ភារកិច្ចចុងក្រោយរបស់ក្រុមជម្រើសជាតិកម្ពុជា អាយុក្រោម ២៣ឆ្នាំ ក្រោមការដឹកនាំរបស់លោក Koji Gyotoku គ្រូបង្វឹកជនជាតិជប៉ុន ក្នុងការប្រកួតវគ្គជម្រុះក្នុងពូល G ពានរង្វាន់កម្រិតទ្វីប AFC Asian Cup Saudi Arabia 2026 ត្រូវបានបញ្ចប់ ដោយបន្សល់នូវប្រវត្តិសាស្រ្តថ្មី។
៣ប្រកួតរបស់ U23 កម្ពុជា គឺអាចរកបាន៥ពិន្ទុ ឈរលេខ២ក្នុងពូល ក្រោយស្មើជាមួយអូម៉ង់ នៅប្រកួតទី១ ដោយលទ្ធផល ០-០ និងឈ្នះក្រុមប៉ាគីស្ថាន ប្រកួតទី២ ដោយលទ្ធផល ០-១ និងប្រកួតចុងក្រោយ ស្មើជាមួយស្មើជាមួយអ៊ីរ៉ាក់ ០-០។
ក្រឡេកមកមើល កំណត់ត្រាសំខាន់របស់ U23 កម្ពុជា ក្នុងវគ្គជម្រុះជើងឯកប្រចាំទ្វីបដែលមិនសូវមានអ្នកដឹង៖
U23 កម្ពុជា បានបង្កើតប្រវត្តិសាស្រ្តថ្មី ប្រកួតមិនចាញ់សោះ ៣ប្រកួតក្នុងវគ្គជម្រុះក្នុងពូល ពិសេសមិនរបូតគ្រាប់បាល់សោះ
យ៉ែម ដេវីត ជាប់ឈ្មោះជាកីឡាករទី១៧ ដែលទាត់ចូលគ្រាប់ទី២៤ ឱ្យកម្ពុជា
អ្នកចាំទី រ៉េត លីហេង បំបែកកំណត់ត្រារាមច្បងចាស់ៗ នឹងសាងកំណត់ត្រាថ្មីដែលមិនធ្លាប់មាន ៣ប្រកួតមិរបូតគ្រាប់បាល់សោះ
លោក Koji Gytoku ជាគ្រូដំបូង ដែលសាងកំណត់ត្រាមិនចាញ់សោះ ហើយជាគ្រូដឹកនាំ U23 កម្ពុជា បានច្រើនជំនាន់ជាងគេ
- វគ្គជម្រុះឆ្នាំ២០១២ ក្រោមការដឹងនាំរបស់លោក ប្រាក់ សុមន្នី៖ ឆ្លងកាត់ ៥ប្រកួត ឈ្នះ១ ស្មើ១ និងចាញ់៣ប្រកួត
- វគ្គជម្រុះឆ្នាំ២០១៥ ក្រោមការដឹងនាំរបស់លោក Lee tae Hoon៖ ឆ្លងកាត់ ៣ប្រកួត ឈ្នះ១ និងចាញ់ ២ប្រកួត
- វគ្គជម្រុះឆ្នាំ២០១៧ ក្រោមការដឹងនាំរបស់លោក Leonado Vitorino៖ ឆ្លងកាត់ ៣ប្រកួត ឈ្នះ១ ស្មើ១ និងចាញ់ ១ប្រកួត
- វគ្គជម្រុះឆ្នាំ២០១៩ ក្រោមការដឹងនាំរបស់លោក Felix Dalmas៖ ឆ្លងកាត់ ៣ប្រកួត ស្មើ១ និងចាញ់ ២ប្រកួត
- វគ្គជម្រុះឆ្នាំ២០២១ ក្រោមការដឹងនាំរបស់លោក Hirose Ryu៖ ឆ្លងកាត់ ២ប្រកួត ឈ្នះ១ និងចាញ់ ១ប្រកួត
- វគ្គជម្រុះឆ្នាំ២០២៣ ក្រោមការដឹងនាំរបស់លោក koji Gytoku៖ ឆ្លងកាត់ ៣ប្រកួត ឈ្នះ១ ស្មើ១ និងចាញ់ ១ប្រកួត
អតីតសមាជិកជម្រើសជាតិកម្ពុជា៧នាក់ នៅពីក្រុមក្រុម U23 កម្ពុជា រួមមាន៖ លោក អ៊ុក សុធី លោក ទុំ សារាយ លោក ឃួន ឡាបូរ៉ាវិ លោក ឡាយ រស្មី លោក ឃឹម បូរី លោក ហែម ស៊ីមៃ និងអ្នកចាំទី អ៊ុំ សេរីរ័ត។
ការប្រកួតវគ្គជម្រុះនេះ ប្រមូលផ្តុំទៅដោយក្រុមជម្រើសជាតិអាយុក្រោម ២៣ឆ្នាំ ចំនួន ៤៤ក្រុម ដោយចែកចេញជា ១១ពូល។ ក្រុមដែលមានចំណាត់ថ្នាក់ លេខ១ ក្នុងពូលនីមួយៗ និងក្រុមក្រុមលេខ២ ល្អចំនួន៤ក្រុម នឹងឡើងទៅប្រកួតជុំផ្ដាច់ព្រ័ត្រ ធ្វើឡើងនៅប្រទេសអារ៉ាប៊ីសាអូឌីត នាឆ្នាំ២០២៦ខាងមុខ។
គួរបញ្ជាក់ថា ការប្រកួតពានរង្វាន់ជើងឯកយុវជនអាយុក្រោម ២៣ឆ្នាំ ប្រចាំទ្វីបអាស៊ី AFC U-23 Asian Cup បង្កើតឡើងដំបូងនៅឆ្នាំ២០១៣ ដោយជប៉ុន ជាក្រុមឈ្នះជើងឯកច្រើនជាងគេ ចំនួន ២លើក (២០១៦,២០២៤) ខណ: អ៊ូសបេគីស្ថាន ១លើក ២០១៨ អារ៉ាប៊ីសាអូឌីត ១លើក ២០២២ កូរ៉េខាងត្បូង ១លើក ២០២០ និងអ៊ីរ៉ាក់ ១លើក ២០១៣៕
