ក្រុមបាល់ទាត់នារី East Bengal របស់ឥណ្ឌា ទទួលបាន ៣ពិន្ទុ ក្រោយយកឈ្នះក្រុមនារីភ្នំពេញក្រោន កម្ពុជា ក្នុងវគ្គជម្រុះពានរង្វាន់ប្រចាំទ្វីបអាស៊ី AFC Women’s Champions League 2025/26 -Preliminary Stage ក្នុងពហុកីឡដ្ឋានជាតិអូលាំពិក នារាត្រីនេះ។
ក្រុមបាល់ទាត់នារីភ្នំពេញក្រោន ស្ថិតនៅពូល E ជាមួយក្រុមនារី Kitchee របស់ហុងកុង និងក្រុមនារី East Bengal របស់ឥណ្ឌា។ កម្មវិធីប្រកួតបន្ទាប់ ក្នុងពូល E រួមមាន៖
- ថ្ងៃទី២៥ សីហា៖ ក្រុមនារី ភ្នំពេញក្រោន (កម្ពុជា) ០-១ ក្រុមនារី East Bengal (ឥណ្ឌា)
- នៅថ្ងៃទី២៨ សីហា៖ ក្រុមនារី Kitchee (ហុងកុង) ជួប ក្រុមនារី ភ្នំពេញក្រោន (កម្ពុជា)
- នៅថ្ងៃទី២៨ សីហា៖ ក្រុមនារី East Bengal (ឥណ្ឌា) ជួប ក្រុមនារី Kitchee (ហុងកុង)
សម្រាប់រូបនម្តកៃការប្រកួត ក្រុមដែលមានពិន្ទុខ្ពស់ជាងគេមួយក្រុម នឹងឡើងទៅកាន់វគ្គចែកពូល ដែលនឹងទទួលបានកញ្ចក់ទឹកប្រាក់ ១០ម៉ឺនដុល្លារ ក្នុងការឈានដល់វគ្គ Group stageនេះ ទទួលបាន ៨ម៉ឺនដុល្លាបន្ថែមទៀតប្រសិនបើឡើងដល់វគ្គពាក់កណ្តាលផ្តាច់ព្រ័ត្រ និងវគ្គផ្ដាច់ព្រ័ត្របាន ១២ម៉ឺនដុល្លារ។ ខណ:ម្ចាស់ជើងឯកបានប្រាក់រង្វាន់ ១លានដុល្លារ ជើងឯករងបាន ៥០ម៉ឺនដុល្លារ។
ពានរង្វាន់ប្រចាំទ្វីបអាស៊ី AFC Women’s Champions League បង្កើតឡើងដំបូងនៅរដូវកាលឆ្នាំ២០២៤-២៥ មានក្រុមមកពី ២១ប្រទេសចូលរួមប្រកួតប្រជែង។ ការប្រកួតមាន ៣ដំណាក់កាលគឺ វគ្គជម្រុះ Preliminary stage វគ្គ Group stage និងវគ្គ Knockout stage។
រំលឹកដែរថា នៅរដូវកាលដំបូងឆ្នាំ២០២៤-២៥ ក្រុមបាល់ទាត់នារី Wuhan Jiangda របស់ប្រទេសចិន បានក្លាយជាម្ចាស់ជើងឯក ដោយយកឈ្នះក្រុម Melbourne City របស់អូស្ត្រាលី កាលពីថ្ងៃទី២៤ ខែឧសសភា ក្នុងមជ្ឈមណ្ឌល Wuhan Sports Center ប្រទេសចិន។
គួរបញ្ជាក់ថា ក្រុមនារីភ្នំពេញក្រោន ក្លាយជាម្ចាស់ជើងឯក នៃពានរង្វាន់ជើងឯកលីគនារីកម្ពុជា Cambodian Women League 2024-25 ក្រោយយកឈ្នះ ក្រុមនារីវិសាខា នៅវគ្គផ្ដាច់ព្រ័ត្រ ក្នុងលទ្ធផល ២-០ នាល្ងាចថ្ងៃទី៨ កុម្ភ: នៅក្នុងកីឡដ្ឋានកងយោធពលខេមរភូមិន្ទ (ស្តាតចាស់)៕
