នគរបាលព្រំដែនស្ថិតនៅក្រោមការគ្រប់គ្រងនិងបញ្ជាផ្ទាល់របស់ក្រសួងមហាផ្ទៃ តាមរយៈអគ្គស្នងការនគរបាលជាតិ បានពង្រាយកម្លាំងឈរជើងនៅតាមបន្ទាត់ព្រំដែនដើម្បីការពារបូរណភាពទឹកដី ស្របតាមច្បាប់ជាតិនិងអន្ដរជាតិ។ ទាក់ទងនឹងបញ្ហាព្រំដែនកម្ពុជានិងថៃ ឧបនាយករដ្ឋមន្រ្តី ស សុខា រដ្ឋមន្រ្តីក្រសួងមហាផ្ទៃបានយកចិត្តទុកដាក់ខ្ពស់លើបញ្ហាព្រំដែនដែលកំពុងក្ដៅគគុក ដោយបានចាត់ចែងថ្នាក់ដឹកនាំអគ្គស្នងការដ្ឋាននគរបាលជាតិ ដើម្បីចុះទៅជួយគាំទ្របន្ថែមលើយោធាការពារព្រំដែនដែលកំពុងឈរជើងការពារនៅក្នុងដែនអធិបតេយ្យរបស់កម្ពុជា។
លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានមានប្រសាសន៍ថា ផ្អែកតាមច្បាប់ក្រសួងមហាផ្ទៃ គឺទទួលបាននូវសម្បទាគ្រប់គ្រាន់នៅក្នុងការគ្រប់គ្រងកងកម្លាំងនគរបាលជាតិទូទាំងប្រទេស ក្នុងនោះក៏មាននគរបាលការពារព្រំដែនទាំងទឹកនិងគោក។ នគរបាលការពារព្រំដែនគោកបានឈរជើងតាំងពីយូរលង់ណាស់មកហើយនៅក្នុងដែនអធិបតេយ្យរបស់ខ្លួនស្របតាមច្បាប់ជាតិនិងអន្ដរជាតិដែលកម្ពុជាជារដ្ឋឯករាជ្យអធិបតេយ្យ។ ដូច្នេះមកដល់ពេលនេះនគរបាលព្រំដែនចំណុះឱ្យក្រសួងមហាផ្ទៃបានបន្ដឈរជើងនៅតាមគោលដៅនៃដែនអធិបតេយ្យស្របច្បាប់កម្ពុជាដោយភាពអង្គអាច ដោយស្មារតីស្នេហាជាតិ និងការទទួលខុសត្រូវដោយមិនមានការផ្លាស់ប្ដូរគោលដៅឬដកថយគោលដៅនៃដែនស្របច្បាប់របស់ខ្លួននោះទេ។ ផ្ទុយទៅវិញមានតែពង្រឹងកម្លាំងដើម្បីការពារបូរណភាពទឹកដីអធិបតេយ្យឯកភាពនៅក្នុងករណីមានការឈ្លានពានណាមួយពីសំណាក់ភាគីណាមួយនោះ។
ទន្ទឹមនឹងការលើកឡើងអំពីតួនាទីរបស់កងកម្លាំងនគរបាលព្រំដែនចំណុះឱ្យក្រសួងមហាផ្ទៃដែលកំពុងបន្ដបេសកកម្មយ៉ាងស្វាហាប់នៅតំបន់ព្រំដែនដើម្បីការពារអធិបតេយ្យជាតិកម្ពុជា លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានលើកឡើងបន្ថែមថា ដើម្បីបង្ហាញពីការយកចិត្តទុកដាក់ ការលើកទឹកចិត្តពីសំណាក់ឧបនាយករដ្ឋមន្រ្តី ស សុខា រដ្ឋមន្រ្តីក្រសួងហាផ្ទៃ បានចាត់ចែងកម្លាំងថ្នាក់ជាតិចុះទៅគាំទ្រដល់កម្លាំងកំពុងឈរជើងនៅតាមបន្ទាត់ព្រំដែន ពោលគឺនគរបាលព្រំដែនគោកចំណុះឲ្យក្រសួងមហាផ្ទៃ ដែលនៅទីនោះកំពុងដឹកនាំដោយឯកឧត្តម នាយឧត្តមសេនីយ៍ ខេង សុមេធ អគ្គស្នងការរងទទួលបន្ទុកការងារព្រំដែន ហើយក្រុមការងារបានចុះទៅប៉ុន្មានថ្ងៃមកហើយ។
