យោងតាមការចេញផ្សាយដោយសារព័ត៌មានក្នុងស្រុករបស់ប្រទេសថៃ Thaiger បានឱ្យដឹងនាថ្ងៃទី៨ ខែកក្កដា ឆ្នាំ២០២៥នេះថា ស្រ្តីម្នាក់ឈ្មោះ Natthasinee ដែលជាអតីតអ្នករាយការណ៍ព័ត៌មាន និងជាទីប្រឹក្សានៃអនុគណៈកម្មាធិការព្រឹទ្ធសភា បានចោទប្រកាន់សមាជិកព្រឹទ្ធសភាម្នាក់ថា បានបៀតបៀនផ្លូវភេទលើរូបនាងនៅឯខុនដូមួយកន្លែងនៅក្នុងតំបន់ Bang Sue ក្រុងបាងកក ក្រោយអ្នកទាំង២ បានញុំាអាហារពេលល្ងាចជាមួយគ្នាកាលពីខែកក្កដា កន្លងទៅ។
ស្រ្តីខាងលើបានបន្ដថា នាងបានប្រាប់រឿងរ៉ាវលម្អិតទៅកាន់អ្នកសារព័ត៌មាននៅរដ្ឋសភាថៃ នាថ្ងៃអង្គារ ហើយបានអះអាងថា រូបនាងធ្វើដំណើរទៅកាន់រដ្ឋសភាដើម្បីដាក់ពាក្យបណ្ដឹងខាងក្រមសីលធម៌ប្រឆាំងនឹងសមាជិកព្រឹទ្ធសភារូបនោះរួចហើយ ប៉ុន្ដែមិនទាន់បានបង្ហើបឈ្មោះរបស់សមាជិកព្រឹទ្ធសភាដែលរងការចោទប្រកាន់នៅឡើយទេ។
កាលពីថ្ងៃទី៥ ខែកក្កដា កន្លងទៅ ស្ត្រីឈ្មោះ Natthasinee បានផ្ញើសារជូនពរខួបកំណើតទៅកាន់សមាជិកព្រឹទ្ធសភារូបនោះតាមកម្មវិធី Line ហើយបានទទួលការឆ្លើយតបមកវិញតាមរយៈការអញ្ជើញរូបនាងចេញក្រៅហូបអាហារជាមួយគ្នា។ គ្រានោះ រូបនាងក៏ព្រមទទួលយកការអញ្ជើញនោះ ហើយសមាជិកព្រឹទ្ធសភានោះបានមកទទួលនាងដល់ផ្ទះ។
ក្រោយពីញុំាអាហាររួច នៅតាមផ្លូវត្រឡប់ទៅផ្ទះវិញ សមាជិកព្រឹទ្ធសភាដដែលបានសុំឱ្យរូបនាងចាប់ផ្ដើមទំនាក់ទំនងជាមួយគ្នា។ ប៉ុន្តែរូបនាងបានបដិសេធ ដោយនិយាយថា ចង់រាប់អានគ្នាត្រឹមតែជាមិត្តប៉ុណ្ណោះ។ ក្រោយមក បុរសជាសមាជិកព្រឹទ្ធសភាបានសន្ទុះចាប់ដៃរូបនាង ហើយនាងបានព្យាយាមចុះពីរថយន្ដ តែសមាជិកព្រឹទ្ធសភារូបនេះបានចាប់ដៃនាងជាប់ ព្រមទាំងព្យាយាមនាំនាងទៅកានខុនដូររបស់ខ្លួន។ នៅតាមផ្លូវ Natthasinee បានព្យាយាមចេញពីរថយន្ដ បុរសរូបនេះបានចាប់ដៃ នាងជាប់ និងចាក់សោរទ្វាររថយន្ដទៀតផង។
យ៉ាងណាម៉ិញ ចាប់តាំងពីនាងបានដាក់ពាក្យបណ្ដឹងរួចហើយ សមាជិកព្រឹទ្ធសភារូបនេះ បានទាក់ទងទៅនាង ហើយព្យាយាមចង់ចរចារកដំណោះស្រាយលក្ខណៈឯកជន។ តែត្រូវបាននាងបានបដិសេធសំណើនេះ ហើយបានតាំងចិត្តបន្តចាត់វិធានការផ្លូវច្បាប់។ នាងបានបន្ថែមថា នាងបានរងការប៉ះទង្គិចផ្លូវចិត្ត បន្ទាប់ពីកើតមានឧបទ្ទវហេតុនោះ ហើយចាប់តាំងពីពេលនោះមកត្រូវបានគេធ្វើរោគវិនិច្ឆ័យថា មានជំងឺស្ត្រេសក្រោយការប៉ះទង្គិចផ្លូវចិត្ត (PTSD)។
យោងតាមរបាយការណ៍ពី ThaiRath បានរាយការណ៍ថា សមាជិកព្រឹទ្ធសភាដែលរងការចោទប្រកាន់ជាអតីតប្រធានសមាគមប្រតិបត្តិករអាជីវកម្មនៅខេត្តភាគខាងកើតប្រទេសថៃ ហើយគេរាយការណ៍ថា បុរសខាងលើគ្រោងនឹងធ្វើសន្និសីទកាសែតនៅថ្ងៃនេះ ដើម្បីដោះស្រាយការចោទប្រកាន់ទាំងអស់នេះ៕
