សារព័ត៌មាន CNA បានចេញផ្សាយវីដេអូឯកសាររមួយកាលពីថ្ងៃទី១៩ ខែមិថុនា នេះ ដោយបានទម្លាយពីវិបត្តិនៃការជួញដូរមនុស្សនៅតំបន់អាស៊ីអាគ្នេយ៍ ដោយបង្ហាញថា ថៃ ជាមជ្ឈមណ្ឌលជួញដូរដ៏ធំបំផុត ដោយជនរងគ្រោះជាច្រើនត្រូវបានបង្ខំឱ្យធ្វើការឱ្យពួកឧក្រិដ្ឋជនឆបោកតាមអនឡាញ (Cyber-crime) ។
យោងតាមវីដេអូឯកសាររយៈពេល ៤៥នាទីរបស់ CNA បានបង្ហាញថា ប្រទេសថៃ ជាទីតាំងចែកចាយ ឬ ជួញដូរ និងធ្វើទារុណកម្មលើរាងកាយជនរងគ្រោះជាច្រើន បង្ខំឱ្យទៅធ្វើការជាមួយឧក្រិដ្ឋជនតាមអនឡាញ។
ទូរទស្សន៍សិង្ហបុរី នេះ បានបង្ហាញថា ប្រទេសថៃ គឺជាចំណុចឆ្លងកាត់ដ៏ពេញនិយមមួយសម្រាប់ការជួញដូរចែកចាយមនុស្សទៅកាន់មណ្ឌលឆបោកនៅប្រទេសផ្សេង។ មនុស្សយ៉ាងហោចណាស់ ២០០,០០០នាក់ ត្រូវបានគេរាយការណ៍ថា ត្រូវបានឃុំខ្លួន និងបង្ខំឱ្យធ្វើការឱ្យពួកឧក្រិដ្ឋជនឆបោកនៅមីយ៉ាន់ម៉ា ប៉ុន្ដែក៏មានប្រតិបត្តិការឆបោកក្នុងប្រទេសឡាវ ម៉ាឡេស៊ី និងហ្វីលីពីនផងដែរ។
Xiao Hao ជាជនរងគ្រោះម្នាក់បានរៀបរាប់យ៉ាងដូច្នេះថា «បន្ទាប់ពីខ្ញុំបានបង្ហោះព័ត៌មានផ្ទាល់ខ្លួនមួយចំនួនដើម្បីស្វែងរកការងាររនៅលើគេហទំព័រជ្រើសរើសនាវិកមួយរួច មាននរណាម្នាក់ទាក់ទងមកខ្ញុំ ដោយប្រាប់ថា ឈ្មោះ Zhang មកពីក្រុមហ៊ុនដឹកជញ្ជូន គេបានប្រាប់ខ្ញុំថា គេមានកប៉ាល់ធំមួយចូលចតនៅកំពង់ផែប្រទេសថៃ។ ពេលនោះ ខ្ញុំបានជឿគេដោយមិនមានការសង្ស័យអ្វីទាំងអស់ ដោយគេបានសន្យាថា ឱ្យប្រាក់ខែ ១ខែ ៧០០០យ័ន (ស្មើនឹង៩៧០ដុល្លារ)»។
បន្ទាប់ពីព្រមទទួលធ្វើការងារនេះ Xiao Hao បានធ្វើដំណើរតាមយន្ដហោះមកប្រទេសថៃ។ ទោះបីជាកាលពីដំបូងគេបានប្រាប់ថា កប៉ាល់នោះចូលចតនៅកំពង់ផែក្រុងបាងកកក៏ដោយ ក៏ក្រុមហ៊ុនបានទិញសំបុត្រឱ្យធ្វើដំណើរបន្ដមកឈៀងម៉ៃ ភាគខាងជើងប្រទេសថៃ ដែលមានចម្ងាយជាង ៧០០គីឡូម៉ែត្រពីកំពង់ផែ។ នៅពេលមកដល់អាកាសយានដ្ឋានឈៀងម៉ៃ មានរថយន្ដមួយគ្រឿងមកទទួលគាត់ ហើយគាត់ចាប់ផ្ដើមមានអារម្មណ៍សង្ស័យ។ គេបានបញ្ជូនគាត់មកកន្លែងមួយ ដើម្បីធ្វើការដូចជា ការឆបោក គាត់បានឃើញជនរងគ្រោះជាច្រើនត្រូវបានគេធ្វើទារុណកម្ម និងបង្ខំឱ្យធ្វើការឆបោកដូចជា ការហៅទូរស័ព្ទ ផ្ញើសារបញ្ជូន Linked ការបោកប្រាស់វិនិយោគ និងការឆបោកលើរូបភាពស្នេហា៕