កម្លាំងដែលបានចុះទៅព្រំដែនក៏បាននាំយកនូវគ្រឿងឧបភោគបរិភោគ សម្ភារៈប្រើប្រាស់នានាដែលអាចបម្រើឱ្យការពារអធិបតេយ្យជាតិរបស់យើង នៅក្នុងករណីចាំបាច់។ ទន្ទឹមនឹងនេះក៏បានដាក់គោលការណ៍ដល់រដ្ឋបាលស៊ីវិល ពោលគឺរដ្ឋបាលរាជធានីខេត្តដើម្បីជួយឱ្យអស់ពីលទ្ធភាពនៅក្នុងការនាំយកនូវគ្រឿងឧបភោគបរិភោគ និងការសំណេះសំណាលសួរសុខទុក្ខកងកម្លាំងនគរបាលជាតិដែលកំពុងឈរជើងនៅបន្ទាត់ព្រំដែនជាមួយនឹងកងកម្លាំងយោធពលខេមរភូមិន្ទ។
លោកបណ្ឌិត ទូច សុឃៈ បន្ដទៀតថា នៅតាមបណ្ដាស្នងការដ្ឋានដែលជាកម្លាំងអាវុធវិញ ក៏ឧបនាយករដ្ឋមន្រ្តីស សុខា បានណែនាំនិងបញ្ជាឲ្យពង្រឹងដូចគ្នាដែរបើ ទោះបីជាបណ្ដាស្នងការដ្ឋានទាំងអស់នោះមិននៅជាប់ព្រំដែនក៏ត្រូវពង្រឹងកម្លាំងដូចគ្នាដែរដើម្បីបង្ហាញអំពីការត្រៀមលក្ខណៈ នៅក្នុងការគោរពឱ្យបានខ្ជាប់ខ្ជួន នូវការដឹកនាំខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងប្រសាសន៍របស់សម្ដេចតេជោ ហ៊ុន សែន ប្រធានព្រឹទ្ធសភា និងព្រឹទ្ធាចារ្យរបស់កម្ពុជា ដែលបានដឹកនាំ មាគា នយោបាយនៅក្នុងការការពារ អធិបតេយ្យជាតិរបស់យើង ពីការឈ្លានពានពីសំណាក់នូវបច្ចាមិត្ត។
លោកបណ្ឌិត ទូច សុឃៈ មានប្រសាសន៍ទៀតថាកម្លាំងនៅតាមបណ្ដាស្នងការដ្ឋាននគរបាលរាជធានីខេត្តគឺបានត្រៀមលក្ខណៈគ្រប់គ្រាន់ហើយ លោកនឹងចុះទៅនៅតាមបន្ទាត់ព្រំដែនសួរសុខទុក្ខកម្លាំងនគរបាលដែលឈរនៅតាមបន្ទាត់ព្រំដែនដោយនាំយកនូវគ្រឿងឧបភោគបរិភោគនិងសម្ភារៈប្រើប្រាស់ដែល បម្រើឱ្យកិច្ចការងារប្រចាំថ្ងៃ ជូនទៅដល់បងប្អូនដែលជាកងកម្លាំងនគរបាលការពារព្រំដែនដែលកំពុងឈរជើងនៅលើដែនអធិបតេយ្យជាតិរបស់កម្ពុជា ប៉ុន្តែទោះបីយ៉ាងណាក៏ដោយនេះមិនមែនជាការបង្ហាញណាថាកម្ពុជាកំពុងត្រៀមធ្វើសង្គ្រាមនោះទេ ប៉ុន្ដែក្នុងន័យដើម្បីការពារសន្ដិសុខ សន្ដិភាពជាតិមួយ ដែលជារដ្ឋអធិបតេយ្យ និងជាសមាជិករបស់អង្គការសហប្រជាជាតិ និងជាសមាជិកអាស៊ានដូចគ្នា។
