ហាណូយ៖ អាជ្ញាធរទប់ស្កាត់គ្រោះមហន្តរាយវៀតណាម បាននិយាយកាលពីថ្ងៃអាទិត្យ ថា ចំនួនអ្នកស្លាប់ដោយសារទឹកជំនន់នៅតំបន់ជួរភ្នំភាគខាងជើងនៃប្រទេស បានកើនឡើងដល់ ១០នាក់ហើយ។ នេះបើយោងតាមការចេញផ្សាយដោយសារព័ត៌មាន Arab News។
ភ្លៀងធ្លាក់ខ្លាំងបាននាំឱ្យមានគ្រោះទឹកជំនន់ក្នុងរយៈពេលប៉ុន្មានថ្ងៃថ្មីៗនេះ នៅក្នុងខេត្ត Son La, Phu Tho, Tuyen Quang និងជាពិសេសខេត្ត Dien Bien។
ក្រសួងកសិកម្មបានបញ្ជាក់ថា មនុស្ស ១០នាក់បានស្លាប់ និង ៧នាក់ផ្សេងទៀតរងរបួសនៅក្នុងតំបន់ Tia Dinh និង Xa Dung នៃខេត្ត Dien Bien។
បើតាមប្រព័ន្ធផ្សព្វផ្សាយរដ្ឋក្នុងស្រុក បានដកស្រង់សម្តីអាជ្ញាធរក្នុងតំបន់ដោយនិយាយថា ភ្លៀងធ្លាក់ខ្លាំងចាប់ពីថ្ងៃព្រហស្បតិ៍ ដល់ថ្ងៃសៅរ៍ បង្កឱ្យមានទឹកជំនន់ភ្លាមៗ ខណៈកាលពីថ្ងៃសៅរ៍ អាជ្ញាធរមូលដ្ឋានបានដាក់ពង្រាយឧទ្ធម្ភាគចក្រ ដើម្បីចូលទៅកាន់សហគមន៍ដាច់ស្រយាល និងផ្តល់នូវសម្ភារចាំបាច់ជាបណ្ដោះអាសន្ន។
ជាមួយគ្នា អ្នកស្រុកមួយចំនួនត្រូវបានផ្លាស់ប្តូរទីលំនៅទៅតំបន់សុវត្ថិភាព ខណៈសេវាអគ្គិសនី និងទូរគមនាគមន៍ភាគច្រើន ត្រូវបានស្ដារឡើងវិញនៅល្ងាចថ្ងៃអាទិត្យ។
បច្ចុប្បន្ន ប្រទេសវៀតណាមស្ថិតក្នុងរដូវព្យុះត្រូពិច ជារឿយៗបណ្ដាលឱ្យមានទឹកជំនន់ និងការបាក់ដីយ៉ាងធ្ងន់ធ្ងរ។ យ៉ាងណាក៏ដោយ អ្នកវិទ្យាសាស្រ្តបានព្រមានថា ការប្រែប្រួលអាកាសធាតុអាចនឹងកើនឡើងកាន់តែខ្លាំង និងញឹកញាប់ជាងមុន។
សូមជម្រាបថា កាលពីចុងខែកក្កដា ឆ្នាំ២០២៤ គ្រោះទឹកជំនន់ស្រដៀងគ្នានេះបានឆក់យកជីវិតមនុស្សចំនួន ៥នាក់ ក្នុងខេត្ត Son La ដោយបានជន់លិចដំណាំ ព្រមទាំងសម្លាប់សត្វជាច្រើនក្បាលនៅតាមកសិដ្ឋាន។ កាលពីខែកញ្ញា ឆ្នាំ២០២៤ដដែល ព្យុះទីហ្វុងកំណាចឈ្មោះថា Yagi បានបោកបក់យ៉ាងសាហាវលើភាគខាងជើងប្រទេសវៀតណាម ជាហេតុនាំឱ្យមនុស្សសរុបរហូតដល់ ៣៤៥នាក់ស្លាប់ និងបង្កការបំផ្លិចបំផ្លាញគិតជាទឹកប្រាក់ស្មើនឹងខ្ទង់ ៣.៣ពាន់លានដុល្លារ៕
