ក្រុមបាល់ទះនារីជប៉ុន ឈ្នះតួកគី ប្រេស៊ីលឈ្នះអាល្លឺម៉ង អ៊ីតាលី ឈ្នះអាមេរិក និងប៉ូឡូញ ឈ្នះចិន ដឹកដៃគ្នាឡើងទៅកាន់វគ្គពាក់កណ្ដាលផ្ដាច់ព្រ័ត្រ ក្នុងពានរង្វាន់បាល់ទះផ្នែកនារីពិភពលោក FIVB Women’s Volleyball Nations League 2025។
សម្រាប់កម្មវិធីប្រកួតវគ្គពាក់កណ្ដាលផ្ដាច់ព្រ័ត្រ ធ្វើឡើងនៅថ្ងៃទី២៦ កក្កដា ២០២៥៖
- អ៊ីតាលី ប្រកួតជាមួយ ប៉ូឡូញ
- ប្រេស៊ីល ប្រកួតជាមួយ ជប៉ុន
នៅវគ្គ ៨ក្រុមចុងក្រោយ ក្រុមបាល់ទះនារីជប៉ុន យកឈ្នះតួកគី ៣-២ (២៥-២១, ១៦-២៥, ២៥-២០, ២២-២៥, ១៥-៩) ខណ:ក្រុមបាល់ទះនារីប្រេស៊ីល យកឈ្នះអាល្លឺម៉ង ៣-០ (២៥-១៩, ២៦-២៤, ២៥-១៤) ឡើងទៅកាន់វគ្គពាក់កណ្ដាលផ្ដាច់ព្រ័ត្រ។
ដោយឡែកសម្រាប់ ក្រុមបាល់ទះនារីអ៊ីតាលី យកឈ្នះអាមេរិក ៣-០ (២៥២២, ២៥-២១, ២៨-២៦) ខណ:ក្រុមបាល់ទះនារីប៉ូឡូញ យកឈ្នះចិន ៣-២ (១៧–២៥, ២៥–២០, ១៩–២៥, ២៥–១៩, ១៥–១២) ដឹកដៃគ្នាឡើងទៅកាន់វគ្គពាក់កណ្ដាលផ្ដាច់ព្រ័ត្រ។
ការប្រកួតពានរង្វាន់បាល់ទះផ្នែកនារីពិភពលោក FIVB Women’s Volleyball Nations League 2025 មាន២ដំណាក់កាលគឺ ទី១ ការប្រកួតវិលជុំសន្សំពិន្ទុដែលមាន ៣សប្តាហ៍ គិតចាប់ពីថ្ងៃទី៤ ខែមិថុនា ដល់ថ្ងៃទី១៣ ខែកក្កដា ឆ្នាំ២០២៥។
ក្រុមដែលមានពិន្ទុខ្ពស់ជាងគេចំនួន៧ និងម្ចាស់ផ្ទះ ប៉ូឡូញ បានឡើងទៅដំណាក់កាលទី២ ដែលជាជុំផ្ដាច់ព្រ័ត្រ ធ្វើឡើងចាប់ពីថ្ងៃទី២៣ រហូតដល់ថ្ងៃទិ២៧ ខែមិថុនា ឆ្នាំ២០២៥ ដើម្បីរកឃើញម្ចាស់ជើងឯក។
សូមជម្រាបថា ពានរង្វាន់បាល់ទះផ្នែកនារីកម្រិតទី១ពិភពលោក បានបង្កើតឡើងដំបូងនៅឆ្នាំ២០១៨ ដោយនៅឆ្នាំដំបូងនោះគឺធ្វើឡើងនៅប្រទេសចិន នៅឆ្នាំ២០១៩ នៅរៀបចំនៅប្រទេសចិនដដែល ហើយក្រុមបាល់ទះជម្រើជាតិនារីអាមេរិក គ្រងជើងឯក២ឆ្នាំជាប់គ្នាតែម្តង។
នៅឆ្នាំ២០២០ មិនមានការរៀបចំនោះឡើយដោយសារជំងីកូវីត ១៩ នៅឆ្នាំ២០២១ ធ្វើឡើងនៅប្រទេសអ៊ីតាលី ជើងឯកបានលើក្រុមជម្រើសជាតិអាមេរិក ឆ្នាំ២០២២ ធ្វើនៅប្រទេសទួរគី ជើងឯកគឺបានលើក្រុមជម្រើសជាតិអ៊ីតាលី ។
នៅឆ្នាំ២០២៣ រៀបចំឡើងនៅសហរដ្ឋអាមេរិក ជើងឯកគឺបានលើក្រុមជម្រើសជាតិទួរគី និងចុងក្រោយឆ្នាំ២០២៤ ធ្វើនៅប្រទេសថៃ ជើងឯកបានលើក្រុមជម្រើសជាតិអ៊ីតាលី៕
