អន្តរជាតិ៖ បើតាមការដកស្រង់ចេញពីវីដេអូព័ត៌មានរបស់សារព័ត៌មានថៃ NationWeekend បានផ្សាយនៅថ្ងៃទី ៧ ខែមិថុនា ឆ្នាំ ២០២៥ថា លោក សេរ៊ីភិស៊ុត តៈមៀវេទ (เสรีพิศุทธ์ เตมียเวส) អតីតអគ្គស្នងការនគលបាលជាតិថៃបាននិយាយឡើងកាលពីពេលថ្មីៗនេះថា ពេលនេះខ្មែរមករុនរានយើងរឿយៗ រួចយើងត្រូវឯកភាពចរចានេះ ចរចានោះ និយាយជាមួយអាក្មេងទំនើងមិនយល់សាច់ការអី មានតែផ្លូវម្យាងគត់គឺ យើងត្រូវប្រដែប្រដៅវា។
បុរសវ័យ ៧៦ ឆ្នាំរូបនេះបន្តថា ម្សិលមិញខ្ញុំបានបង្ហោះសារឡើងថា មិនចាំបាច់និយាយជាមួយខ្មែរ គោលដៅគឺរឹបអូសយកភ្នំពេញតែម្ដងទៅ។ ដូច្នោះហើយនៅក្នុងថ្ងៃនេះខ្ញុំលើកឡើងទៀត មិនបាច់និយាយជាមួយខ្មែរទេ រឹបអូសយកភ្នំពេញតែម្ដងទៅ អ្នកខ្លះយល់ អ្នកខ្លះមិនយល់ ប៉ុន្តែអ្នកយល់ច្រើនណាស់ គាំទ្រច្រើន សម្រាប់មនុស្សមិនយល់គិតថា អាកញ្ចាស់នេះឆ្កួតទៀតហើយ ថាខ្ញុំចាស់ថាខ្ញុំឆ្កួតទៀតហ្មង។
អតីតអគ្គស្នងការនគលបាលជាតិថៃនេះបញ្ជាក់ទៀតថា គឺវាមិនទាក់ទងទេ គោលដៅគឺត្រូវរឹបអូសយកភ្នំពេញ ពោលមានន័យថា នៅថ្ងៃនេះបើខ្ញុំជារដ្ឋាភិបាល ខ្ញុំពិនិត្យស្រាវជ្រាវតែម្ដង ប្រវត្តិសាស្ត្រពិភពលោកមានដែលបង្ហាញថា ខ្មែរគឺជាអតីតដែនដីថៃទាំងអស់ មែនអត់? បើយើងស្រាវជ្រាវ ដែនដីត្រង់ណាខ្លះជារបស់ថៃយើងណា ខ្ញុំនឹងយកមកវិញទាំងអស់ មិនបាច់ចរចាឡើយ។
សូមបញ្ជាក់ថា សារព័ត៌មានត្រយងគ្រាន់តែដកស្រង់ការផ្សាយរបស់សារព័ត៌មានថៃ ដោយគ្មានចេតនាញុះញង់ឱ្យមានការរើសអើងជាតិសាសន៍ណាមួយនេះទេ៕
