ព្រះសីហនុ៖ រដ្ឋបាលខេត្តព្រះសីហនុ កាលពីព្រឹកថ្ងៃទី១០ ខែកក្កដា ឆ្នាំ២០២៥ បានបើកយុទ្ធនាការ «និយាយថាទេ ចំពោះព័ត៌មានក្លែងក្លាយ Say “No” to Fake News» នៅរង្វង់មូលវិមានឯករាជ្យ ដោយមានការដឹកនាំពីអនុរដ្ឋលេខាធិការក្រសួងព័ត៌មាន លោក អ៊ុក គឹមសេង និងអភិបាលរងខេត្ត លោក ឡុង ឌីម៉ង់។
គោលបំណងនៃយុទ្ធនាការនេះ គឺដើម្បីបង្កើនការយល់ដឹងសាធារណជនអំពីគ្រោះថ្នាក់នៃព័ត៌មានក្លែងក្លាយដែលកំពុងរីករាលដាលតាមបណ្តាញសង្គម។ លោក អ៊ុក គឹមសេង បានបញ្ជាក់ថា បច្ចេកវិទ្យាទំនើបធ្វើឲ្យមានការផលិតព័ត៌មានក្លែងក្លាយយ៉ាងប្រាកដប្រជា ដោយប្រើបច្ចេកវិទ្យាជំនាន់ថ្មីដូចជា deepfake និងសម្លេងស្រដៀងមនុស្សពិត។
ម្ដងទៀត លោក ឡុង ឌីម៉ង់ បានរំលឹកថា បញ្ញាសិប្បនិមិត្ត (AI) កំពុងត្រូវបានប្រើក្នុងការបង្កើតព័ត៌មានបំភាន់ដែលអាចបំពុលមតិសាធារណៈ ញុះញង់សង្គម និងបោកប្រាស់ប្រជាពលរដ្ឋ។ លោកបានបញ្ជាក់ថា ព័ត៌មានក្លែងក្លាយក្លាយជាបញ្ហាសង្គមដ៏ធ្ងន់ធ្ងរមួយ។
យុទ្ធនាការនេះបានចាប់ផ្តើមនៅថ្ងៃទី០១ ខែមេសា ២០២៥ ហើយនឹងបន្តរហូតដល់ថ្ងៃទី៣១ ខែមីនា ២០២៦ ដំណើរការជាតិមួយឆ្នាំនេះនឹងអនុវត្តទូទាំងប្រទេស ដើម្បីទប់ស្កាត់ និងបន្ថយការបង្កើតនិងចែករំលែកព័ត៌មានក្លែងក្លាយ៕
