កីឡាករ Bryan Bagunas ជម្រើសជាតិរបស់ហ្វីលីពីន ដែលជាដៃគូដ៏ស្អិតល្មួតរបស់កីឡាករកម្ពុជា វឿន វាសនា របស់ក្លិបបាល់ទះ Win Streak នៅតៃវ៉ាន់ បានសម្រេចចុះកុងត្រាចូលរួមជាមួយក្លិប Osaka Bluteon របស់ជប៉ុន ដែលមាន Super Star ឆ្វេងជប៉ុន Yuji Nishida នៅទីនោះ។
យ៉ាងណាមិញកាលពីឆ្នាំ ២០២៤ កន្លងទៅកីឡាករ Bryan Bagunas បានយល់ព្រមបន្តកុងត្រាថ្មីរយ:ពេល ៥ឆ្នាំបន្ថែម ដល់ឆ្នាំ២០២៩ ជាមួយក្លិបបាល់ទះ Win Streak ក្នុងលីគបាល់ទះរបស់តៃវ៉ាន់ (Enterprise Volleyball League)។
នៅថ្ងៃទី២១ ខែកក្កដា ឆ្នាំ២០២៥ ក្លិបបាល់ទះ Win Streak របស់តៃវ៉ាន់ បានប្រកាសថាក្លិប និងកីឡាករ Bryan Bagunas បានព្រមព្រៀងបញ្ចប់កុងត្រាមុនកំណត់ដោយសន្តិវិធី។
ក្លិបបាល់ទះ Win Streak បន្តថាក្លិបពិតជាសោកស្ដាយចំពោះការបាត់បង់កីឡាករដ៏អស្ចារ្យម្នាក់នេះ ហើយសប្បាយចិត្តខ្លាំងណាស់ដែលរូបគេបានចូលរួមជាមួយក្រុមអាជីពរបស់ជប៉ុន។
គួរបញ្ជាក់ថា កីឡាករ Bryan Bagunas កើតនៅថ្ងៃទី១០ ខែតុលា ឆ្នាំ១៩៩៧ អាយុ ២៧ឆ្នាំ និងកម្ពស់ ១.៩៥ម៉ែត្រ រូបធ្លាប់ជួយឱ្យក្រុមជម្រើសជាតិហ្វីលីពីន ឈ្នះមេដាយប្រាក់ ក្នុងព្រឹត្តិការណ៍ស៊ីហ្គេម ឆ្នាំ២០១៩៕
