ក្រុមបាល់ទាត់ Kasuka FC របស់ប្រ៊ុយណេ នឹងទ្វាកីឡដ្ឋានជាតិ Hassanal Bolkiah, Bandar Seri Begawan ក្នុងប្រទេសរបស់ខ្លួនដើម្បីទទួលក្រុមភ្ញៀវភ្នំពេញក្រោន របស់កម្ពុជា ក្នុងវគ្គជម្រុះ AFC Challenge League 2025-26 ថ្ងៃទី១២ ខែសីហា ឆ្នាំ២០២៥ ម៉ោង ៧:១៥នាទីយប់។
មុនការប្រកួតលោក Oleg Starynskyi គ្រូបង្វឹកភ្នំពេញក្រោន ថ្លែងថា៖«នេះគឺជាការធ្វើដំណើរមកការប្រទេសប្រ៊ុយណេលើកទីមួយសម្រាប់យើង ហើយក៏ជាការប្រកួតផ្លូវការលក្ខណៈអន្តរជាតិលើកទីមួយផងដែរ ដូច្នេះខ្ញុំពិតជាមានអារម្មណ៍រំភើប។ ហើយខ្ញុំគិតថាការប្រកួតនេះនឹងក្លាយជាការប្រកួតដែលទាក់ទាញមួយ។
វាគឺជាលើកទីមួយសម្រាប់យើងក្នុងការប្រកួត AFC Challenge League បើទោះបីជាយើងធ្លាប់លេងពានរង្វាន់ AFC CUP ក៏ដោយក្តី។ ខ្ញុំគិតថាបទពិសោធន៍នេះគឺមិនខុសគ្នាប៉ុន្មានទេ។
យើងចង់លេងតាមរបៀបរបស់យើង ហើយយើងក៏ចង់លេងប្រកួតដោយទំនុកចិត្ត ការគ្រប់គ្រងបាល់ និងការបង្កើតឪកាសឲ្យបានច្រើនផងដែរ។ ពួកគេគឺជាក្រុមល្អមួយ យើងបានដឹងពីចំនុចខ្លាំងរបស់គេនោះគឺតំបន់ប្រយុទ្ធ ដូច្នេះយើងរំពឹងថាវាគឺជាការប្រកួតដ៏ពិបាកមួយ។ យើងចង់បញ្ចប់អ្វីៗគ្រប់យ៉ាងមុនម៉ោងបន្ថែម។ ខ្ញុំគិតថានេះគឺជាការប្រកួតប្រជែងថ្មីមួយសម្រាប់យើង ហើយយើងក៏ចង់បង្ហាញ និងត្រូវការជ័យជម្នះដើម្បីឡើងទៅវគ្គចែកពូលផងដែរ។»
ស្របពេលក្លិបបាល់ទាត់ព្រះខ័នរាជស្វាយរៀង ឡើងទៅលេងពានរង្វាន់ AFC Challenge League នៅក្នុងវគ្គចែកពូល Group Stage ដោយស្វ័យប្រវត្តិ ក្រោយគ្រងជើងឯកលីគកំពូលកម្ពុជា រដូវកាល ២០២៤-២៥៕
