វ៉ាស៊ីនតោន៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានគំរាមផ្ដាច់កុងត្រារបស់រដ្ឋាភិបាលអាមេរិកជាមួយបណ្ដាក្រុមហ៊ុនរបស់លោក Elon Musk នៅពេលដែលសម្ព័ន្ធភាពរបស់ពួកគេបានឈានដល់ផ្លូវបំបែកកាលពីថ្ងៃព្រហស្បតិ៍ សប្ដាហ៍នេះ។ នេះបើយោងតាមការចេញផ្សាយដោយទីភ្នាក់ងារព័ត៌មាន Republic World នាថ្ងៃសុក្រ ទី៦ ខែមិថុនា ឆ្នាំ២០២៥។
ទំនាក់ទំនងផ្អែមល្ហែមរបស់ប្រធានាធិបតីអាមេរិក និងមហាសេដ្ឋីស្ថាបនិកក្រុមហ៊ុន Tesla បានប្រេះឆា ក្លាយទៅជាជម្លោះដ៏ក្ដៅគគុកនៅលើបណ្ដាញទំនាក់ទំនងសង្គម ក្រោយពីលោក ដូណាល់ ត្រាំ បានរិះគន់ លោក Elon Musk នៅឯការិយាល័យរាងពងក្រពើនៃសេតវិមាន។ ខណៈលោក Elon Musk បានថ្កោលទោសគោលនយោបាយពន្ធ និងផែនការចំណាយរបស់លោក ត្រាំ ប្រហែលជាចាញ់ការបោះឆ្នោតបាត់ទៅហើយ ប្រសិនបើគ្មានការគាំទ្រពីរូបលោកនោះ។
លោក ត្រាំ បានសរសេរនៅលើបណ្តាញទំនាក់ទំនងសង្គម Truth Social របស់ថា «មធ្យោបាយងាយស្រួលបំផុតក្នុងការសន្សំប្រាក់នៅក្នុងថវិការាប់ពាន់លានដុល្លារបស់យើង គឺដើម្បីបញ្ចប់ការឧបត្ថម្ភធន និងផ្ដាច់កិច្ចព្រមព្រៀងរបស់រដ្ឋាភិបាលជាមួយបណ្ដាក្រុមហ៊ុនរបស់ លោក Elon។ ខ្ញុំតែងតែភ្ញាក់ផ្អើលនៅពេលដែល លោក បៃដិន មិនបានធ្វើវា!»
នៅពេលដែលលោកប្រធានាធិបតីលោក ដូណាល់ ត្រាំ អង្គុយនៅក្នុងការិយាល័យរាងពងក្រពើកាលពីថ្ងៃព្រហស្បតិ៍ ជាមួយមេដឹកនាំរបស់ប្រទេសអាល្លឺម៉ង់ លោកបានសោកស្ដាយចំពោះទំនាក់ទំនងដ៏ជូរចត់ជាមួយលោក Elon Musk។ លោក ត្រាំ បាននិយាយថា លោកមានការខកចិត្តយ៉ាងខ្លាំងចំពោះលោក Musk បន្ទាប់ពីមហាសេដ្ឋីដែលជាអតីតអ្នកគាំទ្ររូបនេះ បានរិះគន់លើគម្រោងកាត់បន្ថយពន្ធ និងផែនការចំណាយដែលចុះហត្ថលេខារបស់លោកប្រធានាធិបតី។
ដោយឡែក លោក Elon Musk បានបង្ហោះសារដៀមដាមលោក ត្រាំ នៅលើបណ្ដាញទំនងសង្គម X ថា «បើគ្មានខ្ញុំ, ត្រាំនឹងចាញ់ការបោះឆ្នោត»។
កាលពីកន្លងទៅ ទំហំនៃការគាំទ្ររបស់លោក Musk ចំពោះលោក ត្រាំ ដោយចំណាយទឹកប្រាក់យ៉ាងហោចណាស់ ២៥០លានដុល្លារសម្រាប់គាំទ្រយុទ្ធនាការបោះឆ្នោតរបស់លោក ត្រាំ ក្រោយមកបានមកជួយគ្រប់គ្រងអង្គភាពប្រសិទ្ធភាពរដ្ឋាភិបាល (DOGE) ដើម្បីជួយស្វែងរកការកាត់បន្ថយចំណាយខ្ជះខ្ជាយរបស់រដ្ឋាភិបាលរយៈពេលខ្លី៕
