យោងតាមកាសែត DW ចេញផ្សាយថ្មីៗនេះ ទីក្រុងម៉ូស្គូ និងក្រុងកៀវបានដោះដូរអ្នកទោសគ្នានៅថ្ងៃអាទិត្យ រួមមានទាំងបុគ្គលិកយោធា និងជនស៊ីវិល ហើយនេះគឺជាការដោះដូរចុងក្រោយបង្អស់នៃការដោះដូរអ្នកទោសគ្នាបែបនេះ ដែលបានចាប់ផ្តើមនៅដើមឆ្នាំ២០២៥នេះ។
ក្រសួងការពារជាតិរុស្ស៊ីបានសរសេរនៅលើ Telegram ថា «នៅថ្ងៃទី ២៤ ខែសីហា ទាហានរុស្ស៊ី ១៤៦ នាក់ត្រូវបាននាំត្រឡប់មកវិញ» ដោយបន្ថែមថា «អ្នកទោសសង្គ្រាម ១៤៦ នាក់ក៏ត្រូវបានបញ្ជូនត្រឡប់ទៅអ៊ុយក្រែនផងដែរ»។
ទីក្រុងកៀវបានបញ្ជាក់ពីការដោះដូរនេះ ប៉ុន្តែមិនបានបញ្ជាក់ចំនួនមនុស្សដែលត្រូវបាននាំត្រឡប់មកវិញ ឬឆ្លើយតបការអះអាងរបស់រុស្ស៊ីថា ៨ នាក់ក្នុងចំណោមអ្នកត្រូវបាននាំត្រឡប់មកវិញជាជនស៊ីវិលដែល «ត្រូវបានឃុំខ្លួន» ពីតំបន់ព្រំដែន Kursk នោះទេ។
អ្នកទោសអ៊ុយក្រែនល្បីឈ្មោះពីរនាក់ដែលត្រូវបាននាំត្រឡប់មកវិញនៅថ្ងៃអាទិត្យរួមមានអ្នកកាសែត Dmytro Khyliuk ដែលត្រូវបានចាប់ពង្រត់នៅឆ្នាំ ២០២២ និងអតីតអភិបាលក្រុង Kherson លោក Volodymyr Mykolayenko «ដែលបានចំណាយពេលជាងបីឆ្នាំក្នុងការជាប់ឃុំ» នេះបើយោងតាមជំនួយការរបស់ប្រធានាធិបតី Zelenskyy ។
ការដោះដូរអ្នកទោសគឺជាលទ្ធផលជាក់ស្តែងមួយក្នុងចំណោមលទ្ធផលតិចតួចនៃកិច្ចខិតខំប្រឹងប្រែងការទូតដ៏យូរអង្វែងដើម្បីបញ្ចប់ជម្លោះនៅអ៊ុយក្រែនពេញមួយឆ្នាំ ២០២៥ នេះ៕
