ជឿថានៅក្នុងសមរភូមិជម្លោះកម្ពុជា-ថៃនាពេលថ្មីៗនេះ ប្រិយមិត្តគ្រប់គ្នាបានស្គាល់ និងលឺឈ្មោះរបស់មេទ័ពភូមិភាគ២ថៃ គឺនាយឧត្តមសេនីយ៍ឯក ប៊ុនស៊ីន ផាតក្លាង ដែលជាមេបញ្ជាការល្មោភសង្គ្រាមចង់វាយដណ្ដើមទឹកដី និងប្រាសាទរបស់កម្ពុជា។ ប៉ុន្តែក្រៅពីមេទ័ពរូបនេះហើយនោះ សារព័ត៌ត្រយងនឹងបង្ហាញមុខសុភាពបុរសក្លែងក្លាយ ឧត្តមសេនីយ៍ត្រី ណ័ត ស៊្រីអ៊ិន ដែលជាមេបញ្ជាការងភូមិភាគ២ ដែលមានរឿងជាច្រើនយើងតែគួរដឹងពីល្បិចធ្វើពុតជាញញឹមបន្លំចាប់ដៃកម្ពុជា ប៉ុន្តែចិញ្ចឹមចិត្តលេបត្របាក់ទឹកដីខ្មែរឱ្យទាល់តែបាន។ តើឧត្តមសេនីយ៍ត្រី ណ័ត ស៊្រីអ៊ិន ជាអ្នកណា?
ថ្មីៗនេះ មានលេចចេញនូវដំណឹងចចាមអារ៉ាមមួយដែលថាលោក ណ័ត ស្រ៊ីអ៊ីន គឺជាកូនអ្នកខេត្តបាត់ដំបង ដែលបានទៅធ្វើការនៅប្រទេសថៃ ហើយទទួលបានឱកាសរៀនសូត្រនិងបានចូលធ្វើជាយោធា រហូតទទួលបានឋាននន្តរសក្ដិធំ យ៉ាងណាមិញនោះវាគ្រាន់តែជាដំណឹងឮតៗគ្នា មិនមានប្រភពច្បាស់ទាល់តែសោះ ដូច្នេះត្រយងបានធ្វើការស្រាវជ្រាវហើយបានរកឃើញសាវតាពិត របស់បុរសយោធា ដែលប្រើល្បិចចាក់ពីក្រោយខ្នងកម្ពុជា មកលាតត្រដាងជូនជាដំណឹង។
ឧត្តមសេនីយ៍ត្រី ណ័ត ស៊្រីអ៊ិន ធ្លាប់ឆ្លងកាត់ជាសិស្សត្រៀមយោធាជំនាន់ទី ២៧ នៃសាលានាយទាហានប្រាក់ជុលចមក្លៅជំនាន់ទី ៣៨ ។ លោកជាកូនកសិករដែលរស់នៅក្នុងខេត្ត សុរិន្ទ មានសមត្ថភាពអាចនិយាយ និងប្រើប្រាស់ភាសាខ្មែរបានយ៉ាងស្ទាត់ជំនាញ ។ ចាប់តាំងពីបានចូលប្រើរាជការក្នុងជួរកងទ័ពមក លោកផ្ដើមពីតំណែងនាយទាហានរហូតក្លាយជាឧត្តមសេនីយ៍ត្រី ប្រចាំទិសភូមិភាគឥសានដែលមានព្រំប្រទល់ជាប់ខេត្តព្រះវិហារ។
ងាកមកចាប់អារម្មណ៍បន្តិច ក្នុងជួរទ័ព ឧត្តមសេនីយ៍ត្រី ណ័ត ស៊្រីអ៊ិន អតីតមេបញ្ជាការកងទ័ពល្បាតប៉ាក់ធុងឆៃ អតីតមេបញ្ជាការកងពលធំទី៦ និងអតីតមេបញ្ជាការកងកម្លាំងសុរ៉ាក់ណារី លោកគ្រប់គ្រងកងកម្លាំងទាំងមេបញ្ជាការអនុរក្ស ទាហានឈុតខ្មៅ និងទាហានឈុតឆ្នូត រហូតក្លាយជាអគ្គមេបញ្ជការកងទ័ពជើងគោកថែរក្សាការពារសន្តិសុខតាមព្រំដែនថៃ-កម្ពុជា និងថៃ-ឡាវ បើស្ដាប់មិនខុសទេនោះគឺតំបន់មុំ៣។
នៅក្នុងសមរភូមិសង្គ្រាមឆ្នាំ ២០០៨ ដល់ ២០១១ លោកធ្លាប់ជាមេទ័ពចម្បាំងដែលឈ្លានពានកម្ពុជាជាច្រើនលើកច្រើនសារដើម្បីដណ្ដើមទឹកដីតំបន់ប្រាសាទព្រះវិហារ។ កេរ្ដិ៍ឈ្មោះរបស់លោកត្រូវបានប្រជាជនថៃយល់ឃើញថា ទាហានខ្មែរភ័យខ្លាច និងភ័យបាក់ស្បាតបំផុត រហូតមានរហ័សនាមថា ជាមេទ័ពចម្បាំងអង់អាច និងជាអ្នកអភិវឌ្ឍន៍ដ៏ខ្លាំងម្នាក់។
ក្រៅពីនោះលោកធ្លាប់ចូលរួមសហប្រតិបត្តិការសម្របសម្រួលលើការចរចាបទឈប់បាញ់ក្នុងអំឡុងឆ្នាំ ២០១១ និងដកកម្លាំងទាហានចេញពីតំបន់ប្រាសាទព្រះវិហារ បន្ទាប់ តុលាការ ICJ បានប្រកាសក្នុងការសម្រេចចិត្តជាឯកច្ឆន្ទតាមសាលក្រមឆ្នាំ១៩៦២ របស់តុលាការអន្តរជាតិ ប្រគល់ប្រាសាទព្រះវិហារ និងចេញជុំវិញប្រាសាទដែលថៃអះអាងថាជារបស់ខ្លួនទាំងអស់ឱ្យមកកម្ពុជា ហើយភាគីថៃមានកាតព្វកិច្ចត្រូវតែដកកងទ័ព ប៉ូលិស ឬឆ្មាំថៃដែលឈរជើងក្នុងតំបន់ប្រាសាទព្រះវិហារទាំងអស់ចេញ ដោយគ្មានលក្ខខណ្ឌ នៅអំឡុងឆ្នាំ ២០១៣។
១២ ឆ្នាំបានកន្លងទៅដោយសុខសន្តិភាព និងមុនពេលមានជម្លោះជាមួយកម្ពុជានាពេលថ្មីៗនេះ មានរូបភាពជាច្រើនណាស់ដែលបានបង្ហោះពាសពេញបណ្ដាញសង្គមហ្វេសប៊ុក និងបណ្ដាសារព័ត៌មានរបស់ថៃ ដែលបញ្ជាក់ថា ឧត្តមសេនីយ៍ត្រី ណ័ត ស៊្រីអ៊ិន មេបញ្ជាការងភូមិភាគ២ថៃមានទំនាក់ទំនងស្និតរមួតជាមួយឧត្តមសេនីយ៍ឯក ស្រី ឌឹក មេបញ្ជាការរងកងទ័ពជើងគោក និងជាមេបញ្ជាការកងពលធំអន្តរាគមន៍លេខ៣ ដោយមានសកម្មភាពកិច្ចការងារសហប្រតិបត្តិការល្អនឹងគ្នាជាច្រើន រហូតដល់ប្រជាជនថៃទុកចិត្តថាមានតែឧត្តមសេនីយ៍ត្រី ណ័ត ស៊្រីអ៊ិន តែម្នាក់ប៉ុណ្ណោះទើបអាចបើកកិច្ចចរចាជាមួយទាហានរបស់កម្ពុជាបានបើចង់ឱ្យពួកគេដកកម្លាំងចេញរយៈចម្ងាយ ២០០ ម៉ែត្រ។
តើក្នុងជម្លោះជាមួយកម្ពុជាប្រហែល ៣ខែកន្លះ ភាគីថៃបានប្រើឧបាយកលនិងកលល្បិច អ្វីខ្លះ ដើម្បីសម្រេចគោលដៅចង់លេបត្របាក់ទឹកដីរបស់កម្ពុជាឱ្យទាល់តែបាន?
