាស៊ី AFC Women’s Futsal Asian Cup បង្កើតឡើងដំបូងនៅឆ្នាំ២០១៥ នៅប្រទេសម៉ាឡេស៊ី ម្ចាស់ជើងឯក អ៊ីរ៉ង់ នៅលើកទី២ ឆ្នាំ២០១៨ នៅប្រទេសថៃ ម្ចាស់ជើងឯក អ៊ីរ៉ង់ លើកទី៣ នៅប្រទេសគុយវែត តែត្រូវរំសាយដោយជំងឺកូវិដ និងលើកទី៤ ឆ្នាំ២០២៥ នៅប្រទេសចិន៕
