កាលពីអត្ថបទមុនសារព័ត៌មានត្រយងបានសរសេររៀបរាប់អំពីផលប៉ះពាលរបស់ ម៉ាស៊ីនសំលេង LRAD ដែលទ័ពថៃប្រើទល់ពលរដ្ឋកម្ពុជា ក្រោយរាយបន្លាលួសមិនបានសម្រេច បង្កគ្រោះថ្នាក់បែបណាខ្លះ?
ហេតុដូចនេះយើងដឹងហើយថា ម៉ាស៊ីនសំលេង LRAD គឺជាឧបករណ៍បំពងសម្លេងដ៏មានថាមពល ដែលគេប្រើដើម្បីបន្លឺសំឡេងព្រមាន ឬសំឡេងខ្លាំងៗទៅកាន់ទីតាំងជាក់លាក់មួយ។ សំឡេងរបស់ វាអាចបង្កជាផលប៉ះពាល់ដល់សុខភាពត្រចៀកធ្ងន់ធ្ងរ ដូចជាអាចធ្វើឱ្យថ្លង់ជាដើម។ ដូចនេះយើងនឹងមកដឹងពីវិធីបង្កា ក៏ដូចជារបៀបការពារខ្លួនពីសំឡេងអាកូស្ទិក ដែលសៀមបានប្រើដើម្បីបំបែកកម្លាំងសាមគ្គីប្រជាជនខ្មែរ។
របៀបការពារខ្លួនពី ម៉ាស៊ីនសំលេង LRAD (ដែលជាឧបករណ៍សំឡេងអាកូស្ទិកចម្ងាយឆ្ងាយ) គឺសំខាន់ណាស់ ព្រោះវាអាចប៉ះពាល់ដល់ត្រចៀក និងសុខភាពប្រព័ន្ធប្រសាទ។
ទី១ នៅឱ្យឆ្ងាយពីប្រភពសម្លេង ចល័តចេញពីតំបន់មានសំឡេងខ្លាំង៖ វិធីល្អបំផុត គឺព្យាយាមនៅឱ្យឆ្ងាយពីឧបករណ៍ LRAD ឱ្យបានច្រើនតាមដែលអាចធ្វើទៅបាន។ ប្រសិនបើអ្នកលឺសំឡេងបំពងខ្លាំងខុសប្រក្រតី គួរតែចៀសចេញពីកន្លែងនោះភ្លាមៗ។ LRAD អាចដំណើរការបានពីចម្ងាយ 300–1000m។ ត្រូវផ្លាស់ទីឆ្ងាយចេញពីទិសដែលបញ្ចេញសំឡេង ឬរកជញ្ជាំង/អគារជាការពារ។
ទី២ ការពារ ឬបិទបាំងត្រចៀក (Hearing Protection)៖ ប្រើប្រាស់សម្ភារៈណាមួយដែលនៅជិតដៃដើម្បីបិទបាំងត្រចៀករបស់អ្នក ដូចជាដៃ, ស្រោមដៃ, ស្លាបត្រចៀកបិទ ឬក្រមាជាដើម ត្រចៀកបិទជិតរឹតតែល្អ ដែលអាចកាត់បន្ថយកម្រិតសំឡេងបាន។ ប្រសិនបើគ្មានឧបករណ៍អាជីព អាចប្រើក្រណាត់ក្រាស់ៗ ឬអាវដាក់បិតត្រចៀកបណ្ដោះអាសន្ន។
ទី៣ ប្រើប្រាស់សម្ភារៈការពារ ប្រើរបាំង ឬវត្ថុបិទបាំង៖ ប្រសិនបើអ្នកមានសម្ភារៈការពារត្រចៀកដូចជាកាស ឬអឺរផ្ល័ក (earplugs) អាចជួយកាត់បន្ថយឥទ្ធិពលនៃសំឡេងបានយ៉ាងល្អ។ ជញ្ជាំង ប្លាស្ទិកក្រាស់ ឬរថយន្តអាចកាត់បន្ថយកម្លាំងរលកសំឡេង។ ការប្រើ សំឡេងផ្ទុយ ឬឧបករណ៍កាត់សំឡេង ក៏អាចជួយបាន។
ទី៤ បែរខ្នងចេញពីប្រភពសម្លេង៖ ប្រសិនបើអ្នកមិនអាចគេចចេញពីតំបន់នោះបានទេ សូមព្យាយាមបែរខ្នងឱ្យឆ្ងាយពីទិសដៅដែលសំឡេងនោះបន្លឺមក។ វានឹងជួយកាត់បន្ថយការប៉ះពាល់ដោយផ្ទាល់មកលើត្រចៀករបស់អ្នក។