ពិតណាស់! នៅពីក្រោយស្នាមញញឹមរបស់សុភាពបុរសក្លែងក្លាយដែលបន្លំចាប់ដៃកម្ពុជារូបនេះ មានរឿងជាច្រើនណាស់ដែលយើងកត់ស្គាល់ឃើញថា ជនជាតិសៀមសុរិន្ទរូបនេះមានល្បិចកលព្រៃផ្សៃមកលើកម្ពុជាដោយចេតនា និងមានគម្រោងទុកជាមុន ៖
១.ភាគីថៃបង្កហេតុ និងបង្កើតជម្លោះមកលើកម្ពុជាមុន ដែលដើមចមនៃបញ្ហាជម្លោះព្រំដែនឆ្នាំ ២០២៥ នេះផ្ដើមចេញតំបន់មុំ ៣ ពីករណីទាហានថៃបានបាញ់សម្លាប់យោធាកម្ពុជានៅថ្ងៃទី២៨ ឧសភា ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ដែលកងទ័ពថៃបានធ្វើការបាញ់ប្រហារមុនមកលើលេណដ្ឋាន ដែលជាទីតាំងឈរជើងរបស់កងទ័ពកម្ពុជា ជាយូរណាស់មកហើយ ប៉ុន្តែភាគីថៃចោទប្រកាន់មកលើទាហានកម្ពុជាថា បានលបឆ្លងចូលទឹកដីថៃខុសច្បាប់ទៅវិញ។ ចុងបូក ឬមុំបីជាតំបន់ច្រមុះព្រំប្រទល់នៃប្រទេស៣មាន កម្ពុជា ថៃ និងឡាវ មានទីតាំងស្ថិតនៅលើដងភ្នំរែក មានខេត្តព្រះវិហារ(កម្ពុជា) ខេត្តអ៊ូប៊ុន(ថៃ) និងខេត្តចំប៉ាសាក់ (ឡាវ)។ ច្រកព្រំដែនប្រវត្តិសាស្ត្រនេះ បានទាក់ទាញចំណាប់អារម្មណ៍ជាថ្មី បន្ទាប់ពីមានការប៉ះទង្គិចគ្នាដោយអាវុធរយៈពេលខ្លីមួយរវាងកងទ័ពថៃ និងកម្ពុជា។
២.នៅថ្ងៃទី២៥ ខែកក្កដា ឆ្នាំ ២០២៥ កងទ័ពថៃ បានបើកការវាយប្រហារយ៉ាងសន្ធាប់មកលើទឹកដីកម្ពុជា តាំងពីព្រឹករំលងអធ្រាត្រម៉ោង ៣:២០ មកម្លេះដោយបានវាយលុកចំនួន៧ទីតាំង។ ក្នុងនោះមានតំបន់ភ្នំទ្រព្យ តាថាវ ភ្នំខ្មោច អូរផ្កាស្នេហ៍ មុំ៣ តាមាន់ធំ និងតំបន់តាក្របី។ ការវាយប្រហារ៣លើកនៅតំបន់ប្រាសាទព្រះវិហារ វត្តកែវសិក្ខាគិរីស្វារៈ នៅចន្លោះម៉ោង១២:៣០នាទី-១២:៤០នាទី ខណៈ១លើកទៀត ថៃបានទម្លាក់គ្រាប់បែកដោយ F-16 នៅតំបន់ប្រាសាទតាក្របី។ ក្នុងទម្រង់នៃការវាយលុកមកកាន់ទឹកដីកម្ពុជា គឺភាគីថៃ បានប្រើប្រាស់កាំភ្លើងធំផ្លោង ការប្រើប្រាស់យន្តហោះទម្លាក់គ្រាប់បែក F-16 ការប្រើរថក្រោះបាញ់សង្គ្រុប ការប្រើដ្រូនទម្លាក់គ្រាប់ ជាងនេះទៅទៀត គឺការប្រើប្រាស់គ្រាប់បែកចង្កោម ដែលខុសនឹងច្បាប់អន្តរជាតិ ព្រោះជាអាវុធសាហាវ និងបង្កគ្រោះថ្នាក់រយៈពេលវែង។
