ប៉េកាំង៖ ស្ថានទូតចិនប្រចាំប្រទេសអ៊ីស្រាអែលនៅថ្ងៃអង្គារ នេះ បានជំរុញពលរដ្ឋខ្លួនឱ្យចាកចេញពីប្រទេសនេះ «ឱ្យបានឆាប់តាមដែលអាចធ្វើទៅបាន» បន្ទាប់ពីអ៊ីស្រាអែល និងអ៊ីរ៉ង់បានធ្វើការវាយប្រហារគ្នាយ៉ាងខ្លាំង។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី១៧ ខែមិថុនា ឆ្នាំ២០២៥។
ស្ថានទូតចិនបាននិយាយនៅក្នុងសេចក្តីថ្លែងការណ៍មួយនៅលើបណ្ដាញសង្គម WeChat ថា «បេសកកម្មចិននៅអ៊ីស្រាអែល រំលឹកជនជាតិចិន ឱ្យចាកចេញពីប្រទេសឱ្យបានឆាប់តាមដែលអាចធ្វើបានតាមរយៈច្រកព្រំដែនគោក ដើម្បីបង្ការទុកជាមុនថាពួកគេអាចធានាសុវត្ថិភាពផ្ទាល់ខ្លួនរបស់ពួកគេ»។ បន្ថែមពីនោះ ក្រសួងក៏បានបញ្ជាក់ទៀតថា «ជាការផ្ដល់អនុសាសន៍ សូមចាកចេញក្នុងទិសដៅនៃប្រទេសហ្សកដានី»។
ទាក់ទិននឹងបញ្ហានេះ ស្ថានទូតក្រុងប៉េកាំង បាននិយាយនាថ្ងៃអង្គារ នេះថា «ជម្លោះកំពុងបន្ដកើនឡើង»។ ស្ថានទូតដដែលបន្ដថា «ហេដ្ឋារចនាសម្ព័ន្ធស៊ីវិលជាច្រើនត្រូវបានខូចខាត ការស្លាប់ និងរបួសរបស់ជនស៊ីវិលមានការកើនឡើង ហើយស្ថានភាពសន្តិសុខកាន់តែធ្ងន់ធ្ងរទៅៗ»។
បន្ទាប់ពីមានសត្រូវ និងជម្លោះអូសបន្លាយរាប់ទសវត្សរ៍ អ៉ីស្រាអែលបានចាប់ផ្ដើមយុទ្ធនាការអាកាសដ៏គួរឱ្យភ្ញាក់ផ្អើលមួយកាលពីថ្ងៃសុក្រ សប្ដាហ៍មុន ប្រឆាំងនឹងគោលដៅនៅទូទាំងប្រទេសអ៉ីរ៉ង់ ដោយនិយាយថា ពួកគេមានបំណងបញ្ចៀសសត្រូវរបស់ខ្លួនពីការទទួលបានអាវុធបរមាណូ ដែលជាមហិច្ឆតាមួយដែលទីក្រុងតេអេរ៉ង់តែងតែបដិសេធ។
សូមជម្រាបថា ការផ្ទុះឡើងភ្លាមៗ នៅក្នុងអរិភាព បានបង្កឱ្យមានការភ័យខ្លាចនៃជម្លោះកាន់តែរីកធំ ដោយប្រធានាធិបតីអាមេរិក លោក ដូណាល់ ត្រាំ បានជំរុញឱ្យអ៊ីរ៉ង់ត្រឡប់ទៅតុចរចាវិញ បន្ទាប់ពីការវាយប្រហាររបស់អ៊ីស្រាអែលបានបង្អាក់កិច្ចចរចានុយក្លេអ៊ែរដែលកំពុងបន្ត៕