ទី៥ អង្គុយចុះ៖ ការអង្គុយ ឬដេកចុះ អាចជួយកាត់បន្ថយការប៉ះពាល់សំឡេងបានមួយផ្នែក ព្រោះសំឡេងពី LRAD ភាគច្រើនតែងតែបាញ់ត្រង់ទៅមុខ។
ទី៦ ការពារផ្លូវចិត្ត និងរាងកាយ៖ រក្សាអារម្មណ៍ឱ្យស្ងប់ ព្រោះសំឡេងខ្លាំងអាចបង្កការភ័យខ្លាច។ បើមានវិលមុខ ឬឈឺក្បាល ត្រូវចាកចេញភ្លាមៗ។
ទី៧ ការពារក្រុមងាយរងគ្រោះ៖ កុមារ មនុស្សចាស់ និងសត្វតូចៗ មានហានិភ័យខ្ពស់ ត្រូវនាំចេញពីតំបន់ប្រើ LRAD ដោយឆាប់រហ័ស។
ម៉ាស៊ីនបំពងសំឡេង LRAD អាចផ្ដល់ផលប៉ះពាល់ដល់មនុស្សអាស្រ័យលើកម្រិតសំឡេង និងចម្ងាយដែលគេប្រើប្រាស់វា។ ផលប៉ះពាល់ទាំងនោះអាចមានទាំងផ្លូវកាយ និងផ្លូវចិត្ត មានដូចតទៅ៖
ទី១ ឈឺចាប់ត្រចៀក និងបាត់បង់ការស្តាប់ជាបណ្តោះអាសន្ន ឬជាអចិន្ត្រៃយ៍៖ នៅកម្រិតសំឡេងខ្លាំងខ្លាំង (លើសពី 120 dB) ដូចជាពេលគេប្រើ LRAD ជិតៗ វាអាចបង្កឱ្យមានការឈឺចាប់ត្រចៀកយ៉ាងខ្លាំង និងខូចខាតក្រដាសត្រចៀកបាន។ ប្រសិនបើប៉ះពាល់ញឹកញាប់ ឬយូរពេក វាអាចបណ្ដាលឱ្យបាត់បង់ការស្តាប់ជាអចិន្ត្រៃយ៍។
ទី២ ឈឺក្បាល និងវិលមុខ៖ រលកសំឡេងខ្លាំងអាចបង្កឱ្យមានសម្ពាធលើក្បាល ដែលនាំឱ្យឈឺក្បាល និងវិលមុខ។
ទី៣ ក្អួតចង្អោរ និងឈឺចាប់ក្នុងខ្លួន៖ រលកសំឡេងខ្លាំងអាចរំញ័រផ្នែកខាងក្នុងនៃរាងកាយ បង្កឱ្យមានអារម្មណ៍ចង្អោរ និងមិនស្រួលក្នុងខ្លួន។
ទី៤ ភាពភ័យខ្លាច និងការតក់ស្លុត៖ សំឡេងដ៏ខ្លាំងដែលលឺភ្លាមៗ អាចបង្កឱ្យមានអារម្មណ៍ភ័យខ្លាច ភ័យស្លន់ស្លោ និងការតក់ស្លុត។
ទី៥ ការបាត់បង់សតិអារម្មណ៍៖ ក្នុងស្ថានភាពខ្លះ សំឡេងខ្លាំងអាចធ្វើឱ្យមនុស្សបាត់បង់ការគិត និងការផ្ដោតអារម្មណ៍ ដែលធ្វើឱ្យពួកគេពិបាកក្នុងការឆ្លើយតបទៅនឹងស្ថានភាពជុំវិញ។
សូមជម្រាបជូនថា ទាហានថៃដាក់ស៊ីរ៉ែនរលកសម្លេង (ម៉ាស៊ីនសំលេង LRAD (Long Range Acoustic Device)) ទប់ទល់ជាមួយប្រជាពលរដ្ឋខ្មែរ នៅអំឡុងពលរដ្ឋខ្មែរ ទប់ទល់ទាហានថៃ ចង់ដាក់លួសបន្លាក្នុងទឹកដីកម្ពុជា នៅក្នុងភូមិសាស្ដ្រ នៃភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី ២៥ សីហា ឆ្នាំ ២០២៥៕