ទន្ទឹមនឹងនេះការត្រៀមកម្លាំងគឺជាផ្នែកមួយនៃការការពារសន្ដិសុខ សណ្ដាប់ធ្នាប់សាធារណៈ ពោលគឺកម្ពុជាដៃម្ខាងទ្រសភាពការនៅព្រំដែន ដៃម្ខាងទៀតទ្រសកម្មភាពផ្ទៃក្នុង ធ្វើយ៉ាងណាឱ្យមានស្ថិរភាព សន្ដិសុខ និងសណ្ដាប់ធ្នាប់ជាតិ ដើម្បីបម្រើឱ្យផលប្រយោជន៍នៃជីវភាពរស់នៅប្រចាំថ្ងៃរបស់ប្រជាជនកម្ពុជា។ សកម្មភាពនេះក៏បានបង្ហាញឱ្យឃើញថានគរបាលជាតិស្ថិតនៅក្នុងខ្សែបន្ទាត់តែមួយជាមួយកងយោធពលខេមរភូមិន្ទ ក្រោមមាគ៌ាដឹកនាំដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងការណែនាំជាយុទ្ធសាស្រ្តរបស់សម្ដេចតេជោ ហ៊ុន សេន។ នេះជាការលើកឡើងបន្ថែមរបស់លោកបណ្ឌិត ទូច សុឃៈ។
លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានអំពាវនាវឲ្យប្រជាពលរដ្ឋជឿជាក់លើរាជរដ្ឋាភិបាលកម្ពុជា ហើយនិយាយក្នុងក្របខណ្ឌនគរបាលព្រំដែនចំណុះឱ្យក្រសួងមហាផ្ទៃ មកដល់ម៉ោងនេះកងកម្លាំងមិនមានការដកចេញនោះឡើយ ហើយការណ៍ដែលភាគីកម្ពុជានិងថៃបានជួបគ្នា ហើយបានសម្រេចកែសម្រួលកម្លាំងទាំងសងខាងដើម្បីបន្ថយកម្ដៅ តែកម្ពុជានៅតែរក្សានូវសិទ្ធអត្តនោម័តនៅក្នុងការចាត់ចែងកម្លាំងរក្សាបាននូវគោលដៅដែលធ្លាប់ឈរជើងជាយូរលង់ណាស់មកហើយ ដែលទទួលស្គាល់ដោយច្បាប់អន្ដរជាតិ។ ដូច្នេះសូមប្រជាពលរដ្ឋខ្មែរកុំចាញ់ការញុះញង់ពីសំណាក់ក្រុមណាមួយដែលមានចេតនាទុច្ចរិតបង្កើតជាកំហឹងធ្វើឱ្យប៉ះពាល់ដល់ប្រយោជន៍ជាតិរបស់យើង។
សូមជម្រាបជូនថា ប្រទេសកម្ពុជាបានបង្ហាញសាច់ដុំដាក់គ្នាសាជាថ្មី ក្រោយពីថៃបានបាញ់មកលើកម្ពុជាមុននៅតំបន់មុំ៣ បណ្ដាលឲ្យយោធិនខ្មែរម្នាក់បាត់បង់ជីវិតកាលពីទាបភ្លឺថ្ងៃទី២៨ ខែឧសភា ឆ្នាំ២០២៥។ កម្ពុជានិងថៃបានបញ្ជូនសព្វាវុធ និងកម្លាំងយោធាទៅកាន់ព្រំដែន ក្រោយមកទៀតឈានទៅដល់ការបិទព្រំដែនជាឯកតោភាគនៅច្រករបៀងពីសំណាក់ភាគីថៃ។ ការបិទច្រកអន្ដរជាតិប៉ោយប៉ែត ថៃបានសម្រេចបើកម៉ោង៨ព្រឹក ហើយបិទនៅម៉ោង៤រសៀល ជាការឆ្លើយតបកម្ពុជាសម្រេចបើកម៉ោង៩ព្រឹកនៅថ្ងៃអាទិត្យ ដែលធ្វើឲ្យភាគីថៃចរចាបើកម៉ោង៨ដូចគ្នា ប៉ុន្ដែភាគីកម្ពុជាបដិសេធ។ ជម្លោះព្រំដែននេះញាំងឲ្យរាជរដ្ឋាភិបាលកម្ពុជាសម្រេចជំហរច្បាស់លាស់មួយទៅកាន់ភាគីថៃ គឺបានយកសំណុំរឿងព្រំដែននៅតំបន់មុំ៣ ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ទៅដោះស្រាយនៅតុលាការយុត្តិធម៌អន្ដរជាតិ ICJ តែភាគីថៃមិនចង់ទៅតុលាការអន្ដរជាតិ ចង់ចរចាកម្រិតទ្វេរភាគីប៉ុណ្ណោះ៕
