បច្ចុប្បន្ននេះ ការក្លែងបន្លំគឺជា បញ្ហាសកល បណ្ដាប្រទេសមួយចំនួនទូទាំងពិភពលោកកំពុងមានការព្រួយបារម្ភអំពីឧក្រិដ្ឋកម្មឆបោកគ្រប់ទម្រង់។
គេពិបាកក្នុងការសម្គាល់ថា តើប្រទេសណាមានអត្រាអ្នករងគ្រោះច្រើនណាស់ ដោយសារតែវាមិនមានរបាយការណ៍ណាមួយជាក់លាក់នោះទេ។ ជាក់ស្ដែងគេបានរកឃើញថា ទីក្រុង និងប្រទេសចំនួន ៥ នៅអាស៊ីតែងតែលើកឡើងនៅក្នុងការពិភាក្សាអំពីអត្រាក្លែងបន្លំ និងការឆបោកកម្រិតខ្ពស់ ជាពិសេសការឆបោកភ្ញៀវទេសចរពាក់ព័ន្ធនឹងការធ្វើដំណើរ។
តស់! មកយល់ដឹងទាំងអស់គ្នា ផ្អែកតាមរបាយការណ៍ Mastercard បានឱ្យដឹងអំពីហានិភ័យនៃការធ្វើដំណើរនៅតំបន់ពេញនិយមក្នុងទីក្រុងអាស៊ីអាគ្នេយ៍៖
១) ទីក្រុងហាណូយ ប្រទេសវៀតណាម៖ អ្នកធ្វើដំណើរទៅកាន់ទីក្រុងហាណូយ បានរាយការណ៍ពីការក្លែងបន្លំកម្រិតខ្ពស់។ ភ្ញៀវបរទេសភាគច្រើនបានរាយការណ៍ពីការចាញ់បោកក្រោមស្នាដៃអ្នកផ្ដល់សេវាកម្មម្ហូបអាហារ ការកក់សណ្ឋាគារ សេវាកម្មដឹកជញ្ជូន ។ល។
២) ទីក្រុងដាកា ប្រទេសបង់ក្លាដេស៖ ទីក្រុងមួយនេះត្រូវបានគេសម្គាល់ថា មានការក្លែងបន្លំខ្ពស់ជាងគេ។
៣) ទីក្រុងហ្សាកាតា ប្រទេសឥណ្ឌូណេស៊ី៖ ការឆបោកពាក់ព័ន្ធសេវាតាក់ស៊ី និងការជួលរថយន្ត គឺជាបញ្ហាសំខាន់នៅទីក្រុងហ្សាកាតា បើផ្អែកតាមការរាយការណ៍ពីទេសចរបរទេស ៦៦%។
៤) ប្រទេសឥណ្ឌា៖ ប្រទេសនេះត្រូវបានគេសម្គាល់ថា មានការបោកប្រាស់ផ្នែកបច្ចេកវិទ្យា និងសេវាកម្មក្លែងបន្លំផ្សេងៗ។ អ្នកក្លែងបន្លំនឹងទូរស័ព្ទទៅជនរងគ្រោះដោយធ្វើពុតជាអ្នកផ្តល់ជំនួយបច្ចេកទេស និងបញ្ចុះបញ្ចូលគោលដៅពួកគេឱ្យផ្តល់នូវតំណភ្ជាប់នានា ដើម្បីមានសិទ្ធិបញ្ជាពីចម្ងាយ។
៥) ទីក្រុងបាងកក ប្រទេសថៃ៖ បើតាមរបាយការណ៍ពី Mastercard បានបង្ហាញថា នៅទីក្រុងបាងកក សេវាកម្មតាក់ស៊ី និងជួលរថយន្តមានចំនួន៤៨% នៃករណីឆបោក ដែលធ្វើឱ្យប្រទេសមួយនេះ ក្លាយជាប្រភពនៃការឆបោកទូទៅកម្រិតខ្ពស់បំផុតផ្តោតលើភ្ញៀវទេសចរ។ លើសពីនេះភ្ញៀវបរទេសជាច្រើនបានរាយការណ៍ថា ពួកគេក៏បានចាញ់បោកក្រោមស្នាដៃអ្នកផ្តល់សេវាកម្មម្ហូបអាហារ និងកក់សណ្ឋាគារផងដែរ ៕
