កាលពីថ្ងៃសៅរ៍ សប្ដាហ៍មុន លោក ប៊ុន ស៊ឺនផាតក្លាង បានចុះទៅសួរសុខទុក្ខ ផ្ដល់គ្រឿងឧបភោគបរិភោគ និងលើកទឹកចិត្តដល់កងពលតូចថ្មើរជើងលេខ ២១ ឈរជើងនៅចំណុចប្រាសាទតាមាន់ធំ។ នេះបើយោងតាមការចេញផ្សាយដោយសារព័ត៌មាន The Nation Thailand នាថ្ងៃទី១ ខែមិថុនា ឆ្នាំ២០២៥។
លោក ផាតក្លាង បានបញ្ជាក់ថា កងទ័ពថៃធ្វើសកម្មភាពត្រឹមត្រូវ និងបានជំរុញឱ្យកងទ័ពមានការប្រុងប្រយ័ត្នខ្ពស់ ដោយសង្កត់ធ្ងន់ថា មេបញ្ជាការគ្រប់លំដាប់ថ្នាក់ បន្ដគាំទ្រកងកម្លាំង។
កាលពីថ្ងៃអាទិត្យ រដ្ឋមន្ត្រីក្រសួងការពារជាតិ លោក Phumtham Wechayachai បញ្ជាក់ជាថ្មី អំពីការប្តេជ្ញាចិត្តរបស់ប្រទេសថៃ ចំពោះការមិនប្រឈមមុខដាក់គ្នា ក្នុងការដោះស្រាយបញ្ហារវាងកងទ័ពថៃ និងកម្ពុជា។
លោក Phumtham បានកត់សម្គាល់ថា ពេលនេះស្ថានការណ៍បានធូរស្រាលហើយ ដោយភាគីទាំងសងខាងបានប្ដេជ្ញាចិត្តជៀសវាងការប្រឈមមុខដាក់គ្នា ដោយកំពុងរង់ចាំកិច្ចពិភាក្សាដោយគណៈកម្មាធិការព្រំដែនរួម (JBC) ដែលបានរៀបចំកិច្ចប្រជុំរួចហើយ។ លោករំពឹងថា កិច្ចពិភាក្សារបស់គណៈកម្មាធិការអាចនឹងធ្វើឡើងក្នុងសប្ដាហ៍ខាងមុខ។ លោកបានបញ្ជាក់ថា អាជ្ញាធរថៃ បានពិភាក្សាគ្នារួចហើយនៅថ្ងៃនេះ ដោយមានប្រធានកងកម្លាំងការពារជាតិគ្រោងនឹងចូលរួមក្នុងកិច្ចពិភាក្សា។ ការសម្របសម្រួលជាមួយក្រសួងការបរទេស កងទ័ពភូមិន្ទថៃ និងកងយោធពលខេមរភូមិន្ទនៅតែបន្ត។
រដ្ឋមន្រ្តីក្រសួងការពារជាតិរូបនេះ បានបញ្ជាក់ថា «មិនមានហេតុផលណាមួយគួរឱ្យព្រួយបារម្ភទេ។ ថៃនៅតែប្ដេជ្ញាចិត្តចំពោះគោលការណ៍មិនប្រឈមមុខដាក់គ្នា ដោយខិតខំរកដំណោះស្រាយដោយសន្ដិវិធីក្នុងស្មារតីនៃទំនាក់ទំនងអ្នកជិតខាងគ្នា»។
សូមជម្រាបថា ភាពតានតឹងរវាងប្រទេសទាំង២ បានកើនឡើងបន្ទាប់ពីមានការប៉ះទង្គិចគ្នារវាងទាហានថៃ និងទាហានកម្ពុជា នៅជិតតំបន់ Chong Bok ខេត្ត Ubon Ratchathani កាលពីថ្ងៃទី២៨ ខែឧសភា បណ្ដាលឲ្យទាហានខ្មែរម្នាក់ស្លាប់៕
