ក្រុមបាល់ទះ Jakarta Bhayangkara Presisi របស់ប្រទេសឥណ្ឌូនេស៊ី នឹងទៅចូលរួមប្រកួតព្រឹត្តិការណ៍ពិភពលោក 2025 World Police & Fire Games ដែលនឹងធ្វើឡើងនៅទីក្រុម Birmingham ទឹកដីនៃសហរដ្ឋអាមេរិក។
ក្រុមបាល់ទះ Jakarta Bhayangkara Presisi របស់ប្រទេសឥណ្ឌូនេស៊ី បានក្លាយជាម្ចាស់ជើងឯក នៃការប្រកួតលីគបាល់ទះProliga របស់ប្រទេសឥណ្ឌូនេស៊ី បន្ទាប់ពីយកឈ្នះ ក្រុមបាល់ទះ Jakarta LavAni Allo Bank Electric នៅវគ្គផ្តាច់ព្រ័ត្រ ៣-២ (១៩-២៥, ២៣-២៥, ២៥-២២, ២៥-២២, ១៥-៩) ដែលជាការសងសឹកបានសម្រេច ដោយកាលពីរដូវកាលមុន ក្រុមនេះបានរបូតពានក្រោមថ្វីដៃរបស់ Jakarta LavAni។
ព្រឹត្តិការណ៍ពិភពលោក World Police & Fire Games បង្កើតឡើងដំបូងនៅឆ្នាំ១៩៨៥ ធ្វើឡើងរៀងរាល់ ២ឆ្នាំម្ដង ស្របពេលឆ្នាំ២០២៥នេះ នឹងធ្វើឡើងនៅទឹកដីសហរដ្ឋអាមេរិក គឺជាលើកទី២១ ដែលបានរៀបចំឡើង ដែលគ្រោងចាប់ផ្ដើមនៅថ្ងៃទី២៧ ខែមិថុនា និងបញ្ចប់នៅថ្ងៃទី៦ ខែកក្កដា ឆ្នាំ២០២៥។
ក្នុងការប្រកួតព្រឹត្តិការណ៍ពិភពលោក World Police & Fire Games ឆ្នាំ២០២៣ នៅនាទីក្រុង Winnipeg ប្រទេសកាណាដា ក្រុមបាល់ទះគរបាលជាតិកម្ពុជា ទទួលបានមេដាយមាស ក្រោយយកឈ្នះលើក្រុមបាល់ទះប្រេស៊ីល CBMDF ក្នុងលទ្ធផល ៣សិតទល់នឹង០ នៅវគ្គផ្តាច់ព្រ័ត្រ។
សម្រាប់ក្រុមកីឡានគរបាលជាតិកម្ពុជា ធ្លាប់បានចូលរួមប្រកួតព្រឹត្តិការណ៍ពិភពលោក World Police & Fire Games បានចំនួន ៤លើកហើយ ដោយកាលពីឆ្នាំ២០១៩ ធ្វើឡើងនៅប្រទេសចិន កន្លងទៅ កម្ពុជាដណ្តើមបានមេដាយសរុបចំនួន ៤៦គ្រឿង ក្នុងនោះ មាសចំនួន ១៨គ្រឿង ប្រាក់ចំនួន ១៧គ្រឿង និងសំរិទ្ធចំនួន ១១គ្រឿង។
រីឯឆ្នាំ២០២២ កន្លងទៅ ដែលប្រទេសហូឡង់ ទទួលរៀបចំធ្វើចាម្ចាស់ផ្ទះ សម្រាប់ក្រុមនគបាលកម្ពុជា ដណ្តើមបានមេដាយសរុបចំនួន ៣៣គ្រឿង ក្នុងនោះមានមេដាយមាសចំនួន ១៥គ្រឿង ប្រាក់ចំនួន ៨គ្រឿង និងសំរិទ្ធចំនួន ១០គ្រឿង។
ខណ:ឆ្នាំ២០២៣ នៅក្នុងក្រុងវីនីផេក ប្រទេសកាណាដា ក្រុមនគបាលកម្ពុជា ដណ្តើមបានមេដាយសរុបចំនួន ៦២គ្រឿង ក្នុងនោះ មាសចំនួន ២៨គ្រឿង ប្រាក់ចំនួន ២៦គ្រឿង និងសំរិទ្ធចំនួន ៨គ្រឿង ក្នុងចំណោមកីឡាករប៉ូលីស មកពី ៧០ ប្រទេស ជុំវិញពិភពលោក៕
