ក្រសួងការបរទេស និងកិច្ចសហប្រតិបត្តិការអន្តរជាតិនៃព្រះរាជាណាចក្រកម្ពុជា បានចេញសេចក្តីថ្លែងការណ៍មួយនៅថ្ងៃទី២៣ ខែកញ្ញា ឆ្នាំ២០២៥ ដើម្បីឆ្លើយតបទៅនឹងការអះអាងរបស់អ្នកនាំពាក្យក្រសួងការបរទេសថៃ ដែលថាប្រជាពលរដ្ឋកម្ពុជានៅភូមិព្រៃចាន់ បានទន្ទ្រានចូលទឹកដីថៃដើម្បីធ្វើបាតុកម្ម។ ក្រសួងបានចាត់ទុកការអះអាងនេះថាជាការបំភ្លៃការពិត ហើយបានពន្យល់ពីជំហររបស់ខ្លួនដូចខាងក្រោម៖
១. ការបំពានលើអនុស្សរណៈនៃការយោគយល់គ្នាឆ្នាំ២០០០
ក្រសួងបានបញ្ជាក់ថា ថៃមិនអាចអនុវត្តច្បាប់ក្នុងស្រុករបស់ខ្លួន ឬទាមទារអធិបតេយ្យភាពនៅក្នុងតំបន់ព្រំដែនដែលមិនទាន់បានកំណត់ព្រំដែនជាផ្លូវការនោះទេ។ ប្រជាពលរដ្ឋខ្មែរនៅភូមិព្រៃចាន់ ឃុំអូរបីជាន់ ខេត្តបន្ទាយមានជ័យ បានរស់នៅទីនោះតាំងពីយូរយារណាស់មកហើយ មុនពេលចុះហត្ថលេខាលើអនុស្សរណៈនៃការយោគយល់គ្នាស្តីពីការវាស់វែង និងខណ្ឌសីមាព្រំដែនគោកនៅឆ្នាំ២០០០។ អនុស្សរណៈនេះតម្រូវឱ្យភាគីទាំងពីររក្សាស្ថានភាពដើមរហូតដល់ការងារកំណត់ព្រំដែនបានបញ្ចប់។
២. ការតវ៉ាដោយសារការរំលោភបំពានលើទ្រព្យសម្បត្តិ
ក្រសួងបានអះអាងថា ការតវ៉ារបស់ប្រជាពលរដ្ឋកម្ពុជា គឺជាការឆ្លើយតបទៅនឹងការរំលោភបំពានលើទ្រព្យសម្បត្តិ និងផ្ទះសម្បែងរបស់ពួកគេ ដែលត្រូវបានហ៊ុមព័ទ្ធដោយលួសបន្លា និងរបាំងបិទផ្លូវចូលទៅកាន់ដីស្រែចម្ការ។ ក្រសួងក៏បានបដិសេធចំពោះផែនទីដែលថៃបានផ្សព្វផ្សាយ ដោយចាត់ទុកថាជាការបង្វែរការពិត ខណៈដែលបង្គោលព្រំដែនលេខ ៤៣ និង ៥២ នៅមិនទាន់ត្រូវបានឯកភាពគ្នាជាផ្លូវការនៅឡើយ។
៣. ការអំពាវនាវដល់គណៈកម្មការព្រំដែនចម្រុះ
សេចក្តីថ្លែងការណ៍បានបញ្ជាក់ថា សូម្បីតែតាមបន្ទាត់ដែលថៃបានគូសក៏ដោយ ក៏នៅតែមានជនជាតិថៃមួយចំនួនបានកាន់កាប់ដី និងធ្វើស្រែចម្ការជាច្រើនហិកតា ដែលស្ថិតនៅក្នុងទឹកដីកម្ពុជាផងដែរ។ ដូច្នេះ កម្ពុជាបានអំពាវនាវឱ្យភាគីថៃដោះស្រាយបញ្ហានេះតាមរយៈគណៈកម្មការព្រំដែនចម្រុះ (JBC) របស់ប្រទេសទាំងពីរ ជាជាងការប្រើប្រាស់កម្លាំង ឬព្យាយាមអនុវត្តច្បាប់ក្នុងស្រុក។
៤. ការទាមទារឱ្យពន្លឿនការងារខណ្ឌសីមាព្រំដែន
កម្ពុជាបានរំលឹកថា ខ្លួនបានធ្វើការតវ៉ាជាផ្លូវការជាច្រើនដងរួចមកហើយទៅកាន់ភាគីថៃអំពីការរំលោភបំពានព្រំដែន ប៉ុន្តែមិនមានលទ្ធផលទេ។ ភាពតានតឹងនាពេលបច្ចុប្បន្ននេះបានបង្ហាញពីតម្រូវការចាំបាច់សម្រាប់គណៈកម្មការព្រំដែនចម្រុះក្នុងការផ្តល់អាទិភាព និងពន្លឿនការងារកំណត់ព្រំដែន ដើម្បីបញ្ចប់ជម្លោះនេះ។
៥. ការប្តេជ្ញាចិត្តរបស់កម្ពុជាចំពោះដំណោះស្រាយសន្តិភាព
ជាចុងក្រោយ ក្រសួងការបរទេសកម្ពុជាបានបញ្ជាក់ជាថ្មីនូវការប្តេជ្ញាចិត្តរបស់ខ្លួនចំពោះលក្ខខណ្ឌបទឈប់បាញ់ដែលបានឯកភាពគ្នាក្នុងកិច្ចប្រជុំកន្លងមក។ កម្ពុជាសង្ឃឹមថាភាគីថៃនឹងប្រកាន់ខ្ជាប់នូវលក្ខខណ្ឌដូចគ្នានេះ ដោយបញ្ឈប់ផែនការបណ្តេញប្រជាជនកម្ពុជា និងអនុញ្ញាតឱ្យអ្នកដែលត្រូវបានបណ្តេញចេញត្រឡប់ទៅផ្ទះសម្បែង និងដីធ្លីរបស់ពួកគេវិញ។ រាជរដ្ឋាភិបាលកម្ពុជានៅតែប្តេជ្ញាស្វែងរកដំណោះស្រាយដោយសន្តិវិធី និងមេត្រីភាពស្របតាមច្បាប់អន្តរជាតិ ខណៈដែលរក្សាជំហររបស់ខ្លួនថា ព្រំដែនមិនត្រូវផ្លាស់ប្តូរដោយកម្លាំងនោះទេ៕
