ក្លិបបាល់ទាត់ព្រះខ័នរាជស្វាយរៀង ក្រោមការដឹកនាំរបស់លោក Pep Muñoz បានក្លាយជាម្ចាស់ជើងឯកនៃលីគកំពូលកម្ពុជា (Cambodian Premier League) រដូវកាល ២០២៤-២៥។
ក្រោយបញ្ចប់ពេញ ១រដូវកាលឆ្នាំ២០២៤-២៥ មកដឹងពីសមទ្ធិផលរបស់កីឡាករវ័យចំណាស់ទាំង ៧នាក់នៅ CPL រដូវកាលនេះ៖
- កាំង សេន របស់ អាយអេសអាយ ដង្កោសែនជ័យ មានវ័យ ៤១ឆ្នាំ បង្ហាញខ្លួនបាន ២០៨នាទី រកបាន ១គ្រាប់ កាតលឿង១សន្លឹក
លោក កាំង សេន ជាប្រធានក្លិបបាល់ទាត់ ISI ដង្កោសែនជ័យ លោកកើតនៅខែកុម្ភៈ ឆ្នាំ១៩៨៤ ដោយក៏បន្តចុះឈ្មោះជាកីឡាករទៀតនៅរដូវកាលថ្មី ពោលគឺបន្តពាក់អាវលេខ៩ តួរនាទីជាខ្សែប្រយុទ្ធដដែល។ លោកបានចុះឈ្មោះជាកីឡាករតាំងពីក្លិបលោកចូលលេងក្នុងពានរង្វាន់លីគទី២ រហូតដល់មានឈ្មោះជាសមាជិកលីគកំពូលក្នុងឆ្នាំទី២នេះផងដែរ។
- គួច សុកុម្ភះ របស់ណាហ្គាវើលដ៍ មានវ័យ ៣៨ឆ្នាំ បង្ហាញខ្លួនបាន ១៣៣២នាទី ទទួលបានកាតលឿង១សន្លឹក
កីឡាករ គួច សុកុម្ភៈ ម្ចាស់អាវលេខ១០ នៅក្លិបណាហ្គាវើលដ៍ កើតនៅខែកុម្ភៈ ឆ្នាំ១៩៨៧។ រូបគេជាប្រធានក្រុម និងជាកីឡាករឆ្នើមមួយរូបនេះពេលបច្ចុប្បន្ន បើទោះជាមានវ័យច្រើនក្ដី ខណៈកីឡាករអាយុប្អូនៗមួយចំនួន បានប្រកាសព្យួរស្បែកជើងបណ្តើរៗហើយ។ កីឡាករមកពីខេត្តកំពង់ធំ រូបនេះលេងក្នុងទម្រង់ជាខ្សែបម្រើ ស្របពេលនេះជាឆ្នាំទី១៥ ហើយដែលរូបគេបន្តអាជីពនៅលីគកំពូលកម្ពុជា។ កាលពីរដូវកាលមុន រូបគេបង្ហាញខ្លួនគ្រប់ការប្រកួតនៅ CPL ដែលមាន២៣៧៨នាទី។
- KOHEI KATO សញ្ជាតិជប៉ុន របស់គិរីវង់សុខសែនជ័យ មានវ័យ ៣៥ឆ្នាំ បង្ហាញខ្លួនបាន ៩០៧នាទី មានវ័យ៣៥ឆ្នាំ កាតលឿង៤សន្លឹក Assists បាន ២លើក ឈ្នះ MVP បាន ១លើក (ចូលជើងទី២)
KOHEI KATO សញ្ជាតិជប៉ុន ដែលបានមកចូលរួមមជាមួយគិរីវង់សុខសែនជ័យ នៅលីគកំពូលកម្ពុជា នារដូវកាលឆ្នាំ២០២៤-២៥នេះ នៅជើងទី២។ កីឡាករដែលដុះចេញបីថ្នាលយុវជនក្លិប Sacachispas របស់អាហ្សង់ទីនរូបនេះ មានបទពិសោធន៍ជាង ១០ឆ្នាំនៅក្នុងអាជីពបាល់ទាត់ ធ្លាប់ប្រឡូកក្នុងក្លិបជាង ១០នៅជប៉ុន និងតំបន់អ៉ឺរ៉ុប។
