ក្លិបាល់ទាត់ភ្នំពេញក្រោន បានគ្រប់ជើងឯក នៃពានរង្វាន់សម្ដេចតេជោ ហ៊ុន សែន (Hun Sen Cup) (ថ្នាក់ជាតិ) នៅលើកទី១៨ ឆ្នាំ២០២៤-២០២៥ បន្ទាប់ពីយកឈ្នះព្រះខ័នរាជស្វាយរៀង ក្នុងលទ្ធផល ២-១ នារាត្រីថ្ងៃអាទិត្យ ទី២៥ ខែឧសភា ឆ្នាំ២០២៥ ពហុកីឡដ្ឋានជាតិ មរតកតេជោ។
ក្នុងការប្រកួតដ៏ស្វិតស្វាញនៅលើកទីលានវាស្មី ក្រុមទាំង២សម្រុកគ្នាទៅវិញទៅមក របស់ដល់នាទីទី២៤ ទើបភ្នំពេញក្រោន បានបើកការនាំមុខ ដោយទាត់បញ្ចូលទីដោយកីឡាករ ឡុង ភារ៉ាត់ លទ្ធផលនេះនៅរក្សារហូតដល់ចប់ង់ទី១។
ឈានដល់តង់ទី២ ព្រះខ័នរាជស្វាយរៀង បានដាក់សម្ពាធលើកភ្នំពេញក្រោន រហូតដល់នាទីទី៦២ បានទម្លាយសំណាញ់ទីភ្នំពេញក្រោន បាន ១គ្រាប់តាមស្មើវិញ រកបានដោយកីឡាករ ញាន សុស៊ីដាន ការប្រកួតនៅតែបន្តតាន់តឹងដាក់គ្នា និងមានការផ្លាស់ប្ដូរកីឡាករ ដើម្បីបង្កើនយុទ្ធសាស្រ្តរៀងៗខ្លួន ភ្នំពេញក្រោន បានមានឱកាសរកបាន១គ្រាប់ទៀត ស៊ុតបញ្ចូលទីដោយ Andres Nieto ដោយរក្សាលទ្ធផលរហូតដល់បញ្ចប់ការប្រកួត ក្នុងលទ្ធផល ២-១។
បិទបញ្ចប់ ពានរង្វាន់សម្ដេចតេជោ ហ៊ុន សែន (Hun Sen Cup) (ថ្នាក់ជាតិ) នៅលើកទី១៨ ឆ្នាំ២០២៤-២០២៥ ក្រុមទទួលបានចំណាត់ថ្នាក់មានដូចខាងក្រោម៖
- ម្ចាស់ជើងឯក៖ ក្លិបាល់ទាត់ភ្នំពេញក្រោន
- ជើងឯករង៖ ក្លិបបាល់ទាត់ព្រះខ័នរាជស្វាយរៀង
- ចំណាត់ថ្នាក់លេខ៣៖ ក្លិបបាល់ទាត់បឹងកេត
- ចំណាត់ថ្នាក់លេខ៤៖ ក្លិបបាល់ទាត់វិសាខា
កីឡាករឈ្នះ ពានរង្វាន់ឯកត្តជន រួមមាន៖
- កីឡាករ សៀង ចន្ធា របស់បឹងកេត ឈ្នះពានរង្វាន់ កីឡាករទាត់បញ្ចូលទីច្រើនជាងគេ
- កីឡាករ ម៉ាត់ នូរុណ របស់បឹងកេត ឈ្នះពានរង្វាន់ កីឡាករល្អជាងគេ
- អ្នកចាំទី អ៊ំ វិចិត្រ របស់ភ្នំពេញក្រោន ឈ្នះពានរង្វាន់ អ្នកចាំទីល្អជាងគេ
នេះជាលើកទី៥ ហើយ ដែលភ្នំពេញក្រោន បានឡើងវគ្គផ្ដាច់ព្រ័ត្រក្នុងប្រវត្តិពាន Hun Sen Cup និងធ្លាប់ឈ្នះជើងឯកបាន ២លើករួចមកហើយ (២០០៨, ២០០៩) ខណ:ឆ្នាំ២០២៥នេះ គឺជាលើកទី៣ របស់ពួកគេ បន្ទាប់ពីខកខានអស់រយ:ពេល ១៦ឆ្នាំគត់ ចាប់ពីឆ្នាំ២០០៩មក។
ងាកមកព្រះខ័នរាជស្វាយរៀងវិញ បានឡើងមកកាន់វគ្គនេះ ជាលើកទី១០ហើយ សម្រាប់ឆ្នាំនេះ និងធ្លាប់បានឈ្នះជើងឯកបាន ៥លើក (២០១១, ២០១២, ២០១៥, ២០១៧, ២០២៣–២៤)។
រំលឹកថា ក្រុមទាំង២ ក៏ធ្លាប់បានជួបគ្នានៅវគ្គផ្ដាច់ព្រ័ត្រនេះ ៣លើករួចមកហើយ ដោយនៅឆ្នាំ២០០៨ ភ្នំពេញក្រោន (កាលនោះមានឈ្មោះថា Phnom Penh Empire) បានយកឈ្នះប្រះខ័នរាជស្វាយរៀង ១-០ នៅឆ្នាំ២០២៣-២៤ ព្រះខ័នរាជស្វាយរៀង បានយកឈ្នះភ្នំពេញក្រោនវិញម្ដង ១-០ នៅវគ្គផ្ដាច់ព្រ័ត្រ។
សម្រាប់ពានរង្វាន់សម្តេចតេជោ ហ៊ុន សែន ឆ្នាំ២០២៤/២៥ នេះបន្តបែងចែកជា២កម្រិត ដូចឆ្នាំកន្លងទៅដែរ ដោយក្នុងនោះ ទី១) វគ្គប្រកួតជើងឯកថ្នាក់ខេត្ត និងទី២) វគ្គប្រកួតជើងឯកថ្នាក់ជាតិ។ ក្រោយរកឃើញក្រុមជើងឯក និងកូតា ចេញពីការប្រកួតជើងឯកថ្នាក់ខេត្ត។
ពានរង្វាន់សម្តេចតេជោ ហ៊ុន សែន (18th Hun Sen Cup) ជើងឯកថ្នាក់ខេត្ត ឆ្នាំ២០២៤-២៥នេះ បានទៅលើក្រុមមន្ទីរ អយក ខេត្តត្បូងឃ្មុំ។ ខណ:ជើងឯកថ្នាក់ជាតិ ឆ្នាំ២០២៣/២៤ កន្លងទៅ បានទៅលើក្លិបាបល់ទាត់ព្រះខ័នរាជស្វាយរៀង។
ពានរង្វាន់សម្តេចតេជោ ហ៊ុន សែន (18th Hun Sen Cup) ត្រូវបានបង្កើតឡើងតាំងពីឆ្នាំ២០១៧ ដែលធ្វើឡើងជារៀងរាល់ឆ្នាំ ដោយព្រះខ័នរាជស្វាយរៀង ឈ្នះជើងឯកបានច្រើនជាងគេ ៥លើក ក្រសួងការពារជាតិ បាន ៣លើក វិសាខា បាន ៣លើក ភ្នំពេញក្រោន បាន ២លើក ខណ:ណាហ្គាវើលដ៍ ក្រសួងមហាផ្ទៃ បឹងកេត និងខេមរកីឡា ឈ្នះបាន ១លើកដូចគ្នា៕
