«ជឿចិត្តលោកតាចុះ ណាចៅៗញាតិញ៉ោម។ ផ្សាយចេញពីតាមបន្ទាត់ព្រំដែនព្រឹក១១ មិថុនា ២០២៥ សូមផ្ញើសេចក្ដីនឹករលឹកទៅអ្នកសមរភូមិក្រោយផងបាទ»។ សារដ៏ខ្លីនេះនាយឧត្តមសេនីយ៍ ខេង សុមេធ អគ្គរងស្នងការនគរបាលជាតិ កំពុងឈរជើងប្រចាំទិសភូមិភាគ៣ ភូមិភាគ៤ និងភូមិភាគ៥ តាមខ្សែបន្ទាត់ព្រំដែនខាងលិចប្រទេស បានផ្ញើសារយ៉ាងខ្លីលើបណ្ដាញសង្គមហ្វេសបុក ពីតំបន់ព្រំដែន កម្ពុជានិងថៃ ទីដែលកំពុងប្រឈមគ្នារវាងកងទ័ពនៃប្រទេសទាំងពីរ។
សូមចុចអាន៖ ប្រធានសហព័ន្ធឧស្សាហកម្មថៃ ៖ ការបិទព្រំដែនកម្ពុជា-ថៃ អាចប៉ះពាល់ពាណិជ្ជកម្មតម្លៃ ១៧០ពាន់លានបាត !
សូមជម្រាបជូនថា នាយឧត្តមសេនីយ៍ ខេង សុមេធ ត្រូវបានថ្នាក់ដឹកនាំផ្ដល់ការទុកចិត្ត និងជ្រើសរើសឱ្យដឹកនាំកងកម្លាំងតាមព្រំដែន ដើម្បីការពារបូរណភាពទឹកដី ដោយសារតែ
- បទពិសោធន៍ខ្ពស់ក្នុងការដឹកនាំកងកម្លាំងនគរបាល និងការពារព្រំដែនជាច្រើនឆ្នាំ។
- សមត្ថភាពបញ្ជាការ និងគ្រប់គ្រងវិន័យ រឹងមាំក្នុងកងកម្លាំង។
- ជំនាញចរចា ដើម្បីដោះស្រាយវិបត្តិជាមួយប្រទេសជិតខាងដោយសន្តិវិធី។
- ទទួលបានការទុកចិត្តពីថ្នាក់ដឹកនាំជាតិ ក្នុងកិច្ចការសន្ដិសុខប្រចាំតំបន់ព្រំដែន។
- លទ្ធផលជាក់ស្តែង ក្នុងការរក្សាស្ថិរភាព និងការបញ្ចេញសមត្ថភាពកងកម្លាំងបានប្រសើរ។
- មានសមត្ថភាពក្នុងការបញ្ជូនគ្រឿងបន្លាស់ ស្បៀង និងថវិកាដល់កងកម្លាំងក្នុងពេលវេលាដែលត្រឹមត្រូវ។
សូមចុចអាន៖ កម្ពុជានិងថៃ កែសម្រួលកងទ័ព ឯរឿងបណ្ដឹងព្រំដែនទៅតុលការអន្ដរជាតិ ICJ កម្ពុជារក្សាដដែល
កាលពីពេលថ្មីៗនេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានចេញលិខិតបង្គាប់ការ ចាត់តាំងក្រុមការងារប្រចាំការ ដើម្បីគាំទ្រដល់កម្លាំងនគរបាលការពារព្រំដែន ដែលកំពុងឈរជើងប្រចាំទិសភូមិភាគ៣ ភូមិភាគ៤ និងភូមិភាគ៥ តាមខ្សែបន្ទាត់ព្រំដែនភាគខាងលិចប្រទេស។
យោងតាមលិខិតបង្គាប់ការចុះថ្ងៃទី៥ ខែមិថុនា ឆ្នាំ២០២៥ ក្រុមការងារប្រចាំការនេះ មានឧត្តមសេនីយ៍ឯក ឡោ សុខឡេង អគ្គស្នងការរងនគរបាលជាតិ ជាប្រធាន និងឧត្តមសេនីយ៍ឯក ប៊ុនប៉ា ម៉ារីលុច ជាអនុប្រធាន ព្រមទាំងសមាជិកថ្នាក់ឧត្តមសេនីយ៍៤រូបទៀត។
អគ្គស្នងការបានចង្អុលភារកិច្ចឱ្យក្រុមការងារនេះឧបត្ថម្ភគាំទ្រដល់កងកម្លាំងនគរបាលការពារព្រំដែន ដែលកំពុងឈរជើងប្រចាំទិសភូមិភាគទាំង៣ ដឹកនាំដោយ ឯកឧត្តម នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ ទទួលដឹកនាំ ការងាររបស់នាយកដ្ឋានកណ្តាលនគរបាលព្រំដែន។
បើតាមលិខិតបង្គាប់ការដដែល ក្រុមការងារនេះ ត្រូវសហការជាមួយ ឯកឧត្តម នាយឧត្តមសេនីយ៍ ខេង សុមេធ ដើម្បីសិក្សាអំពីតម្រូវការចាំបាច់នានា មានដូចជា មធ្យោបាយ ឧបករណ៍ សម្ភារបច្ចេកទេស អាវុធ គ្រាប់ ការកសាង និង/ឬស្តារ ជួសជុលលេណដ្ឋាន នៅសមរភូមិជួរមុខ ព្រមទាំងផ្តើមស្នើសុំគោលការណ៍ដោះស្រាយ ផ្គត់ផ្គង់ និងបំពាក់ឱ្យបានទាន់ពេលវេលា និងទំនាក់ទំនងជាមួយក្រសួង ស្ថាប័ន អង្គភាព វិស័យឯកជន និងសប្បុរសជននានា ដើម្បីកៀរគរមធ្យោបាយ ឧបករណ៍ សម្ភារ ថវិកា ស្បៀងអាហារ គ្រឿងឧបភោគបរិភោគ និងថ្នាំសង្កូវ សម្រាប់ផ្តល់ជូន កងកម្លាំងនគរបាលការពារព្រំដែនជាដើម៕