នៅព្រឹកថ្ងៃទី២៩ ខែឧសភា ឆ្នាំ២០២៥ ក្លិបបាល់ទាត់វិសាខា ក្រោមការដឹកនាំរបស់លោក Gérard Jones បានប្រកាសនាំចូលកីឡាករ Loïc Chan កូនកាត់ខ្មែរ-បារាំង ត្រៀមសម្រាប់លីគកំពូលកម្ពុជា Cambodian Premier League រដូវកាល ២០២៥-២៦។
កីឡាករ Loïc Chan កូនកាត់ខ្មែរ-បារាំង បច្ចុប្បន្នរូបគេមានវ័យ ២០ឆ្នាំ គឺជាកូនប្រុសរបស់លោក Maurice Chan មានសញ្ជាតិខ្មែរ-បារាំង គឺជាតារាសម្ដែង Stunt (តួជំនួស) មួយរូបនៅ Hollywood ដែលធ្លាប់សម្ដែងជាមួយតារាល្បីៗជាច្រើន និងម្តាយជាជនជាតិបារាំង។
Loïc Chan គឺជាថ្នាលយុវជនរបស់ក្លិប Balmas SC ដែលមានទីតាំងនៅជិតទីក្រុង Toulouse ភាគខាងត្បូងប្រទេសបារាំង និងថ្នាលយុវជនរបស់ក្លិប RCD Mallorca នៅប្រទេសអេស្ប៉ាញ។
រូបគេក៏ធ្លាប់បានចូលរួមជាមួយក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ ម្តងកាលពីឆ្នាំ២០២៣ ក្រោមការដឹកនាំរបស់លោក Felix Dalmas ប៉ុន្តែមិនបានធ្វើដំណើរទៅប្រកួត AFF U23 Championship នៅប្រទេសថៃ ជាមួយក្រុមនោះទេពោលគឺបានត្រឹមហ្វឹកហាត់ប៉ុណ្ណោះ៕