៣.អ្នកនាំពាក្យក្រសួងការពារជាតិបានបញ្ជាក់ថា វេលាម៉ោង៣៖១៧ល្ងាចថ្ងៃទី២៧ កក្កដា យោធាថៃ បានបើកយន្តហោះបាញ់ផ្សែងពុលនៅអានសេះ, ម៉ោង៤៖១២នាទី សភាពការណ៍នៅជប់គគីរ ថ្មដូន ថៃបានបាញ់ផ្លោងចូលដែនដីកម្ពុជាបន្ថែមទៀត ខណៈតំបន់ប្រាសាទតាមាន់ធំ ប្រាសាទតាក្របី ថៃបានផ្លោងចូលដូចភ្លៀងរលឹម។ នៅទិសទី១ តំបន់៥មករា ភ្នំខ្មោច អានសេះ កងទ័ពថៃ វាយប្រហារកាន់តែខ្លាំងក្លាឡើង។ យោធាថៃ បានប្រើយន្តហោះចម្បាំងបាញ់គ្រាប់រ៉ូកែតជាច្រើនគ្រាប់ នៅប្រាសាទតាមាន់ធំ ប្រាសាទតាក្របី និងទីតាំងមួយចំនួនទៀត ក្នុងដែនដីកម្ពុជា ពីម៉ោង១៖១០នាទីដល់ម៉ោង៤៖០០នាទី ថ្ងៃទី២៧ ខែកក្កដា ឆ្នាំ ២០២៥។ ត្រង់នេះគឺបានសបង្ហាញឱ្យឃើញហើយថា តំបន់ប្រតិបត្តិការដែលធ្លាប់តែមានភាពល្អូកល្អឺនដែលលោក ណ័ត ស៊្រីអ៊ីន សម្ដែង គឺគ្រាន់តែដើម្បីធ្វើឱ្យកម្ពុជាស្លាប់ចិត្ត និងភ្លេចខ្លួនប៉ុណ្ណោះ។
៤.នៅអំឡុងរំលងអាធាត្រថ្ងៃទី២៨ ខែកក្កដា ឆ្នាំ ២០២៥ ជាថ្ងៃដែលបទឈប់បាញ់បានចូលជាធរមាន តំបន់ដែលកាន់កាប់ដោយមេបញ្ជាការភូមិភាគ២ ប៊ុនស៊ីន ផាតក្លាង មានសភាពស្ងប់ស្ងាត់ ប៉ុន្តែស្រាប់តែលេចចេញនូវកលល្បិចរបស់ខាងភូមិភាគដែលកាន់កាប់ដោយឧត្តមសេនីយ៍ត្រី ណ័ត ស៊្រីអ៊ិន ទៅវិញ។ ទាហានកម្ពុជា ជិត២០នាក់ ត្រូវបានចាប់ខ្លួន ដោយទាហានថៃ ដែលបានប្រើកលល្បិចបញ្ឆោតឱ្យក្រុមទាហានខ្មែរថតរូបជាមួយពួកគេ រួចយកកាំភ្លើងភ្ជង់ចាប់ខ្លួនយកទៅទឹកដីថៃ នៅច្រកព្រំដែនជាំតែ ឃុំស្រអែម ស្រុកជាំក្សាន្ត ខេត្តព្រះវិហារ។ ទង្វើរបស់ទាហានថៃ គឺជាល្បិចកលកំសាកញី ព្រោះ សកម្មភាពរបស់កងទ័ពថៃ គឺលួចចាក់គេពីក្រោយខ្នង មិនសមជាកូនប្រុសទ្រូង៥ហត្ថដែលជាសសរទ្រូងរបស់ជាតិទាល់តែសោះ។
ថៃបន្តប្រើរុករានចូលអធិបតេយ្យភាពកម្ពុជាទាំងងងើល ព្រោះបន្ទាប់ពីថ្ងៃដែលអនុព័ន្ធយោធាជាច្រើនប្រទេសទៅអង្កេតការណ៍នៅតំបន់ច្រកអានសេះ ពោលនៅថ្ងៃទី ៤ ខែសីហា ឆ្នាំ ២០២៥ តំបន់អានសេះ ដែលរងការខូចខាតដោយសារសព្វាវុធរបស់កងទ័ពថៃ ត្រូវបានក្រុមយោធាថៃ រុលចូលមករាយបន្លាលួស និងប្រើគ្រឿងចក្រធន់ធំ ដាក់លូ កាយលេណដ្ឋាន ដោយប្រកាសថាជាដែនអធិបតេយ្យភាពរបស់ថៃទៅវិញ ខណៈកងទ័ពកម្ពុជា បានព្យាយាមទប់ស្កាត់ពួកគេអស់ពីកម្លាំងកាយ និងប្រឹងទប់មិនឱ្យមានការផ្ទុះអាវុធម្ដងទៀត ដែលល្មើសនឹងបទឈប់បាញ់។
