លោកស្រី Arada Fuangthong អគ្គនាយកនៃនាយកដ្ឋានពាណិជ្ជកម្មបរទេស (DFT) បាននិយាយកាលពីថ្ងៃសុក្រ កន្លងទៅថា ការនាំចេញទំនិញរបស់ថៃមកប្រទេសកម្ពុជា នៅក្នុងឆមាសទី២ នៃឆ្នាំនេះ អាចនឹងធ្លាក់ចុះប្រហែល ៦០ពាន់លានបាត (ជាង ១៨៤កោដដុល្លារ) ប្រសិនបើការរឹតបន្ដឹងនៅច្រកព្រំដែននៅតែបន្ដរហូតដល់ចុងឆ្នាំ២០២៥នេះ។ នេះបើយោងតាមការចេញផ្សាយដោយសារព័ត៌មាន Thai PBS world។
លោកស្រី បាននិយាយថា ការខូចខាតដល់ពាណិជ្ជកម្មតាមព្រំដែនកម្ពុជា-ថៃ ត្រូវបានប៉ាន់ប្រមាណជាមធ្យម ១៤,៥ពាន់លានបាតក្នុងមួយខែ រួមទាំងការនាំចេញមានតម្លៃប្រហែល ១១ពាន់លានបាត និងការនាំចូលមានតម្លៃ ២,៧ពាន់លានបាត។
ទំនិញនាំចេញដែលរងផលប៉ះពាល់មានដូចជា បន្លែ ផ្លែឈើ ទំនិញសម្រាប់ប្រើប្រាស់ និងផលិតផលឧស្សាហកម្ម ខណៈទំនិញចូលប្រទេសថៃ មានដូចជា ដំឡូងមី និងទំនិញឧស្សាហកម្មមួយចំនួនប៉ុណ្ណោះ។ លោកស្រី Arada បាននិយាយថា តម្លៃនៃពាណិជ្ជកម្មទ្វេភាគីឥឡូវនេះត្រូវបានគេរំពឹងថា នឹងធ្លាក់ចុះ ១% ផ្ទុយពីកំណើន ២% ដែលបានព្យាករណ៍ពីមុនមក។
កាលពីឆ្នាំមុន ពាណិជ្ជកម្មទ្វេភាគីមានចំនួនសរុបជាង ៣៦៦ពាន់លានបាត រួមទាំង ១៧០ពាន់លានបាតពីពាណិជ្ជកម្មព្រំដែនដីគោក។ ទោះជាយ៉ាងណាក៏ដោយ ក្នុងរយៈពេលប្រាំខែដំបូងនៃឆ្នាំនេះ ពាណិជ្ជកម្មទ្វេភាគីត្រូវបានប៉ាន់ប្រមាណថា មានចំនួន ១៦០ពាន់លានបាត ដោយ ៨០ពាន់លានបាតទៀតបានមកពីការទិញលក់ដីជាអាជីវកម្ម។
ទន្ទឹមនឹងនេះ លោក Kriangkrai Thiennukul ប្រធានសហព័ន្ធឧស្សាហកម្មថៃ បានបញ្ជាក់ថា ជម្លោះព្រំដែនដែលកំពុងបន្ត និងការរឹតបន្តឹងការឆ្លងកាត់នៅព្រំដែន កំពុងធ្វើឱ្យខូចខាតដល់ពាណិជ្ជកម្មតាមព្រំដែន ដែលបច្ចុប្បន្នត្រូវបានប៉ាន់ប្រមាណថា មានតម្លៃប្រហែល ៥០០លានបាតក្នុងមួយថ្ងៃ៕
