ព្រឹត្តិការណ៍ប្រកួតកីលាបាល់ទាត់ពានរង្វាន់ Soccer League លើកទី៨ ឆ្នាំ២០២៥ បានប្រារព្ធពិធីបើកជាផ្លូវការកាលពីល្ងាចថ្ងៃទី៣១ ឧសភា ក្រោមមូលបទ «ស្មារតីកីឡាដើម្បីយុវជនសង្គមយើង» នៅពហុកីឡដ្ឋានជាតិអូឡាំពិក។
ក្នុងពិធីបើកការប្រកួតបាល់ទាត់ពានរង្វាន់ SOCCER LEAGUE លើកទី៨ ឆ្នាំ ២០២៥ មានការអញ្ជើញជាអធិបតី ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា រួមមាន ឯកឧត្តមអភិសន្តិបណ្ឌិត ស សុខា អនុប្រធានសហភាពសហព័ន្ធយុវជនកម្ពជា និងជាប្រធានគណ:កម្មការ SOCCER LEAGUE ឯកឧត្តម ខៀវ ភារិទ្ធ ប្រធានគណៈកម្មការប្រតិបត្តិSOCCER LEAGUE ឯកឧត្តម លោកជំទាវថ្នាក់ដឹកនាំ ស.ស.យ.ក. ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន ក្រុមហ៊ុនឯកជន ភ្ញៀវកិត្តិយស រួមទាំងសមាជិក សមាជិកា ស.ស.យ.ក. អាជ្ញាកណ្តាល កីឡាករ កីឡាការិនី សិល្បៈករ សិល្បៈការិនី យ៉ាងច្រើនកុះករ។ កម្មវិធីនេះក៏មានការហែក្បួនព្យុហយាត្រា ការសម្តែងសិល្បៈ ចម្រៀងពីសំណាក់សិល្បៈករ សិល្បៈការិនីផងដែរ។
ឯកឧត្តម ខៀវ ភារិទ្ធ ប្រធានគណៈកម្មការប្រតិបត្តិ ជាតំណាង ឯកឧត្តមអភិសន្តិបណ្ឌិត ស សុខា បានសម្តែងនូវសេចក្តីសោមនស្សរីករាយ និងស្វាគមន៍យ៉ាងកក់ក្តៅចំពោះវត្តមានឯកឧត្តមអធិបតី និងអ្នកចូលរួមទាំងអស់ដែលបានចំណាយពេលវេលាមកចូលរួមក្នុងកម្មវិធីនាឱកាសនេះ។
ជាមួយគ្នានេះ ឯកឧត្តមបានបញ្ជាក់ផងដែលថាSOCCER LEAGUE បានចូលរួមចំណែកយ៉ាងសកម្ម ជាមួយរដ្ឋាភិបាល ក៏ដូចជាក្រសួងអប់រំយុវជន និងកីឡា ក្នុងការបំផុសស្មារតីសាមគ្គីភាព ជាពិសេសក្នុងការបង្កើតធនធានមនុស្ស ក្នុងវិស័យកីឡាបាល់ទាត់នៅកម្ពុជាឱ្យកាន់តែរីកចម្រើន និងរឹងមាំពីមួយឆ្នាំទៅមួយឆ្នាំ ដោយមិនរើសអើងពណ៌សម្បុរ សាសនា ឋានៈ បុណ្យស័ក្តិ និងនិន្នាការនយោបាយឡើយ ព្រមទាំងជាវេទិកា ផ្តល់ឱកាសដល់យុវជនមកពីគ្រប់ទិសទីបណ្តារាជធានី-ខេត្ត មានឱកាសក្នុងការបញ្ចេញសម្ថភាពដោយស្មើភាពគ្នា នៅលើទីលានវាលស្មៅដោយផ្ទាល់ ប្រកបដោយតម្លាភាពផងដែរ។
ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សរីករាយ ដែលបានចូលរួមក្នុងការប្រកួតកីឡាបាល់ទាត់ពានរង្វាន់ SOCCER LEAGUE លើកទី៨ ឆ្នាំ២០២៥ ក្រោមមូលបទ «ស្មារតីកីឡាដើម្បីយុវជនសង្គមយើង»។ ជាមួយគ្នានេះ ឯកឧត្តមក៏បានកោតសរសើរ និងវាយតម្លៃខ្ពស់ចំពោះគណៈកម្មការរៀបចំការប្រកួត ដោយឯកឧត្តមបានគូសបញ្ជាក់ផងដែរថា ការប្រកួតកីឡាបាល់ទាត់ពានរង្វាន់នេះមានគោលបំណងបង្កើនឱកាសថ្មីៗឱ្យយុវជនដែលមកពីអង្គភាព-ស្ថាប័នផ្សេងៗគ្នា ដើម្បីចូលរួម បង្កើត និងបង្កើនទំនាក់ទំនងចំណងមិត្តភាព សាមគ្គីភាព ក្នុងបរិយាកាសស្និទ្ធស្នាល រួមគ្នាជាចំណែកដើម្បីអភិវឌ្ឍប្រទេសជាតិ។
ជាកិច្ចបញ្ចប់ ឯកឧត្តមបានសំណូមពរឱ្យក្រុមកីឡាករទាំងអស់ចូលរួមប្រកួតប្រជែងក្រោមស្មារតីសាមគ្គីភាព មិត្តភាព និងប្រកាន់ខ្ជាប់ក្រមសីលធម៌កីឡា។ ឯកឧត្តមក៏ជូនពរឲ្យការប្រកួតប្រព្រឹត្តទៅដោយរលូន និងទទួលបានជោគជ័យយ៉ាងត្រចះត្រចង់ផងដែរ។
ការប្រកួតបាល់ទាត់ Soccer League មានក្រុមចូលរួមប្រកួតសរុបចំនួន ៦៣ក្រុម ក្នុងនោះ ក្រុមបុរសមានចំនួន ៥៦ក្រុម បែងចែកជា១៦ពូល ដោយ ពូល A ដល់ពូល H មានចំនួន ៤ក្រុម ខណៈពូល I ដល់ពូល P មានចំនួន ៣ក្រុម ។ និងក្រុមនារីមានចំនួន ៧ក្រុម ចែកចេញជា ២ពូល ក្នុងនោះមាន A មាន ៤ក្រុម និងពូល B មាន ៣ក្រុម។
ពានរង្វាន់ Soccer League លើកទី៨ ឆ្នាំ២០២៥ (ផ្នែកបុរស)
ពានរង្វាន់ Soccer League លើកទី៨ ឆ្នាំ២០២៥ (ផ្នែកនារី)
សម្រាប់រដូវកាលនេះ ព្រឹត្តិការណ៍ Soccer League បានពង្រីកការចូលរួម ដោយបន្ថែមនូវវិញ្ញាសាបាល់ទាត់នារីជាលើកទី៣ ក្នុងគោលបំណងលើកជំរុញចិត្ត និងលើកកម្ពស់សមត្ថភាពកីឡាការិនី ក្នុងការចូលរួមសកម្មភាពកីឡា។
ប្រវត្តិនៃការប្រកួតកីឡាបាល់ទាត់ពាន់រង្វាន់ Soccer League៖
- លើកទី១ ឆ្នាំ២០១២ មាន២០ក្រុមចូលរួម ជ័យលាផីជើងឯក បានលើកក្រុម សមាគមយុវជន ក១២
- លើកទី២ ឆ្នាំ២០១៣ មាន៤០ក្រុមចូលរួម ជ័យលាភីជើងឯក បានទៅលើកក្រុម ស.ស.យ.ក ព្រៃវែង
- លើកទី៣ ឆ្នាំ២០១៥ មាន៤៧ក្រុមចូលរួម ជ័យលាភីជើងឯក បានទៅលើកក្រុម ណាចក្របៃតង
- លើកទី៤ ឆ្នាំ២០១៦ មាន៦០ក្រុមចូលរួម ជ័យលាភីជើងឯក បានទៅលើកក្រុម ពោធិ៍សែនជ័យ
- លើកទី៥ ឆ្នាំ២០១៩ មាន៧២ក្រុមចូលរួម ជ័យលាភីជើងឯក បានទៅលើកក្រុម យុវជនសូភីណា
- លើកទី៦៖ឆ្នាំ២០២៣ មាន ៧៤ក្រុមចូលរួម (ស្រី ១០ក្រុម) ក្រុមបាល់ទាត់ស.ស.យ.ក. ខេត្តកណ្ដាល (បុរស) ក្រុមសុភីណាអេហ្វស៊ី (នារី)
- លើកទី៧៖ ឆ្នាំ ២០២៤ មាន ៦១ក្រុមចូលរួម (ស្រី ១៣ក្រុម) ជ័យលាភីជើងឯក បានទៅលើកក្រុម Khmer United FC (បុរស) ក្លិបបាល់ទាត់ភ្នំពេញក្រោន (នារី)៕
