ក្លឹបបាល់ទាត់ព្រះខ័នរាជស្វាយរៀង តំណាងកម្ពុជា នឹងប្រើប្រាស់ពហុកីឡដ្ឋានជាតិមរតកតេជោ ជាទឹកដីសម្រាប់ការប្រកួតពានរង្វាន់ក្លឹបក្នុងតំបន់អាស៊ាន ASEAN CLUB CHAMPIONSHIP SHOPEE CUP 2025/26 វគ្គសន្សំពិន្ទុក្នុងពូល ។
សម្រាប់រដូវកាលឆ្នាំ២០២៥-២៦ ក្លឹបបាល់ទាត់ព្រះខ័នរាជស្វាយរៀង គឺស្ថិតនៅក្នុងពូល B ជាមួយក្រុម Bangkok United FC ថៃ, Johor Darul Ta’zim FC ម៉ាឡេស៊ី, Nam Dinh FC វៀតណាម, Lion City Sailors FC សិង្ហបុរី និងរវាងក្រុមឈ្នះ Kasuka Fcរបស់ប៊្រុយណេ ឬ Cebu F.C របស់ហ្វីលីពីន ។
នេះជាកម្មវិធីប្រកួតរបស់ក្រុមព្រះខ័នរាជស្វាយរៀង៖
- ប្រកួតទី១ ថ្ងៃទី២៥ ខែសីហា ឆ្នាំ២០២៥ រវាងក្រុមឈ្នះ Kasuka Fcរបស់ប៊្រុយណេ ឬ Cebu F.C របស់ហ្វីលីពីន ប៉ះ ព្រះខ័នរាជស្វាយរៀង
- ប្រកួតទី២ ថ្ងៃទី២៥ ខែកញ្ញា ឆ្នាំ២០២៥ Nam Dinh FC វៀតណាម ប៉ះ ព្រះខ័នរាជស្វាយរៀង នៅកីឡដ្ឋាន Thien Truong Stadium
- ប្រកួតទី៣ ថ្ងៃទី៤ ខែធ្នូ ឆ្នាំ២០២៥ ព្រះខ័នរាជស្វាយរៀង ប៉ះ Johor Darul Ta’zim FC ម៉ាឡេស៊ី នៅកីឡដ្ឋាន Morodok Techo National Stadium
- ប្រកួតទី៤ ថ្ងៃទី២៩ ខែមករា ឆ្នាំ២០២៦ ព្រះខ័នរាជស្វាយរៀង ប៉ះ Bangkok United FC ថៃ នៅកីឡដ្ឋាន Morodok Techo National Stadium
- ប្រកួតទី៥ ថ្ងៃទី៥ ខែកុម្ភៈ ឆ្នាំ២០២៦ Lion City Sailors FC សិង្ហបុរី ប៉ះ ព្រះខ័នរាជស្វាយរៀង នៅកីឡដ្ឋាន Bishan Stadium
សម្រាប់រូបមន្តប្រកួតគឺក្រុមដែលស្ថិតនៅវគ្គ Playoff ចំនួន៤ក្រុមមានដូចជា ក្រុមKASUKA FC របស់ប៊្រុយណេ, DH CEBU FC របស់ហ្វីលីពីន, EZRA FC របស់ឡាវ និង SHAN UNITED FC របស់មីយ៉ាន់ម៉ា ត្រូវប្រកួតគ្នាចំនួន២ជើង Home/Away ដើម្បីដណ្តើមកៅអីឡើងមកកាន់ពូលធំរួមជាមួយក្រុមខ្លាំង ក្នុងនោះមាន២ក្រុមត្រូវឡើងមកកាន់ពូល A និង B ។
ចំណែកឯរូបមន្តប្រកួតនៅក្នុងពូលវិញគឺ ក្រុមដែលមានពិន្ទុខ្ពស់ជាងគេ និងក្រុមលេខ២ តាមពូលទាំងពីរនឹងមានឈ្មោះឡើងទៅវគ្គពាក់កណ្តាលផ្តាច់ព្រ័ត្រ ប្រកួតគ្នាចំនួន២ជើង Home/Away ក្រុមឈ្នះ២ក្រុម នឹងឡើងទៅវគ្គផ្តាច់ព្រ័ត្រ។
សូមជម្រាបថា ក្លឹបបាល់ទាត់ថៃ Buriram United គឺជាម្ចាស់ជើងឯកឆ្នាំចាស់ នៃពានរង្វាន់ក្លឹបកំពូលអាស៊ាន ASEAN Club Championship Shopee Cup 2024/25 ក្រោយឈ្នះក្លឹបវៀតណាម Cong An Hanoi ៣ទល់២ ដោយបាល់កាត់សេចក្ដី១១ម៉ែត្រ នាយប់ថ្ងៃទី២១ ខែឧសភា ឆ្នាំ២០២៥។
ពានរង្វាន់ជើងឯកតំបន់អាស៊ាន នេះធ្លាប់រៀបចំឡើង២លើកមក ដោយក្នុងឆ្នាំ២០០៣ ជើងឯកបានទៅក្រុម East Bengal របស់ឥណ្ឌា ក្រោយយកឈ្នះក្រុម BEC Tero Sasana របស់ថៃ នៅវគ្គផ្ដាច់ព្រ័ត្រ ក្នុងទីក្រុងហ្សាកាតា ប្រទេសឥណ្ឌូណេស៊ី ហើយឆ្នាំ២០០៥ ជើងឯកបានទៅក្រុម Tampines Rovers របស់សិង្ហបុរី ក្រោយយកឈ្នះលើក្រុម Pahang FA របស់ម៉ាឡេស៊ី ដោយលទ្ធផល ៤-២ នៅទីក្រុងបានដារសេរីបេហ្គាវ៉ាន់ ប្រទេសប្រ៊ុយណេ៕