៥. ភាគីថៃឈ្លានពានកម្ពុជាបណ្ដើរ ស្រែកប្រាប់ពិភពលោកថាខ្លួនជាជនរងគ្រោះបណ្ដើរ។ ថ្មីៗនេះ ថៃក៏បានប្រកាសជាព័ត៌មានក្ដែងៗថា មានកងទ័ពថៃដើរជាន់មីន ចំនួន៣នាក់ ដោយមានម្នាក់បានដាច់ជើងទាំងសងខាង។ សាច់រឿងដដែលនេះ ដូចកម្ពុជាបានឆ្លើយតបជារឿយៗហើយថា បើសិនថៃដើរជាន់មីនក្នុងដីថៃ នោះគឺជាមីនរបស់ថៃ តែបើថៃល្មើសរុលចូលដីកម្ពុជាហើយជាន់មីន គឺជាមីនចាស់ដែលសល់ពីសម័យសង្គ្រាម។
និយាយមកដល់នេះតើមានចំណុចត្រង់ណាដែលថៃគឺជាជនរងគ្រោះ ព្រោះសព្វថ្ងៃថៃ មិនបានគោរពបទឈប់បាញ់ ហើយនៅតែបន្តសកម្មភាពរុករុលចូលទឹកដីកម្ពុជា ដើម្បីរាយបន្លាលួស ឈូសឆាយផ្លូវចូលក្នុងដែនអធិបតេយ្យភាព និងបូរណភាពទឹកដីកម្ពុជា ព្រមទាំង ប្រើជំពាមកៅស៊ូជំនួសដោយកាំភ្លើងបាញ់មកលើកងទ័ពកម្ពុជា ថែមទាំងបែកធ្លាយ ពួកគេបានបង្កើតភស្តុតាងយកឯកសណ្ឋានទាហានកម្ពុជាទៅពាក់ ហើយថតសកម្មភាពកំពុងធ្វើជំពាមឈើ ដើម្បីចោទមកលើកម្ពុជា។ ខណៈដែលទាហានកម្ពុជាស្ដាប់តាមបទបញ្ជាពី មេបញ្ជាការយ៉ាងម៉ឺងម៉ាត់ គោរពនិងអនុវត្តន៍បទឈប់បាញ់យ៉ាងខ្ជាប់ខ្ជួន ត្រូវខាំមាត់សង្កត់ចិត្ត មិនតបត នឹងសកម្មភាពញុះញង់របស់ទ័ពឈ្លាន។
ប៉ុន្មានចំណុចនេះគ្រាន់តែជាការកត់សម្គាល់ខ្លះៗពីសកម្មភាពរបស់ភាគីថៃដែលបំពានមកលើកម្ពុជា ជាពិសេសតំបន់ទិសដែលកាន់កាប់ដោយឧត្តមសេនីយ៍ត្រី ណ័ត ស៊្រីអ៊ិន។ តើទាំងអស់នេះមិនមែនជាចេតនាគិតទុកជាមុនទេ? បើមើលការចេញផ្សាយដោយកាសែត Thairath បានលើកបទសម្ភាសន៍របស់ឧត្តមសេនីយ៍ត្រី ណ័ត ស៊្រីអ៊ិន មុនពេលមានបញ្ហាជាមួយកម្ពុជាថា ៖ «និយាយគ្នាបែបកូនប្រុស… មិនខាតសាច់ខាតឈាម មិនខូចទំនាក់ទំនង មិនខូចខាតសេដ្ឋកិច្ច» ពាក្យខ្លីនេះបានជំរុញឱ្យពលរដ្ឋខ្មែរយល់ខុសថា មេទ័ពដែលខ្មែរយើងងាយស្រួលនិយាយជាមួយជាងគេបំផុតគឺជារូបលោកនេះឯង ព្រោះជំហររបស់លោកត្រូវនឹងជំហររបស់រដ្ឋាភិបាលកម្ពុជា។
ផ្ទុយស្រឡះទៅវិញ បន្ទាប់ផ្ទុះអាវុធអស់ ៥ ថ្ងៃ មេទ័ពរងរូបនេះបោះសម្ដីថា ៖ « រាល់ពេលកន្លងមកនៃការវាយប្រហារកម្ពុជា ពួកគេគឺកាន់តែរឹងមាំឡើងៗ យើងបានបើកការវាយប្រហារតាមអាកាសជាច្រើនដង ប៉ុន្តែពួកគេនៅតែទប់បានដដែល ចង់ចល័តកម្លាំងដើម្បីសន្ធប់ពួកគេគឺមិនងាយស្រួលនោះទេ» ដែលសម្ដីនេះបានបង្ហាញពីការរៀបគម្រោងគិតទុកមុនចំពោះការវាយប្រហារមកលើកម្ពុជាជាច្រើនលើកច្រើនសាររបស់កងទ័ពថៃ។
