ភ្នំពេញ៖ ប្រធានរដ្ឋសភាកម្ពុជា សម្តេចមហារដ្ឋសភាធិការធិបតី ឃួន សុដារី បានអំពាវនាវឱ្យសហគមន៍អន្តរជាតិ និងសមាជិកអន្តរសភាអាស៊ាន (AIPA) ជួយបន្តតាមដានការអនុវត្តបទឈប់បាញ់រវាងកម្ពុជា និងថៃ ដែលកំពុងតែមានភាពផុយស្រួយ។ ការអំពាវនាវនេះបានធ្វើឡើងក្នុងកិច្ចប្រជុំគណៈកម្មាធិការប្រតិបត្តិ AIPA លើកទី៤៦ នៅទីក្រុងគូឡាឡាំពួ។
សម្តេចប្រធានសភាបានលើកឡើងថា ទោះបីមានកិច្ចព្រមព្រៀងបទឈប់បាញ់ក៏ដោយ ក៏មានសកម្មភាពរំលោភបំពានជាបន្តបន្ទាប់ពីសំណាក់ភាគីថៃ ដូចជា៖
- ការឃុំខ្លួនទាហានកម្ពុជា ១៨ នាក់ដោយខុសច្បាប់
- ការរាយលួសបន្លាខុសច្បាប់
- ការប្រើប្រាស់កម្លាំងយោធាប្រឆាំងនឹងជនស៊ីវិលកម្ពុជា ដែលបានបណ្ដាលឱ្យមានអ្នករងរបួស ២៨ នាក់ កាលពីម្សិលមិញ
សម្តេច ឃួន សុដារី បានស្នើឱ្យមានបេសកកម្មស្វែងរកការពិតអន្តរជាតិជាបន្ទាន់ ដើម្បីវាយតម្លៃស្ថានភាពជាក់ស្ដែងនៅនឹងកន្លែង។ សម្តេចបានបញ្ជាក់ថា ការកសាងទំនុកចិត្តរវាងប្រទេសទាំងពីរទាមទារឱ្យមានសុច្ឆន្ទៈ និងភាពស្មោះត្រង់ពិតប្រាកដ។ ភាគីដែលបំពានត្រូវតែទទួលការថ្កោលទោស ឬដាក់ទណ្ឌកម្ម។
លើសពីនេះ ប្រធានសភាបានសម្តែងក្ដីព្រួយបារម្ភយ៉ាងខ្លាំងថា ការបន្តបំពានលើបទឈប់បាញ់អាចនឹងនាំឱ្យមានការផ្ទុះឡើងវិញនូវជម្លោះប្រដាប់អាវុធ។ ដើម្បីទប់ស្កាត់នូវហានិភ័យនេះ សម្តេចបានអំពាវនាវឱ្យគ្រប់ភាគីជៀសវាងរាល់សកម្មភាពណាដែលបង្កឱ្យមានភាពតានតឹងកាន់តែខ្លាំង។
ក្នុងនាមសភាកម្ពុជា សម្តេចបានបញ្ជាក់ថា កម្ពុជាគាំទ្រដល់ក្រុមអ្នកសង្កេតការណ៍អន្តរជាតិ ហើយបានស្នើឱ្យមានការបញ្ជូនក្រុមអ្នកសង្កេតការណ៍អាស៊ាន (AOT) ទៅកាន់តំបន់កើតហេតុឱ្យបានឆាប់រហ័ស។ ថៃត្រូវតែបញ្ឈប់ការប្រើប្រាស់កម្លាំងយោធាដើម្បីបោះបង្គោលព្រំដែន ហើយទុកកិច្ចការនេះឱ្យគណៈកម្មការព្រំដែនចម្រុះ (JBC) ដោះស្រាយតាមមធ្យោបាយសន្តិវិធី និងច្បាប់អន្តរជាតិ៕
