លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានមានប្រសាសន៍ថា សកម្មភាពរបស់ទាហានថៃ ដែលរាយបន្លាលួសចូលក្នុងទឹកដីកម្ពុជា និងប្រើប្រាស់ឧបករណ៍ ស៊ីរ៉ែនរលកសម្លេង ដើម្បីទប់ទល់ជាមួយប្រជាពលរដ្ឋកម្ពុជា ដែលកំពុងតវ៉ាដើម្បីការពារដីធ្លីផ្ទះរបស់ខ្លួន គឺជាទង្វើរំលោភសិទ្ធិមនុស្សយ៉ាងធ្ងន់ធ្ងរ។
កាលពីថ្ងៃទី២៥ ខែសីហា ឆ្នាំ២០២៥កន្លងទៅនេះ ក្រុមទាហានថៃ បានប៉ុនប៉ងរាយបន្លាលួស នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ និងមានការប៉ះទង្គិចគ្នាជាមួយពលរដ្ឋកម្ពុជា ហើយថៃបានប្រើប្រាស់ឧបករណ៍ LRAD (Long Range Acoustic Device) ដើម្បីរុញច្រានឱ្យប្រជាពលរដ្ឋខ្មែរចេញ។
សូមចុចអាន៖ ម៉ាស៊ីនសំលេង LRAD ដែលថៃ ប្រើទល់ពលរដ្ឋកម្ពុជា ក្រោយរាយបន្លាលួសមិនបានសម្រេច បង្កគ្រោះថ្នាក់បែបណាខ្លះ?
យោងតាមវិបសាយ acentech.com en.wikipedia.org បានសរសេរថា LRAD (Long Range Acoustic Device) គឺជាប្រភេទឧបករណ៍ Acoustic Hailing Device (AHD) ដែលប្រើសម្រាប់ផ្ញើសារក្នុងចម្ងាយឆ្ងាយ។ ប្រព័ន្ធ LRAD ផលិតកម្រិតសំឡេង ខ្ពស់ជាងឧបករណ៍បំពងសំឡេងធម្មតា។ វាជាឧបករណ៍ បំពងសំឡេង ពិសេសមួយប្រភេទ ដែលមានសមត្ថភាពបញ្ចេញសំឡេងខ្លាំង និងច្បាស់ល្អ ទៅកាន់ចម្ងាយឆ្ងាយ។ LRAD ត្រូវបានគេប្រើប្រាស់ជាចម្បងក្នុងវិស័យជាច្រើន រួមមាន៖ ការគ្រប់គ្រងហ្វូងមនុស្ស (Crowd Control) អាជ្ញាធរអនុវត្តច្បាប់អាចប្រើ LRAD ដើម្បីទំនាក់ទំនងជាមួយហ្វូងបាតុករ ឬហ្វូងមនុស្សធំៗ ពីចម្ងាយដោយសុវត្ថិភាព ដើម្បីផ្តល់សារណែនាំ ឬការព្រមាន។
ប្រភពដដែលបានសរសេរទៀតថា ម៉ាស៊ីនបំពងសំឡេង LRAD អាចផ្ដល់ផលប៉ះពាល់ដល់មនុស្សអាស្រ័យលើកម្រិតសំឡេង និងចម្ងាយដែលគេប្រើប្រាស់វា។ ផលប៉ះពាល់ទាំងនោះអាចមានទាំងផ្លូវកាយ និងផ្លូវចិត្ត មានដូច ឈឺចាប់ត្រចៀក និងបាត់បង់ការស្តាប់ជាបណ្តោះអាសន្ន ឬជាអចិន្ត្រៃយ៍, ឈឺក្បាល និងវិលមុខការខូចប្រព័ន្ធសរសៃប្រសាទ បង្កការភ័យខ្លាច ស្រួចស្រាវ និង ការបាត់បង់សតិអារម្មណ៍ជាដើម។
សូមចុចអាន៖ មកដឹងរបៀបការពារខ្លួនពីម៉ាស៊ីនសំលេង LRADដែលទ័ពថៃប្រើ ដើមម្បីបំបែកកម្លាំងសាមគ្គីប្រជាជនខ្មែរ
ការប្រើប្រាស់ឧបករណ៍ LRAD ដែលជាឧបករណ៍ស៊ីរ៉ែនរលកសម្លេងដើម្បីបំបែកហ្វូងអ្នកតវ៉ារបស់កម្ពុជានេះ គឺជាផ្នែកមួយនៃអាវុធដែលថៃបានប្រើប្រាស់នៅក្នុងការប៉ះទង្គិចគ្នារយៈពេល៤យប់៥ថ្ងៃ ដែលក្នុងនោះរួមមាន យន្តហោះចម្បាំង F-16, គ្រាប់បែកចង្កោម និងផ្សែងពុល ដើម្បីឈ្លានពានលើទឹកដីកម្ពុជា។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានចាត់ទុកថា ទង្វើរបស់ថៃទាំងអស់នេះ ស្ថិតនៅបទល្មើសសង្គ្រាម និងការរំលោភបំពានច្បាប់អន្តរជាតិ ដែលថៃបានបំពាន
- បទឈប់បាញ់រវាងកម្ពុជា–ថៃ
- សន្ធិសញ្ញាបារាំង–សៀម ឆ្នាំ ១៩០៧
- អនុស្សរណៈយោជគ ឆ្នាំ ២០០០
- សាលក្រមតុលាការអន្តរជាតិ (ICJ) ឆ្នាំ ១៩៦២ និងសាលក្រមបកស្រាយឡើងវិញ ឆ្នាំ ២០១៣ ពាក់ព័ន្ធនឹងប្រាសាទព្រះវិហារ។
លោកបណ្ឌិត គិន ភា បានបញ្ជាក់ថា ទង្វើរបស់ថៃក្នុងជម្លោះ ៥ថ្ងៃចុងក្រោយ គឺជាការរំលោភច្បាប់អន្តរជាតិ និងអាចនាំឲ្យថៃទទួលខុសត្រូវចំពោះ ឧក្រិដ្ឋសង្គ្រាម, ឧក្រិដ្ឋកម្មប្រឆាំងមនុស្សជាតិ និងការរំលោភសិទ្ធិមនុស្សធ្ងន់ធ្ងរ។ ព្រោះថៃបានប្រើអាវុធធ្ងន់វាយប្រហារលើសាលារៀន វត្តអារាម ផ្លូវថ្នល់ និងសម្បត្តិបេតិកភណ្ឌជាតិរបស់កម្ពុជា បណ្តាលឲ្យមានការស្លាប់មនុស្ស និងការខូចខាតយ៉ាងធ្ងន់ធ្ងរ៕
សូមស្ដាប់កិច្ចសម្ភាសន៍ទាំងស្រុង រវាងលោក ប៊ិន ប៊ុណ្ណា អ្នករាយការណ៍ព័ត៌មានត្រយង និងលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា