អាជ្ញាធរកម្ពុជា នៅតាមបណ្ដាខេត្តជាប់ព្រំដែនថៃបានអះអាងថា ស្ថានការណ៍នៅតាមច្រកព្រំដែននាពេលបច្ចុប្បន្នមានសភាពប្រក្រតី ប្រជាជនចេញចូលបានតាមធម្មតា និងមានទំនាក់ទំនងល្អ។ ចំពោះដំណឹងដែលអាជ្ញាធរថៃរៀបចំបិទ និងរឹតបន្តឹងច្រកព្រំដែន គឺពុំទាន់ទទួលបាននៅឡើយទេ។
ដោយឡែក កងទ័ពកម្ពុជា-ថៃ នៅតាមបណ្ដោយព្រំដែន ក៏បានបញ្ជាក់ថា ពុំមានភាពតានតឹងដាក់គ្នានោះដែរ។ ជាក់ស្ដែងកងពលតូចថ្មើរជើង លេខ៤២ បានបង្ហោះលើទំព័រហ្វេសបុកផ្លូវការរបស់ខ្លួន បង្ហាញឱ្យឃើញថា កងទ័ពទាំងសងខាង (កម្ពុជា ថៃ) ដែលកំពុងប្រចាំការ នៅលើប្រាសាទតាមន្តធំមានទំនាក់ទំនងគ្នាល្អ ដើម្បីធ្វើយ៉ាងណារក្សាឱ្យបានព្រំដែនសន្តិភាព ភាតរភាពរវាងប្រទេសទាំងពីរ។
ការអះអាងពីសំណាក់អាជ្ញាធរខេត្តជាប់ព្រំដែនថៃ និងកងទ័ពជួមុខនេះ ធ្វើឡើងអំឡុងពេល កាសែតថៃខាវសុទ្ធ នាថ្ងៃទី ៣១ ឧសភានេះ បានចុះផ្សាយថា រដ្ឋាភិបាលថៃត្រៀមរៀបចំប្រកាសបិទច្រកព្រំដែនអន្តរជាតិចំនួន៦ និងប៉ុស្តិ៍ត្រួតពិនិត្របណ្ដោះអាសន្នចំនួន ១០ ។ កាសែតថៃមួយនេះបន្តថា ការធ្វើបែបនេះ គឺដើម្បីឆ្លើយតបនឹងចលនាជាតិនិយម ធ្វើពហិការមិនប្រើផលិតផលថៃ។
កាសែតនេះបានលើកឡើងដោយសំអាងលើប្រភពពីភ្នាក់ងារសន្តិសុខថៃថា ដោយព្រួយបារម្ភពីសុវត្ថិភាពប្រជាជនខ្លួន ដែលឆ្លងចេញចូលធ្វើពាណិជ្ជកម្មនៅតាមព្រំដែនជាមួយកម្ពុជា អាជ្ញាធរថៃបានកោះប្រជុំដើម្បីរៀបចំប្រកាសបិទច្រកព្រំដែនអន្តរជាតិកម្ពុជា-ថៃ ចំនួន៦ និងប៉ុស្តិ៍ត្រួតពិនិត្យ ១០ ។
នៅប៉ុន្មានម៉ោងក្រោយ កាសែតថៃដដែល បានស្រង់ការបញ្ជាក់ពីឧត្ដមសេនីយ៍ទោ វីនថៃ ស៊ុវ៉ារី ថាការប្រកាសបិទព្រំដែនរវាងប្រទេស និងប្រទេស ធ្វើឡើងតែក្នុងលក្ខខណ្ឌគ្រោះថ្នាក់ធ្ងន់ធ្ងរប៉ុណ្ណោះ ដូចជាការប៉ះទង្គិចគ្នាដោយអាវុធធ្ងន់ជាដើម។ ហើយព័ត៌មានពីការបិទច្រកព្រំដែនកម្ពុជា-ថៃនេះ វាគ្រាន់តែជាផែនការទូទៅដែលត្រូវអនុវត្តនៅពេលចាំបាច់ប៉ុណ្ណោះ។ មេទាហានថៃបញ្ជាក់ថាស្ថានភាពពេលនេះ គឺល្អប្រសើរ មិនមានលក្ខខណ្ឌណាមួយដែលត្រូវបិទច្រកព្រំដែននោះទេ។
យ៉ាងណាក៏ដោយការចុះផ្សាយ រហ័សហួសហេតុ បានធ្វើឲ្យកើតមានពាក្យចចាមអារ៉ាម និងការភាន់ច្រឡំដល់ប្រជាជនប្រទេសទាំងមួយរយៈពេល ទម្រាំតែមានការបញ្ជាក់ច្បាស់លាស់ពីអាជ្ញាធរមានសមត្ថកិច្ច៕
អត្ថបទ៖ ឈិន ធារ៉ាត់
