ក្រុមជម្រើសជាតិវៀតណាម អាយុក្រោម ២៣ឆ្នាំ បានក្លាយជាម្ចាស់ជើងឯកពានរង្វាន់ ASEAN U-23 Mandiri Cup™ 2025 បន្ទាប់ពីយកឈ្នះឥណ្ឌូណេស៊ី ក្នុងលទ្ធផល ១-០ វគ្គផ្ដាច់ព្រ័ត្រ ការប្រកួតនោះធ្វើឡើងនៅក្នុងកីឡដ្ឋាន Gelora Bung Karno ក្នុងទីក្រុងហ្សាកាតា ប្រទេសឥណ្ឌូណេស៊ី កាលពីរាត្រីថ្ងៃទី២៩ កក្កដា ឆ្នាំ២០២៥។
នេះជាលើកទី៣សម្រាប់ក្រុមជម្រើសជាតិវៀតណាម អាយុក្រោម២៣ឆ្នាំ ដែលបានគ្រងជើងឯក៣ឆ្នាំជាប់គ្នា ពានរង្វាន់ប្រចាំតំបន់អាស៊ាន ASEAN U23 Championship ខណៈការគ្រងជើងឯកលើកដំបូងនៅឆ្នាំ២០២២ លើដីកម្ពុជា លើកទី២ ឆ្នាំ២០២៣ នៅប្រទេសថៃ និងចុងក្រោយឆ្នាំ២០២៥ នៅប្រទេសឥណ្ឌូណេស៊ី ។
ពានរង្វាន់ ASEAN U-23 Mandiri Cup™ 2025 មាន ១០ប្រទេសចូលរួមប្រកួតប្រជែង ដោយកម្ពុជាស្ថិតនៅក្នុងពូល B ជាមួយវៀតណាម និងឡាវ ពូល A មាន ឥណ្ឌូនេស៊ី ម៉ាឡេស៊ី ហ្វីលីពីន និងប្រ៊ុយណេ ខណ:ពូល C មាន ថៃ មីយ៉ាន់ម៉ា និង ទីម័រខាងកើត ។ ដោយការប្រកួតចាប់ពីថ្ងៃទី១៥ ដល់ថ្ងៃទី៣១ ខែកក្កដា ឆ្នាំ២០២៥។
គួរបញ្ជាក់ថា ពានរង្វាន់បាល់ទាត់ជើងឯកអាយុក្រោម ២៣ប្រចាំតំបន់អាស៊ាន ASEAN U-23 Championship រៀបចំឡើងដំបូងនៅឆ្នាំ២០០៥ ថៃជាម្ចាស់ផ្ទះ ម្ចាស់ជើងឯក ថៃ ឆ្នាំ២០១១ ខកខានការប្រកួត ឆ្នាំ២០១៩ កម្ពុជា ម្ចាស់ផ្ទះ ជើងឯក ឥណ្ឌូនេស៊ី ឆ្នាំ២០២២ កម្ពុជា ម្ចាស់ផ្ទះ ជើងឯក វៀតណាម ឆ្នាំ២០២៣ ថៃ ម្ចាស់ផ្ទះ ជើងឯក វៀតណាម និងឆ្នាំ២០២៥ នៅប្រទេសឥណ្ឌូណេស៊ី ជើងឯកបានលើវៀតណាម៕
