អង្គភាពមួយរបស់ទីម័រខាងកើត ត្រូវបានបង្កើតឡើងរួចហើយនៅលេខាធិការដ្ឋានអាស៊ាន ក្នុងទីក្រុងហ្សាការតា អង្គភាពនេះមាននាទីជួយទីម័រខាងកើតក្នុងការអនុវត្តតាមបទដ្ឋានគតិយុត្តិរបស់អាស៊ាន។ ជាមួយគ្នានេះ បណ្ដាប្រទេសជាសមាជិកអាស៊ាន កំពុងអនុវត្តនីតិវិធីពាក់ព័ន្ធ ដើម្បីបញ្ចប់ដំណើរការចូលជាសមាជិករបស់ទីម័រខាងកើត នៅត្រឹមកិច្ចប្រជុំកំពូលអាស៊ានលើកទី ៤៧ និងកិច្ចប្រជុំកំពូលពាក់ព័ន្ធនានា នៅខែតុលាឆ្នាំ២០២៥ នេះ ដោយសង្ឃឹមថា នឹងបានសម្រេច។
ឯកឧត្តម មហាម័ត ហាសាន់ រដ្ឋមន្ត្រីការបរទេសម៉ាលេស៊ីលើកឡើងបែបនេះ ក្នុងសន្និសីទសារព័ត៌មាននៅទីក្រុងគូឡាឡាំពួរបន្ទាប់ពីកិច្ចប្រជុំកំពូលអាស៊ានលើកទី៤៦ បានបញ្ចប់។
ក្នុងឱកាសនេះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានផ្ញើលិខិតសម្ដែងក្ដីសោមនស្សរីករាយជូនរដ្ឋាភិបាល និងប្រជាជនទីម័រខាងកើត ចំពោះការចូលជាសមាជិកផ្លូវការ នៃអាស៊ានក្នុងកិច្ចប្រជុំកំពូលអាស៊ានលើកទី៤៧ នៅខែតុលា ខាងមុខ បន្ទាប់ពីការចូលជាសមាជិកសង្កេតការណ៍របស់អាស៊ាន នៅក្នុងកិច្ចប្រជុំកំពូលអាស៊ានលើកទី៤០ និង លើកទី៤១ នៅកម្ពុជាក្នុងឆ្នាំ ២០២២ គឺជាជំហានឆ្ពោះទៅមុខដ៏សំខាន់សម្រាប់តំបន់។
បើតាមសម្ដេចតេជោ កម្ពុជាតែងគាំទ្រយ៉ាងពេញទំហឹងដល់សមាជិកភាពអាស៊ានរបស់ទីម័រខាងកើត ដែលនឹងធ្វើឱ្យកាន់តែប្រសើរឡើងនូវកិច្ចខិតខំប្រឹងប្រែងរួមក្នុងការលើកកម្ពស់ឯកភាព បរិយាបន្ន និងការអភិវឌ្ឍប្រកបដោយចិរភាពនៅទូទាំងអាស៊ីអាគ្នេយ៍។ ប្រឈមមុខនឹងបរិការណ៍សកលលោក កំពុងមានភាពស្មុគស្មាញ ការដាក់បញ្ចូលទីម័រខាងកើតជាសមាជិកអាស៊ាន នោះនឹងជួយពង្រឹងចក្ខុវិស័យរួមសម្រាប់សហគមន៍អាស៊ានដែលមានភាពធន់ និងស្អិតល្មួត។
រដ្ឋមន្ត្រីការបរទេសម៉ាឡេស៊ី បានគូសបញ្ជាក់ថា ការដាក់បញ្ចូលទីម័រខាងកើតជាសមាជិកពេញសិទ្ធនៃអាស៊ាន ធ្វើឡើងស្របតាមចក្ខុវិស័យ និងអនុលោមតាមប្រធានបទសម្រាប់ឆ្នាំ ២០២៥ គឺ អាស៊ានប្រកបដោយ បរិយាបន្ន និងនិរន្តរភាព៕
អត្ថបទ៖ ឈិន ធារ៉ាត់
