ពានរង្វាន់បាល់ទះបុរសកម្រិតពិភពលោក FIVB Men’s Volleyball Nations League 2025 បានរកឃើញក្រុមខ្លាំងទាំង ៨ក្រុមដែលនឹងត្រូវប្រជែងគ្នានៅវគ្ក ៨ក្រុមចុងក្រោយហើយ នៅថ្ងៃទី៣០-៣១ កក្កដានេះ ខណ:ក្រុមបាល់ទះជម្រើសជាតិជប៉ុន ត្រូវជួបក្រុមជម្រើសជាតិប៉ូឡូញ នៅថ្ងៃទី៣០ ខែកក្កដា ឆ្នាំ២០២៥។
មុនឈានដល់វគ្គ ៨ក្រុមនេះ ឆ្លងកាត់១២ប្រកួត ក្រុមបាល់ទះជម្រើសជាតិជប៉ុន ឈ្នះ ៨ប្រកួត ចាញ់ ៤ប្រកួត មាន ២៣ពិន្ទុ ឈរនៅលេខ៤ ពីក្រោយ បារាំង អ៊ីតាលី និងប្រេស៊ីល ។
ក្រុមដែលឡើងមកកាន់វគ្គ ៨ក្រុមចុងក្រោយ FIVB Men’s Volleyball Nations League 2025 រួមមាន៖ ប្រេស៊ីល អ៊ីតាលី បារាំង ជប៉ុន ប៉ូឡូញ ស្លូវេនី គុយបា និងម្ចាស់ផ្ទះចិន។ កម្មវិធីប្រកួតនៅថ្ងៃទី៣០-៣១ កក្កដា ២០២៥ ដូចខាងក្រោម៖
ការប្រកួតពានរង្វាន់បាល់ទះផ្នែកបុរស 2025 FIVB Volleyball Men’s Nations League ត្រូវបានរៀបចំឡើងដោយសហព័ន្ធកីឡាបាល់ទះអន្តរជាតិ បានចាប់ផ្ដើមដំណើរការពីថ្ងៃទី១១ មិថុនា ដល់ថ្ងៃទី៣ សីហា ២០២៥ ដោយមានក្រុមចូលរួមមកពីតាមទ្វីបនានាចំនួន១៨ក្រុម ធ្វើឡើងនៅប្រទេសចិន។
ពានរង្វាន់ FIVB Volleyball Men’s Nations League រៀបចំឡើងពីឆ្នាំ២០១៨ មកខណៈឆ្នាំដំបូងធ្វើឡើងនៅទីក្រុង Lille ប្រទេសបារាំង និងឆ្នាំបន្ទាប់ធ្វើឡើងនៅទីក្រុង Chicago សហរដ្ឋអាមេរិក ហើយក្រុមជម្រើសជាតិរុស្ស៊ី ឈ្នះជើងឯកទាំង២លើក ស្របពេលឆ្នាំ២០២០ កន្លងទៅត្រូវបានរំសាយចោលដោយសារស្ថានភាពរីករាលដាលនៃជំងឺកូវីដ-១៩។
លុះដល់ឆ្នាំ ២០២១ ធ្វើនៅទីក្រុង Rimini ប្រទេសអ៊ីតាលី ជើងឯកបានទៅលើក្រុមជម្រើសជាតិប្រេស៊ីល ចំណែកឯឆ្នាំ ២០២២ ធ្វើនៅទីក្រុង Bologna ប្រទេសអ៊ីតាលី ជើងឯកបានទៅលើក្រុមជម្រើសជាតិបារាំង និងចុងក្រោយឆ្នាំ ២០២៣ ធ្វើនៅទីក្រុង Gdańsk ប្រទេសប៉ូឡូញ ជើងឯកបានទៅលើក្រុមជម្រើសជាតិប៉ូឡូញ។ ខណ:ក្រុមបាល់ទះជម្រើសជាតិជប៉ុន ធ្លាប់ទទួលបានចំណាត់ថ្នាក់លេខ៣ (មេដាយសំរិទ្ធ) ម្តងប៉ុណ្ណោះកាលពីឆ្នាំ២០២៣៕