- TACHIBANA YUSUKE សញ្ជាតិជប៉ុន របស់បឹងកេត មានវ័យ ៣៤ឆ្នាំ បង្ហាញខ្លួនបាន ១១៤០នាទី មានវ័យ ៣៤ឆ្នាំ រកបាន ៣គ្រាប់ ទទួលបានកាតលឿង ១សន្លឹក (ចូលជើងទី២)
ខ្សែបម្រើជនជាតិជប៉ុន TACHIBANA YUSUKE បានមកប្រកបអាជីពនៅប្រទេសកម្ពុជា ឆ្នាំទី២ហើយ ម្ចាស់អាវលេខ២២ រូបនេះកើតនៅខែកញ្ញា ឆ្នាំ១៩៩០។ ទោះជាបានចូលរួមក្នុង CPL ជើងទី២ក្ដី ប៉ុន្តែរូបគេបង្ហាញខ្លួនលើទីលានបាន ១១៤០នាទីផងដែរ។
- គួច ដានី របស់ព្រះខ័នរាជស្វាយរៀង មានវ័យ ៣៤ឆ្នាំ បង្ហាញខ្លួនបាន ១៣២៧នាទី កាតលឿង ១សន្លឹក Assist បាន ១លើក ឈ្នះ MVP បាន ១លើក
គួច ដានី ជាខ្សែបម្រើឆ្នើមមួយរូប ដោយបច្ចុប្បន្នរូបគេរួមរស់ជាមួយក្លិបម្ចាស់ជើងឯកឆ្នាំចាស់ ព្រះខ័នរាជស្វាយរៀង ខណៈគេកើតនៅខែតុលា ឆ្នាំ១៩៩០។ ដានី ជាកីឡាករម្នាក់ក្នុងចំណោម២នាក់ជាកេរ្តិ៍ដំណែលរបស់ព្រឹទ្ធាចារ្យ ប៉ែន ផាត ដែលដឹកនាំក្រុមកូនខ្មែរនៅអឺរ៉ុប មកប្រកួតមិត្តភាពនៅរាជធានីភ្នំពេញ អំឡុងឆ្នាំ២០១២ ពោលគឺជាមួយ ធារី ចន្ថាប៊ីន ស្របពេលដែល កុក បូរីស និង ប៉ែន ស្ថេហ្វេន បានបាត់មុខពីពិភពបាល់ទាត់ទៅហើយ។
- ឡេង មករា របស់ណាហ្គាវើលដ៍ មាន ៣៤ឆ្នាំ បង្ហាញខ្លួនបាន ១២៦នាទី ទទួលបានកាតលឿង ១សន្លឹក
ខ្សែបម្រើស្លាប ឡេង មករា កើតនៅខែ វិច្ឆិកា ឆ្នាំ១៩៩០ ដោយរូបគេប្រកបអាជីពលើស១០ឆ្នាំហើយ នៅលីគកំពូលកម្ពុជា តែធ្លាប់ជាសមាជិកក្លិបតែ២ប៉ុណ្ណោះ ពោលគឺចូលរួមជាមួយភ្នំពេញក្រោន ពីឆ្នាំ២០១២ ដល់២០១៦ ខណៈឆ្នាំ២០១៧ ដល់បច្ចុប្បន្ន រូបគេចូលរួមក្នុងក្រុមណាហ្គាវើលដ៍។ ម្ចាស់អាវលេខ២៥រូបនេះ ធ្លាប់មានកំណត់ត្រាឈ្នះជើងឯកលីគកំពូលកម្ពុជា ២សម័យកាលផង គ្រាជាសមាជិករបស់ភ្នំពេញក្រោន។
- សាន ឧសភា របស់ណាហ្គាវើលដ៍ មានវ័យ ៣៤ឆ្នាំ បង្ហាញខ្លួនបាន ២២៤នាទី
អ្នកចាំទី សាន ឧសភា កើតនៅខែមីនា ឆ្នាំ១៩៩១ ដោយបច្ចុប្បន្នជាម្ចាស់អាវលេខ២២នៅក្លិបណាហ្គាវើលដ៍។ កីឡាកររូបនេះបានចូលរួមជាមួយណាហ្គាវើលដ៍ តាំងពីឆ្នាំ២០១៨ ម៉្លេះ ក្រោយចាកចេញពីក្លិបវេស្ទើនភ្នំពេញ នៅគ្រានោះ។ យ៉ាងណាក្ដីរូបគេនៅតែតួរសំខាន់ក្នុងក្រុមបើទោះជាកាលស្ថិតក្នុងដំណាក់កាលយុគ្គមាសរបស់អ្នកចាំទី ស៊ូ យ៉ាទី ក៏ដោយក្ដី៕