អាវុធដែលផ្ទុះឡើងរវាងកម្ពុជា និងថៃលើកនេះ ភាគីកម្ពុជាជាអ្នករងគ្រោះខ្លាំង ដោយយោធាថៃបានតម្រង់ទិសមក តំបន់ប្រជាជនស្លូតត្រង់ វត្តអារាម ទីទួលប្រាសាទ ដែលខុសពីគោលដៅបន្ទាយយោធា និងទីបញ្ជាការយោធា ដែលថៃតែងតែបានអះអាងកុហកប្រជាជនខ្លួន និងបោកប្រាស់អន្តរជាតិ។
បើផ្អែកតាមព័ត៌មានកំណត់ត្រាសឹកសង្គ្រាម ភាគីថៃទម្លាក់គ្រាប់បែកពីយន្តហោះមានចំនួន១.៥៤៩គ្រាប់ ក្នុងនោះគ្រាប់បែក MK-84 មានទម្ងន់ជិតមួយតោនមានបណ្តោយប្រមាណ៣.៥ម៉ែត្រ ទំហំអង្កត់ផ្ចិតជិតកន្លះម៉ែត្រផលិតនៅឆ្នាំ១៩៩៦។ ភាគីថៃបានប្រើប្រាស់កាំភ្លើងធំ ១១៥មម ជាមួយកូនគ្រាប់បែកចង្កោមប្រភេទ M46 ដែលក្នុងគ្រាប់ផ្លោងមួយគ្រាប់មានកូនគ្រាប់បែកចំនួន ៥៦។ យ៉ាងណាមិញ អាជ្ញាធរព្រះវិហារបានបញ្ជាក់របាយការណ៍ដំបូងថា មានគ្រាប់ផ្លោងធុនធ្ងន់ចំនួន ៤៧គ្រាប់ដែលថៃបាញ់មកលើសម្បត្តិបេតិកភណ្ឌពិភពលោក គឺប្រាង្គប្រាសាទព្រះវិហារបង្ករការខូចខាតចំនួន១២៥កន្លែង ខូចខាតធ្ងន់ធ្ងរគោបុរ:ទី១និងទី២។
ជារួមមកវិញ ឧត្តមសេនីយ៍ត្រី ណ័ត ស៊្រីអ៊ិន ដែលធ្លាប់មានឈាមជាកូនអ្នកស្រែចម្ការរស់នៅក្នុងស្រុកសុរិន្ទអាចនិយាយភាសាខ្មែរបានរូបនេះ គឺមិនខុសអីពីជនជាតិថៃដទៃទៀតដែលចិញ្ជិមចិត្តចង់បានទឹកដី និងប្រាសាទរបស់ខ្មែរនោះទេ។ បុរសដែលគេធ្លាប់គិតថាជាប់សាច់ឈាមខ្មែរ អាចស្ដាប់យល់ពីសម្ដីរបស់ខ្មែរ ប្រហែលជាមិនពិបាកនិយាយគ្នារូបនេះ ក៏មិនខុសពីទាហានសៀមដទៃទៀតដែរ ព្រោះរូបគេបានសិក្សារៀនសូត្រ និងដុសខាត់លាងខួរក្បាលដោយយោធាថៃ ម្លោះហើយគ្មានអ្វីដែលធ្វើឱ្យរូបលោកត្រូវស្ទាក់ស្ទើចំពោះការវាយប្រហារមកលើកម្ពុជាដោយប្រើសព្វាវុធសង្គ្រាម ឬសព្វាវុធធ្ងន់ៗនោះទេ ត្បិតថារូបលោកមានអំនួត និង មិនចង់ឱ្យខូចឈ្មោះដែលត្រូវបានគេហៅថាមេទ័ពដែលទាហានខ្មែរភ័យបាក់ស្បាត ទាំងដែលការពិតអ្នកដែលភ័យបាក់ស្បាត គឺក្រុមទាហានរបស់លោកខ្លួនឯង មិនអ៊ីចឹងមិនមែន កំសាកញីហ៊ានប្រើល្បិចចាប់ដៃ ដើម្បីចាប់ទាហានខ្មែរ ដោយមិនខ្មាសអន្តរជាតិដូច្នេះទេ៕
